Read njo 1 KORINT 3 Bible Online

1 KORINT 3 - njo bible

1 KORINT 3

¹Adianutem, Tanela nisungtem dang jembiba ama ni nenok den mejembitet. Saka shi nisung ama aser Khrista nung kinütem dang ama ni nenok den jembir.

² Chiyungtsü temerang agi masü, saka mamatzü agi ni nenok mesü, kechiyong nenoki aji agizüktsü makok. Aser tanga makoker.

³Kechiyong nenok ano shi jenjang nungsa lir. Kechiyong nenok rongnung tenükmerem aser rara bangsen ali nung nenok shi jenjang nung alir masü no? Aser yimya nisung amato nenoki jajar masü no?

⁴Kechiyong kari “Ni Paul nübu” aser kari “Ni Apolo nübu” ta jembi tashi nung nenok shi nisung masü ama?

⁵Ajangla Apolo shiba? Aser Paul shiba? Parnokji Tsüngrem tenzükertem, shir ajanga nenoki amang. Parnok shiai Kibubai agütsüba ama inyak.

⁶ Ni atem, Apoloi tzü aen saka Tsüngremi dang aji indaktsü.

⁷Anungji tatemsang aser tzü aensang tenaji tongtibang masü saka indaktsüsangji Tsüngrem lir.

⁸Tatemsang aser tzü aensang anapronglaji kasa dang, aser parnok nisung shiai pei mapa yari taa angutsü.

⁹Kechiyong onok Tsüngrem asoshi arok tenzükertem lir; aser nenok Tsüngremer lu, Tsüngremer ki.

¹⁰Tsüngremi kü nem agütsüba taochi yari, shisa taka tongti kisür ka ama ni kiji yangerogo aser tangari iba manung yangluloker. Saka nisung shiai koda yangluloker iba asoshi kümdangang.

¹¹Kechiyong koba yangerogo, oda Yisu Khrista, iba dak alema shingaia tanga meyangertettsü.

¹²Iba yangerba manungji kari hon, taribi, senti lung, süng, ai aser monü agi yanglura,

¹³nisung shia mapaji jungkai adoktsü. Kechiyong anogoi ibaji sayutsü. Kechiaser ibaji mi nung jungkai adoktsü aser nisung shia pei mapa kechi koma inyaka ali, aji mi agi atitangtsü.

¹⁴Iba manung yanglulokba nisung kar mapa anünga atara, pai tajangzük angutsü.

¹⁵Nisung kar mapa rongtokra, pa akoksatsü, saka pabo mi nungi jenbuba ama kümzüktsü.

¹⁶ Nenok Tsüngrem tenla ki, aser Tsüngrem Tanela nenok dak alir ta nenoki memetet no?

¹⁷Nisung kari Tsüngrem tenla ki raksara, Tsüngremi pa raksatsü. Kechiyong Tsüngrem tenla ki temeshi aser ibaji nenok lir.

¹⁸Shingaia pei sasa tekülakokdaktsü, Nenok rongnung kari iba lima shisatsü nung shisa taka ta bilemra, pa shisa taka akümtsü asoshi tamashi akümtsüla.

¹⁹ Kechiyong iba lima shisatsüji Tsüngrem madang tamashi lir. Zülua aliba ama, “Tsüngremi shisa takartem parnok sangrasangji nung apur.”

²⁰ Aser ano yamai zülua lir, “Shisa takartemi shisaba amajok ta Kibubai meteter.”

²¹Anungji shingaia nisung dak ulua tebilem.

²²Kechiyong ajak nenok meyong; Paul süshia, Apolo süshia, Kefa süshia, alima süshia, tasüba süshia, tang aliba osettem süshia, ajak nenok meyong.

²³Aser nenok Khrista meyong aser Khrista Tsüngrem meyong.