Read njo 1 KORINT 6 Bible Online

1 KORINT 6 - njo bible

1 KORINT 6

¹Nenok rongnung kati kar anema o kara, amangba purtem yutsür mamangba purtem dangi o bendangi aotsü temulung ulur asü?

²Temeshi purtemi alima o bendangtsü ta nenoki memetet no? Nenoki alima o bendangtetra, ken-o tilatem bendangtsü nenok metemsü no?

³Asenoki kotak tenyartem o bendangtsü lir ta nenoki memetet no? Ajangla iba taküm indang koda tali?

⁴Anungji iba taküm indang o bendangtsü nenok lira, arogo nung matenba pur nem nenok o bendangdaktsüdi ma?

⁵Nenok aakdaktsütsü ta sür ya ni nenok dang ashir. Adianu tsüngda nung o bendangtsüsa nenok rongnung shisa taka nisung kata mali no?

⁶Saka adianu o adianu-na o katepdang mamangbapur dangi ang aor no?

⁷Atangji tanga nenok kati ka den o katep nung nenok tamakok alur. Nenoki yamaji benshidang nungibo kechiba tai ang maremer? Mesüra tashioktsüang ashiokdaktsüdito?

⁸Masü saka nenoki nenok sasa tai inyaker, aser tekülak agi sen agir; aser itemji nenok adianutem anema ang inyaker.

⁹Mesüra ochi mashiba purtemi Tsüngrem Yimli senmang mamangtsü ta nenoki memetet no? Nenok tekülakokdaktsü; jabujarirtem süshia, süngyanglu külemertem süshia, nüktapangtartem süshia, yimya masüba benshir süshia, teburi tebur den jabujarirtem süshia,

¹⁰auürtem süshia, ambangyimertem süshia, yi agi mesepba purtem süshia, tatalartem süshia, rakzükraktemertem süshia, yamala shingaia Tsüngrem Yimli senmang mangutsü.

¹¹Aser ibalaji nenok rongnung kar liasü, saka asen Kibuba Yisu Khrista tenüng nung aser asen Tsüngrem Tanela nung nenok shitokogo, nenok meshitetogo, nenok metendaktsüogo.

¹²Kechiyong tezülen mamangertem o bendangtsü ni kechi tenüngdaktsü aka? Arogo telung nung alirtem rogojiang nenoki o bendangtsü masü no?

¹³“Tepok asoshi chiyungtsü aser chiyungtsü asoshi tepok.” Hau, saka Tsüngremi anaprongla samadaktsütsü. Saka temangji nüktapangta asoshi masü, saka Kibuba asoshi lir; aser Kibubaji temang asoshi lir.

¹⁴Tsüngremi Kibuba shia arudaktsü aser pa ain ajanga asenoka shia arudaktsütsü.

¹⁵Nenok temangji Khrista tenük-telentem lir ta nenoki memetet no? Ajangla ni Khrista tenüktelen bener oa nüktapangtatsür tenüktelen kümdaktsütsü asü? Yamaji kodanga masü.

¹⁶Shibai nüktapangtatsür den medemdir, paji la den shi ka dang akümer ta nenoki memetet no? Kechiyong Laishibai ashir, “Tenaji shi ka dang akümtsü.”

¹⁷Saka Kibuba den shibai lungjemdir, pa den tanela nung ka dang akümer.

¹⁸Nüktapangta nungi jenang. Nisungi mebenshiba temenen ajak pei temang tezülen lir, saka shibaisa nüktapangta benshidir pai pei temang anema temenen benshir.

¹⁹Mesüra nenok dak aliba Tanela Temeshi shiba nenoki Tsüngrem nungi agizük, nenok temangji pa tenla ki lir ta nenoki memetet no?

²⁰Kechiyong jenjang talang agi nenok alizük, anungji nenok temang nung Tsüngrem sentsüwangshidakjang.