Read njo 1 KORINT 4 Bible Online

1 KORINT 4 - njo bible

1 KORINT 4

¹Anungji onok Khrista tenzükertem ama aser Tsüngrem miim o ketdangsürtem ama züngshiangma.

²Ano ketdangsürtemji temulung lemtetbapur asütsü akhanger.

³Saka nenoki süshia aser nisunger obendangba agi süshia ni o bendangdaktsütsübaji tila ka dang ta ni züngshir. Anungji ni kü sasa o mebendanger.

⁴Kechiyong ni anema kü sasai kecha meteta mali, saka aji agi ni memetendaktsür, saka kü o bendangsangji Kibuba lir.

⁵Anungji Kibuba shibai ammang nung miima akaba sangwadaki bener arutsür, aser nisung temulung nung shisaba jungkai adokdaktsür; mapang matongdang Kibuba maru tashi kecha o tebendang, idangji nisung shiai Tsüngrem nungi tenüngsang angutsü.

⁶Adianutem, nenoki Laishiba tetuyuba ama taküm alitsü onok ajanga angazüktsü akok ta, aser nenok shinga kati ka anema asükümtepa malitsüsa, nenok tajangzük asoshi Apolo küna takümji tatishitsü lir

⁷Shibai na temaba kümdaktsü? Tsüngremi item ajakji ne nem agütsü masü no? Süra ibaji sempet ama mesüi, nai kechiba asü akümer?

⁸Tang joko nenok süngadokogo südi! Onok medeni nenok chubatem kümogo, onoka nenok den yimsüsübaji lemsateptsüsa nenoki chubar ta-ang südaktsünüali.

⁹Kechiyong tasütsü atemzükba nisungtem ama Tsüngremi tatemsa onok, oda tenyartemji adokdaktsü ta ni bilemer, kechiyong alima madang aser kotak tenyartem madang aser nisungtem madang onok tebenzütsü ka kümogo.

¹⁰Khrista tenüng nung onok tamashirtem lir. Saka nenok Khrista nung shisa akartem lir. Onok tashi mait, saka nenok tashi tait. Nenok nüngsang lir, saka onok nüngsen lir.

¹¹Tang mapang tashi onok ayar aser tzürar, mangsa aser kangshia lir aser talidak shitak maka;

¹²aser onoki pei teka agi inyaka belemer. Atala dang onoki moatsür, rishikangshidang onoki aremer;

¹³Tenüng menükdang onoki mepishir. Tang tashi nung onokji alima jana aser rüja ama kümdaktsür.

¹⁴Nenok akdaktsütsü ni itemi mezülur, saka nenok kü temeimba chirtem ama sayutsü zülur.

¹⁵Kechiyong nenok Khrista nung tesayur meyirijang ter liaka nenok tebu aika mali. Kechiaser Osangtajung ajanga Khrista nung ni nenok aso.

¹⁶Anungji nenok kü jilu ajizükertem kümang ta ni nenok dang mepishir.

¹⁷Iba atema Kibuba nung ni temulung lemtetba aser kü temeimba chir Timoti nenok dangi yokogo, aser ni ajaklen arogo shia koma sayur, yamaji Khrista nung ni sayuba lenmang ajak pai nenok nem bilemtetdaktsütsü.

¹⁸Ni nenok dangi marutsü ta bilema nenok rongnung kari mezümekümer.

¹⁹Saka Kibubai mulungra, ni nenok dangi yakta arutsü, idangji ni mezümekümertem o masü, saka parnok ainji metettsü.

²⁰Kechiyong Tsüngrem Yimli o jembitepba nung masü, saka ain nung lir.

²¹Nenoki kechi mulungtet? Ni nenok dangi tazüktsü süng bener arutsü asü? Mesüra temeim nung aser ajemalu tanela nung arutsü?