Read njo 1 KORINT 5 Bible Online

1 KORINT 5 - njo bible

1 KORINT 5

¹Nenok rongnung nüktapangta koba Bendangertem rongnunga mali, oda nenok rongnung kati pei tebu kinungtsü agi, ibala nüktapangta lir ta shitak osang aruogo.

²Aser ibala nisung nenok telungjem rongnungi atsüngdakja mang ayimtsü melena nenoki asüküma bilemer?

³Anungji ni temang nung medenaka, tanela nung dena ali nung, dena aliba ama iba ama inyakba nisung madak Kibuba Yisu tenüng nung ni pa o bendangadokogo.

⁴Kechiyong kodang asen Kibuba Yisu Khrista tenüng nung nenok külemi senteper, aser Kibuba Yisu Khrista ain agi tanela nung nia dena ali nung,

⁵Kibuba Yisu anogo nungji pa tanela kümzüktettsüsa pa temangji samatsütsü asoshi iba nisungji nenoki Satan nem bendanga agüjang.

⁶Nenok ulubaji tajung masü, piyazü tila kati am ajak pokradaktsür ta nenoki memetet no?

⁷Nenok telung tasen akümtsü asoshi piyazü tejenji meshidokang; kechiyong nenok piyazü meinokba lir, kechiaser asen kümtettsü San Chanu, oda Khrista tenla agütsüogo.

⁸Anungji piyazü tejen agi masü, mesüra tamajung agi masü, saka chichiba aser ochiba piyazü meinokba amtsük agi asenoki benjongji benshidi.

⁹Nüktapangtartem den nenoki temedem ta ni nenok dangi kü shiti nung züluogo.

¹⁰Saka aji ya, iba lima nüktapangtartem mesüra tenükshiba aser merumeru mesüra süngyanglu külemer den khenyongi temedem ta masü, kechiyong aji oda süra nenoki alima nungi ainshitsüla.

¹¹Saka adianu ta ajaba nisung kar nüktapangtar mesüra tenükshiba, mesüra süngyanglu külemer mesüra atalaba mesüra yi pur, mesüra merumeru lira, ibala nisung denji techiyung ta ni nenok dangi zülur.

¹²Kechiyong tezülen mamangertem o bendangtsü ni kechi tenüngdaktsü aka? Arogo telung nung alirtem rogojiang nenoki o bendangtsü masü no?

¹³ Saka Tsüngremi mamangertem o bendanger. Nisung tamajungerji nenok rongnungi endokang.