Read njo 1 KORINT 7 Bible Online

1 KORINT 7 - njo bible

1 KORINT 7

¹Tang nenoki züluba onüktem indang to: teburi tetsür dak metangshi tajungba.

²Saka jabujari onsara ali nung tetsür shia pei pei kinungpu yuang.

³Kinungpui pei kinungtsü nem kechi tagütsütsü tim aji agüjang. Aser yamaji kinungtsüria kinungpur nem agüjang.

⁴Kinungtsü pei temang nung kibur masü, saka kinungpuji kibur aser yamaji kinungpu pei temang madak kibur masü, saka kinungtsüji kibur.

⁵Nenoki sarasadem nung temulung agütsütettsü asoshi külemi bangjemteper mapang tatsüka dak alema nenoki kati ka nem kechi tagütsütsü tim aji magütsüi teli; aser nenok pei sasa mazüoktetba ajanga Satani nenokji atitangdakja lir ano tanaben külemi ajurutepang.

⁶Saka iba indang ni ozüng magütsür, oda mela-a dang shidanger.

⁷Saka nisung ajak ni ama dang ni kümdaktsünür. Aji saka nisung shia Tsüngrem nungi sempet kar tapu ka, aser kar tapu balaka ta angur.

⁸Saka kibong makümbatem aser amitsürtem dang ni ya shinür, oda ni ama dang alitsübaji parnok asoshi junger.

⁹Saka parnoki pei mang mazüoktetra, parnok kibong kümdakjang aser jabujaria ali dang nungibo kibong akümba tajungba.

¹⁰ Saka kibong küma alibatem dang ni metetdaktsür, saka aji ni masü Kibubai ashir, oda kinungtsü jagi pei kinungpu nungi mepilatsüla.

¹¹Saka lai pila ora, la amia alitsüla aji mesüra la pei kinungpu den putepatokang, aser kinungpuia pei kinungtsü mepalatsüla.

¹²Saka tanüngbatem dang Kibubai masü, ni shinür, adianu kar mamangba kinungtsü lira, aser lai mulunga pa den lira, la tepaladaktsü.

¹³Aser kinungtsü ka mamangba kinungpu ka den lira, aser pai mulunga la den lira, la nungi kinungpuji tepaladaktsü.

¹⁴Kechiaser mamangba kinungpuji kinungtsü agi meshidoker aser mamangba kinungtsüji kinungpu agi meshidoker. Aji mesüra nenok chir temeshi masü, saka tang parnok temeshi lir.

¹⁵Saka mamangbai pilara pa odakjang. Ibala nisungji tamangba adianui mesüra adianutsüri alena mali, kechiaser Tsüngremi nenok teputep nung alitsü aja.

¹⁶Kechiyong, Oh kinungtsü, nai ne kinungpu kümzüktettsü asü masü nai koda metet? Mesüra Oh kinungpu, nai ne kinungtsü kümzüktettsü asü masü nai koda metet?

¹⁷Aji saka nisung shia nem kechi tia Kibubai lemzüktsü aser Tsüngremi jaogo, pa yamaji jajadakjang. Yamaji ni arogo ajak nung melar.

¹⁸Nisung kar mejeptoker alidang aja asü? Pa memejeptokba ama tekümdaktsü. Nisung kar memejeptoki alidang aja asü? Pa temejeptoktsü.

¹⁹Kechiaser temejeptokba süshia memejeptokba süshia, itemji tongtibang masü, saka Tsüngremer temelaba ozüngtem benshibaji dang nüngdaka lir.

²⁰Nisung shia Kechi tia nung lia aja iba nungji pa lidakjang.

²¹Na alar süa alidang aja asü? Aji indang kecha tebilem, saka na nüji kümra yamaji sang.

²²Kechiyong shiba alar süa alidang Kibuba nung aja, Kibubai nüji kümdaktsübaji pa, aser nüji tia nung aliba nisung ka kodang jadir paji Khristar lar akümer.

²³Nenok talang agi ali, nisung lar teküm.

²⁴Adianu, nisung shia kechi tia nung alidang aja, yamajisa Tsüngrem den liang.

²⁵Kibong makümba purtem asoshi Kibuba nungi ni temelaba ozüng maka, saka Kibuba taochi ajanga temulung lemtetba pur ka ama kü tebilemba agütsür.

²⁶Anungji tang timtem alinung, nisung shia pa koda lir yamaji alitsü junger ta ni bilemer.

²⁷Na kinungtsü den sendaktepa ali asü? La nungi pilar alitsü temerang. Na kibong maküm asü? Kibong akümtsü tebushi.

²⁸Saka nai kibong kümra, nai temenen memenar. Saka shirnoki kibong akümer parnok taküm nung alima toushi kar aser iba nungi ni nenok kümzüknür.

²⁹Saka adianutem, mapang tatsü kümogo ta ni ashir, anungji shiba kinungtsü lir, kinungtsü mali ama kümang.

³⁰Tajebertem majebertem ama liang, aser tepelartem mepelartem ama liang, talirtem makaba ama liang.

³¹Aser shirnoki alima rongsen arishir parnoki talira marishitsüla. Kechiyong iba lima süitema odagi.

³²Saka ni nenok shisa buluba pungtokdaktsünür. Ki mayimba nisungi Kibuba mapa indang aser koda Kibuba peladaktsütsü iba indang pai shisar.

³³Saka ki ayimba nisungi alima mapa indang, aser koda pei kinungtsü peladaktsütsü item indang pai shisar.

³⁴Anungji pa temulung nung telemsa lir. Kibong makümba tetsür aser aiüri Kibuba mapa asoshi bilemer. Pei temang aser tanela ajonga Kibuba meyong kümnür. Saka kiyi aolai alima mapa indang aser pei kinungpu peladaktsütsü indang bilemer.

³⁵Nenok dak talenba ka enloktsütsü ni ya ashir masü, saka nenok tajangzük asoshi, nenok timi lidaktsütsü aser bendanga agüja Kibuba tenzüktsü asoshi ashir.

³⁶Nisung kati pei aniasünga aliba aiürla dang timi mebenshir ta bilema aser pai kibong kümnüba tejangrabaji sashia lira oda pai kibong kümadoktsüla ta bilemra, pai mulungba ama inyakdakjang. Tena kibong kümdakjang, kechiyong iba jagi pai temenen memenar.

³⁷Saka nisung ka dak yamaji inyaktsü tanungba tashiji mali ta süra, aser pei mulungjang nung kibong makümtsüji mulungteter lira, aser pa temulungtetbaji azüokteta lira, aser kechi inyaktsüar pei mulung nung jungjunga telemtetbaji agiadoker lira, idangjibo pai aiürla den kibong makümbaji tajungba dang.

³⁸Anungji shibaisa pei aniasünga aliba aiürla den kibong kümdir pai junga inyaker, aser shibai kibong mekümi dang sota ayur pai tajungba inyaker.

³⁹Kinungpu taküm ali tashi kinungtsüji la kinungpu den alena lir, saka kinungpuji süadokra, lai shiba dangi onür la mulung, saka Kibuba dak amanger den dang lai litet.

⁴⁰Saka la odang kija ali tajungba asütsü ta ni bilemer. Aser Tsüngrem Tanela kü den aden ta ni bilemer.