Read njo 1 KORINT 8 Bible Online

1 KORINT 8 - njo bible

1 KORINT 8

¹Ano süngyanglu dang tenlaba chiyungtsü indang. Asen ajak temetetba shisatsü agi nisung asükümdaktsür; saka temeimi yangerdaktsür.

²Kari langka metet ta bilemer, saka atangji kechi metettsü tim-ar ajibo memetet.

³Saka kari Tsüngrem meimra, pai pa metet.

⁴Anungji süngyanglutem dang tenlaba chiyungtsü indang: “Alima nung süngyangluji kecha masü” aser Tsüngrem ka dak alema shinga mali ta asenoki metet.

⁵Kechiyong kotak nung mesüra alima nung “tsüngremtem” ta ajabaji liaka, aser tsüngrem aika aser kibur aika,

⁶aji saka asenok atema Tsüngremji ka dang, oda paji Tebu, shiba nungi kechisarena ajak adok, aser shiba atema asenok alir, aser Kibubaji ka dang lir, Yisu Khrista, shiba ajanga kechisarena ajak lir aser shiba ajanga asenok lir.

⁷Aji saka iba temetetba shisatsü nisung ajak dak ali masü, saka nisung karbo süngyanglutem den yimya süpa-a sentaktepa ali nungji tang tashi süngyanglu nem agütsüba chiyungtsüji parnoki achir, aser parnok mulungsentsü tashi mait ali nung menenadoker.

⁸Chiyungtsü jagi asenok Tsüngrem tsüngdang majongkettsü; ano asenoki mechiaka tajungba masü.

⁹Saka kodakirnaka sür tashi maitba pur madang nenok nüji mapatemji temetsüdaktsü makümtsüsa nenoki kümdangang.

¹⁰Iba nung tashi maitba mulungsentsü atenba nisung kati, na iba temetetba akasangi süngyanglu tenla kidang chiyunga ngura, iba jagi süngyanglu nem agütsüba chiyungtsü achitsü paji majungshili ma?

¹¹Kechiyong ne temetetba shisatsü ajanga tashi maitba adianu, shiba atema Khrista asü, pa samadaktsür!

¹²Yamaji adianutem anema temenen menaba aser tashi meiti alidang, parnok mulungsentsü yirudaktsüba jagi parnok Khrista anema temenen menar.

¹³Anungji chiyungtsü jagi kü adianutem metsüdaktsüra, ni kü adianu memetsüdaktsütsü asoshi kodanga shi machitsü.