Read njo 1 KORINT 16 Bible Online

1 KORINT 16 - njo bible

1 KORINT 16

¹ Ano temeshipurtem asoshi sen saruba indang; ni kechi koda Galatia arogotem dang teinyaktsü ashi, yamaji nenokia benshiang.

²Ni arudang tenla sen mesarutsü asoshi deobarnü nenok nisung shiai pei temoatsü anguba yari langka balaka rizünga yuang.

³Aser kodang ni arudir, nenoki shirsa tetemsü ta shitetdir, ni parnok nem shitiji agüja, nenok tenla Yirusalemi bener yokdi.

⁴Aser ni aotsü tim süra, parnok kü den aotsü.

⁵ Ni Makedonia ajanga or külen nenok dangi arutsü, kechiyong ni Makedonia ajanga aotsü bilema lir.

⁶Aser oda ni nenok den anentsü, ashiko tsüngkhüm renteta-a amungtsü akok, anungji ni aolen ajak nung nenoki ni meinoktsütsü.

⁷Kechiyong ni lenmang nung süia aodangbo nenok den majurutepnür, oda Kibubai dang melara, ni nenok den kenpigabo amungtsü imlar.

⁸Saka Tenemnü Benjong tashi ni Efesa nung amungtsü.

⁹Kechiyong mapa tulu inyaktettsü asoshi kishiji ni asoshi lapokja kar, aser ano arür-a aika lir.

¹⁰Ano Timoti arura, pa metsübui nenok rongnung lidakjang, kechiyong ni inyakba ama pai Kibuba mapa inyaker.

¹¹Anungji shingaia pa tesensatsü. Saka kü dangi meyipa arutsü asoshi tesünep nung pa lenmang nung meinokjang. Kechiaser pa adianutem den arutsü ni imla-a atar.

¹²Saka asen adianu Apolo indang, ni pa adianutem den nenok dangi arutsü kanga mepishir. Saka pa tang arutsübo terakata temulung nung mali, aser kodang mapang tajung ngudir pa-a arutsü.

¹³Saksalema liang. Tamang nung akanga noktakang. Teburchi ama tasü itang. Tashi itang.

¹⁴Nenoki inyakba ajak temeim nung inyakdakjang.

¹⁵Ano adianutem, Akaya nung Stefana aser par kibongji mezüng temulung meyipertem aser parnoki temeshipurtem tenzüktsü asoshi pei sasa bendanga agütsü ta nenoki meteta lir.

¹⁶Nenoki ibala nisung kübok aser onok den yaritepa inyaker ajak kübok alitsüla ta ni nenok dang mepishir.

¹⁷Aser Stefana aser Fortunate aser Akaiko aru nung ni pelar; kechiyong nenok metentetba asoshi parnoki abensatsüogo.

¹⁸Kechiaser parnoki kü nela aser nenok tanela anisüngzükdaktsü. Anungji nenoki ibala nisung meteta yuang.

¹⁹Asia nung arogotemi nenok dangi salem bendaktsür. Akula aser Priskila aser parnok kidang aliba arogo den Kibuba nung nenok dangi salem tulu bendaktsür.

²⁰Adianu ajaki nenok dangi salem bendaktsür. Nenoki adianu o adianu na temeshi temeim agi salem agütsütepang.

²¹Ni, Paul, iba salem o ya kü teka agi zülur.

²²Nisung kari Kibuba dang memeimra, pa atakatem sang. Asen Kibuba arudar.

²³Kibuba Yisu Khrista taochi nenok den liang.

²⁴Khrista Yisu nung kü temeim nenok ajak den liang. Amen.