Read njo 1 KORINT 13 Bible Online

1 KORINT 13 - njo bible

1 KORINT 13

¹Ni nisungtem aser kotak tenyartem oshi nung jembiaka, saka kü dak temeim melira, ni takuba ola mesüra takushiba yin aküm.

² Ni sayutsüngitsü sempet liaka, aser miim o ajak aser temetetba ajak metetaka, aser ni tenemtem ajungdoktsüsa tamang tulu liaka, saka kü dak temeim melira, ni kecha masü.

³Ni sensaker mesütsü kü rongsen ajak agüjaka, aser rongtaktsütsü kü mang bendanga [2] agüjaka, kü dak temeim melira, ni tajangzük maka.

⁴Temeimi talangka aremzüker aser taochi sayur. Temeimi tenük memeremer, mezümeküm masür mesüra külaka mebenshir.

⁵Temeimi mesütepi mebenshir, pei asoshi kecha mebushir, ain madoker, tangar majung masüker.

⁶Temeimi tamajung nung mepelar, saka ochi den pelateper.

⁷Temeimi ajak benteter, ajak amanger, ajak imlar aser ajak aremzüker.

⁸Temeim kodanga majentsü. Shin o jembiba otem aliyonga aji süitemtsü; bendanger oshi jembitetba asüyonga aji anenadoktsü, temetetba shisatsüa süitemtsü.

⁹Kechiyong asenoki tesadang dang meteter aser tesadang dang sayutsüngir.

¹⁰Saka tabensaba kodang arudir idangji mabensaba süitemtsü.

¹¹Kodang ni tanur liasü, tanur ama ni bilem, tanur ama ni jembi, tanur ama ni shisadang. Tangbo tain aküm nung ni tanur yimsü endokogo.

¹²Kechiaser tangbo asenoki tanüdangtsü nung mejangjai angur, saka idangji tejak o tejak na angutsü. Tangbo ni tesadang dang meteter, saka idangji ni kechi koda jungjunga metettsü, aji oda nia junga metettsü.

¹³Jokorla, tangbo tamang, teimla, temeim, item asem teti lir, aser item rongnung temeim tulutiba.