Read njo 1 KORINT 15 Bible Online

1 KORINT 15 - njo bible

1 KORINT 15

¹Adianutem, ni nenok dang sangoktsüba Osangtajung, koba nenoki agizük, kechi nung nenoki noktaker, aji ni nenok nem metetdaktsünür.

²Ni nenok dang sayutsüngiba Osangtajung nung nenoki akanga sotra, nenok kümzüka lir, aji oda mesüra nenoki amangbaji amajok.

³ Kechiyong ajak dang tongtibangba ama ni kechi agizük, aji ni nenok dang sayur. Lai nung aliba ama asen menen asoshi Khrista asü,

⁴pa arem aser Lai nung aliba amaji tasemnübuba nung pa shia arudaktsü.

⁵ Aser Kefa dangi pa adok aser iba sülenji terana dangi adok.

⁶Aser ano mapang ka nung dang adianu noklang pungu dak chia dangi pa adok, parnokji teimba ka tang tashi taküm lir, saka karbo süogo.

⁷Aji sür külen ano Yakob dangi pa adok, iba sülen tenyartem ajak dangi adok;

⁸ aser ajak dang tesüsa, ni anogo metongi asoba kinü mabensaba tanur ka ama dangi pa jungkai adok.

⁹ Kechiyong ni tenyartem rongnung tilatiba aser tenyar ka ta ajatsü metemsü, kechiaser ni Tsüngrem arogo rishikangshi;

¹⁰Saka Tsüngrem taochi agi tang ni kechi lir yamaji lir. Aser pai kü nem agütsüba taochi amajok maküm. Saka parnok ajak dang nungi tali ni inyak.

¹¹Anungji ni süshia, parnok süshia, aji oda onoki sayutsüngir aser aji oda nenoki amang.

¹²Ano tang, Khrista tasü nungi shia aru ta onoki sayutsüngira, tasürtem shia arubaji malia ta koda sür nenok rongnung kari ashir?

¹³Saka tasürtem shia arubaji melira iba tetezü, Khrista shia marudaktsü.

¹⁴Aser Khrista shia marudaktsüra, onoki sayutsüngiba amajok aser nenok tamanga amajok.

¹⁵Hau, ano Tsüngrem indang onok kulitemji tiyazü kulitem ama küma angur, kechiaser Tsüngremi Khrista shia arudaktsü ta onoki kuli agütsür, anungji atangji tasürtem shia marudaktsüra, Tsüngremi Khrista-a shia marudaktsü.

¹⁶Kechiyong tasürtem shia marudaktsüra, Khrista-a shia marudaktsü.

¹⁷Aser Khrista shia marudaktsüra, nenok tamanga amajok, nenok ano pei temenen nung lir.

¹⁸Ajangla shirnok Khrista nung süogo, parnoka samaogo.

¹⁹Asenoki iba akümli nung dang Khrista dak imlara, meimchir ajak dang asen tia tamajungba.

²⁰Saka atangji Khrista tasü nungi shia arudaktsüogo. Anungji shirnoksa süogo, parnoka shia arutsü ta iba yagi kuli agütsür.

²¹Kechiaser kechi koda nisung ka agi tasübaji aru, aji oda nisung ka agi tasürtem shia arubaji aru.

²²Kechiaser kechi koda Adam nung ajak asü, aji oda Khrista nung ajak taküm kümdaktsür.

²³Saka nisung shia pei pei mapang nung, oda tamasa Khrista, aser iba sülen, pa aruba mapang nung pa nüburtem;

²⁴iba sülen tatemji arutsü aser iba mapang nung yimsüsüba ajak, aser tashi ajak, aser ain ajak samadaktsür külen pai Tebu Tsüngrem nem yimliji bendanga agütsütsü.

²⁵Kechiaser pai pei tsükchir ajak pei tetsüng kübok mayu tashi pai yimsü asütsüla.

²⁶Tatembangba tesamatsütsü aliba tsükchirji tasüba.

²⁷Kechiyong “Tsüngremi ajak pa tetsüng kübok ayu,” ta ashir. Saka idaki “ajak” ta asüba ya Tsüngrem, shibai ajak pa kübok ayu, pa indang ya mashir; saka Khrista kübok yutsüba sayur.

²⁸Aser ajak Techir kübok yutsür külen, Tsüngrem ajak nung ajak asütsü asoshi, Tsüngrem shibai ajak Techir kübok yutsü, pai Techira pa kübok yutsütsü.

²⁹Aji mesüra, tasürtem atema shir baptitsür, parnoki kechi inyaktsü? Tasürtem shia marura, ajangla tasürtem atema parnok kechiba baptitsür?

³⁰Onoka kechiba ghonda shia lendong nung noktaker?

