Read njo 1 KORINT 14 Bible Online

1 KORINT 14 - njo bible

1 KORINT 14

¹Tanga kechisarena dang nungi nenoki temeimji bushiang aser tanela sempettem asoshi jangra-ang, saka sayutsüngitsü tali jangra-ang.

²Kechiyong shibai oshi balaka nung jembir, pai nisung dang masü Tsüngrem dang jembir, kechiyong aji shingaia mangateter, saka pai tesüngmangtsü miim o tanela nung jembir.

³Saka shibai sayutsüngir pai nisungtem oda parnok yangluloktsü aser ajungshitsü aser süneptsütsü asoshi parnok dang sayutsüngir.

⁴Shibai oshi balaka nung jembir pai peiji dang yarir, saka shibai sayutsüngir pai arogo ajonga nem teyari agütsür.

⁵Ni nenok ajak tangar oshitem nung jembidaktsünür, saka nenoki tali sayutsüngidaktsünür. Aser arogoji tashi itdaktsütsü asoshi oshi balaka jembiba tetezüji rateta meshitetra, oshi balaka jembir dang nungibo sayutsüngirbaji tongtibangba lir.

⁶Saka adianutem, ni nenok dang jungkai adokba o, mesüra temetetba shisatsü, mesüra sayutsüngiba, mesüra tesayuba mejembi-i nenok dangi oshi balaka jembia arura, nenoki kechi ajangzüktsü?

⁷Aser taküm maliba ola agütsüba oset, jemji mesüra kongi item ola balala bendanga magütsüra, kechi apur mesüra kechi atemer aji koda metettsü?

⁸Kechiyong jangzüi ola shitak madokra shibai raratsü asoshi renema atatsü?

⁹Aji oda nenoki oshi balaka jagi o tangatettsü temela mejembira, nenoki kechi jembir aji koda metettsü? Kechiyong aji nenoki mopung nung jembir ama alitsü.

¹⁰Alima nung oshi paikati lir aser tetezü meli-i jembiba oshi kecha maka.

¹¹Anungji ni jembiba oshi memetetra, o jembir madang ni bendanger ama alitsü aser o jembirjia kü madang bendanger ama alitsü.

¹²Aji oda nenoki tanela sempettem asoshi jangra nung, arogoji tashi itdaktsütsü asoshi nenoki teperiba akümtsü bushiang.

¹³Anungji shibai o balaka nung jembidir, pai tetezüji rateta shitettsü asoshi sarasademang.

¹⁴Kechiaser ni oshi balaka nung sarasademra, “kü nelai sarasademer,” saka kü mulungsentsü tangatetbabo tajangzük maka.

¹⁵Ajangla ni kechi inyaktsü? Ni tanela agi sarasademdi, aser ano ni mulungsentsü tangatetba agia sarasademdi; aser tanela agi ken tendi, aser ano mulungsentsü tangatetba agia ken tendi.

¹⁶Aji oda mesüra nai tanela nung dang Tsüngrem tenüng sangra, memeteteri nai ashiba kecha mangateti pai kechi koda “Amen” ta ashitsü? Kechiaser pai nai ashiba kecha memetet.

¹⁷Kechiaser atangji nai jungjunga tenüng asanger, saka tangarbo aji agi tashi meitdaktsür.

¹⁸Ni nenok ajak dang nungi oshi teimba agi jembi nung ni Tsüngrem tenüng asanger.

¹⁹Aji sakasa arogo tekülem sentep nungbo ni oshi balaka agi ojang meyirijang ter jembi dang nungibo, tangar sayutettsü asoshi, parnoki angatetba ojang pungu nungang jembila.

²⁰Adianutem, temulung nung tanur tesü. Tamajung nungbo kinü sang, saka tebilemdangba nung tain sang.

²¹ Ozüng nungji ya zülua lir, “Tepangkatsü oshi balaka jembiba nisung agi aser bendanger tebangmechi agi ni kü nüburtem dang jembitsü, aji oda saka parnoki kü o mangatsü ta Kibubai ashir.”

²²Anungji oshi balaka jembibaji amangbapurtem asoshi masü, saka mamangbapurtem asoshi temaitsü lir. Saka sayutsüngibaji mamangba purtem asoshi masü, amangba purtem asoshi temaitsü lir.

²³Anungji arogopurtem ajak sentepa alidang ajaki oshi balaka agi jembira, aser idangji memetetertem mesüra mamangbapurtem kar arura parnoki nenokji yiar ta mashitsü ama?

²⁴Saka ajaki sayutsüngira, aser idangji mamanger mesüra memeteter ka arura, idangji pai angashiba ajak jagi paji tai ta metetdaktsür aser tangashiba ajak jagi pa o bendanger.

²⁵Pa temulung nung aliba miim otem jungkai adokdaktsütsü, idangjibo pai ali nung apudaka, “Nenok rongnung Tsüngrem atangji lir” ta ashitsü aser Tsüngrem külemtsü.

²⁶Ajangla adianutem, ni shinübaji kechi? Kodang nenoki külemtsü asoshi senteper, nenok nisung shia tenüngsang ken ka, tesayuba ka, jungkai adokba arogo yangertsü asoshi lidakjang.

²⁷Oshi balaka agi jembiba lira, nisung ana nem mesüra teimba agi asem nem belentepa jembidakjang.

²⁸Saka tetezü ratettsür melira, oshi balaka agi jembisangi tekülem sentep nung ajemajema lidakjang.

²⁹Iba melen sayutsüngir ana mesüra asem nem jembidakjang aser tangari aji shisadakjang.

³⁰Saka anasa mena alir tangar ka dang jungkai adokba ka metetdaktsüra, mezüng jembia alisangji ajemajema lidakjang.

³¹Kechiaser nenok ajaki angazüktsü aser ajak ajungtsü asoshi nenok ajaki kati khen kati khen ta sayutsüngitsü akok.

³²Sayutsüngirtem tanelaji sayutsüngirtem kübok azüoka yua lir.

³³Kechiyong Tsüngremji rongrongshishidaktsüba Tsüngrem masü, saka tesüngjem Tsüngrem lir.

³⁴Khristar arogo ajak nung tetsürtem sentep nung mokorai lidakjang kechiyong parnok o jembitsü memelar. Ozüngi ashiba ama, parnok tashi angaba kübok lidakjang.

³⁵Parnoki langka angazüknüra, pei kidang pei kinungpur dang asüngdangdakjang kechiyong tetsür kati arogo sentep nung o jembitsüji maksü lir.

³⁶Ajangla nenok nungi dang Tsüngrem Oji adoka ao asü? Mesüra nenok dangi dang aji aru asü?

³⁷Nenok rongnung nisung kari pei sasa sayutsüngir ka mesüra tanela nisung ta bilemra, ni nenok dangi kechi zülur aji Kibuba temelaba Ozüng lir ta pa nem metetdakjang.

³⁸Saka kari ibai magizükra, pajia magizükbapur ka ama lidakjang.

³⁹Anungji adianutem, sayutsüngitsü kanga jangra-ang, aser oshi balaka jembibaji tesongtem.

⁴⁰Saka mapa ajak meraketa aser tatongi shia inyakdakjang.