³¹Ni anogo shia asür ta iba indang adianutem, ni Khrista Yisu asen Kibuba nung nenok dak kü uluba aliba agi ni atangji azüngashia ashir.

³²Nisung tsütsülen nungi shidi süra, ni Efesa yimti nung arem shiruru den raraba ajanga ni kechi ajangzük? Tasürtem shia marudaktsüra, shin oi ashiba ama, “Asenoki chiyungdi aser jemdi, kechiaser asüng asenok asütsü.”

³³Nenok tekülakokdaktsü; medemer tamajungi medemer jakla tajung kaji tamajung kümdaktsür.

³⁴Nenok mulungsentsü tim dangi arung, temenen tebenshi, kechiaser nisung kari Tsüngrem meteta mali. Nenok maksüdaktsütsü ni iba o ashir.

³⁵Saka kari asüngdangtsü, “Tasürtem kechi koda shia arudaktsür? Aser shia aruba temangji kechi ama ka asütsü?”

³⁶Na tamashi nisung! Kodang nai metsüjang ka ali nung prokdir, ibaji mesüra taküm makümer.

³⁷Aser nai kechi metsüjang proker, temang tesülen oda tsükjang süshia tanga metsüjang süshia, mokua aintsü asoshi proker.

³⁸Saka iba nem Tsüngremi pei temulung achiba agi temangji agütsür. Aser metsüjang shia nem pei pei temangji agütsür.

³⁹Shi ajak tapu ka dang masü, saka nisung shia tapu ka lir aser shiruru shi tapu balaka, ozü-sangnu shi tapu balaka, ango shi tapu balaka.

⁴⁰Ano kotak temang lir aser alima temanga lir. Saka kotak temang sentsüwangshi tapu ka, aser alima temang sentsüwangshi tapu balaka lir.

⁴¹Anü tesangwa balaka, ita tesangwa balaka aser petinu tesangwa balaka; ano petinutem tesangwa nung balala lir.

⁴²Aji oda tasürtem shia arubajia lir. Kechi prokogo, aji tesamatsüba, saka kechisa shia arudaktsüogo aji kodanga mesamatsübaji lir.

⁴³Mezüngmeshiba nung prok, saka sentsüwangshi nung shia arudaktsür; mokokmin nung prok, saka ain nung shia arudaktsür.

⁴⁴Alima temang prok, tanela nung shia arudaktsür. Alima temang ka lir saka tanela temang balaka lir.

⁴⁵ Ano yamai zülua lir, “Mezüng nisung Adamji taküm aliba ka aküm.” Aser tesübuba Adamji taküm agütsüba tanela ka aküm.

⁴⁶Aji sakasa kechi tanela takümji mezüngbuba masü, saka temang takümji mezüngbuba, aji sür-ang tanela takümji.

⁴⁷Mezüngbuba nisungji alima auyi nungi adok, saka tanabuba nisungji kotak nungi lir.

⁴⁸Ali nisungji koma lir, aji oda ali nisungtema lir; aser kotaker nisungji koma lir, aji oda kotaker nisungtema lir.

⁴⁹Aser asenoki kechi koda alima nisung ama liasü, aji oda asenok ano kotaker nisung ama akümtsü.

⁵⁰Ano adianutem, shi aser azüi Tsüngrem Yimli senmang amangtsü makoker; mesüra tesamabai mesamaba senmang amangtsü makoker ta ni ashir.

⁵¹Ajiang, ni nenok dang tesüngmangtsü miim o ka ashir, asenok ajaki memejangtsü, saka aoksa-a tenük masepshi nung,

⁵² tatem jangzü ola apudang, asenok ajak melenshitsü. Kechiaser jangzü aputsü aser tasürtem mesamaba nung shia arudaktsütsü; aser asenok melenshitsü.

⁵³Kechiaser iba tesamaba temang mesamaba akümtsüla aser iba tasüba temang masüba akümtsüla.

⁵⁴ Saka kodang iba tesamaba ya mesamaba kümer lidir, aser iba tasüba ya masüba kümer lidir idangji iba zülua aliba o ataloktsü. “Tasübaji takokba nung meyokogo.”

⁵⁵Oh tasüba, ne takokba kong ali? Oh tasüba ne temetakba kong ali?

⁵⁶Tasüba teraji temenen, aser temenen teraji ozüng.

⁵⁷Saka Tsüngrem tenüng sangang, pai asen Kibuba Yisu Khrista ajanga asenok nem takokbaji agütsür.

⁵⁸Anungji kü meimba adianutem, akang akanga marakzüi liang, Kibuba mapa nung maibelentsü teti nentaka liang, kechiaser Kibuba nung nenok mapa amajok masü ta nenoki metet.