Read njo 1 KORINT 9 Bible Online

1 KORINT 9 - njo bible

1 KORINT 9

¹Ni nüji masü no? Ni tenyar ka masü no? Asen Kibuba Yisu ni mangu no? Kibuba nung kü mapa tajangzük nenok masü no?

²Tangartem matsüngdang ni tenyar ka mesüaka, nenok madangbo ni tenyar ka lir; kechiyong Kibuba nung nenok kü temaitsü kuli lir.

³Ni atitangertem madang kü temeten o ya lir:

⁴Onoki chiyunga ajemtsü tim mali asü?

⁵Tangar tenyartem ama, oda Kibuba adianutem aser Kefa ama, nia Khristan kinungtsü ka anir jajatsü tim mali asü?

⁶Taküm alitsü asoshi Barnaba küna kijai dang mapaji inyaktsüla asü?

⁷Temeranger shibai pei sen aria mapa inyaker? Shibai tsükmenatzü lu ayimer iba nungi süngjang machir ama? Aser shibai san telok nüka parnok dak nungi mamatzü majemer ama?

⁸Nisung ama ni itemi jembir asü? Mesüra ozüng nunga itemi mashir ama?

⁹Kechiyong Mosa Ozüng nung yamai zülua lir, “Nashi mo anetdang nai pa tebang tenembang.”

¹⁰Nashi atema Tsüngremi bilemer asü? Mesüra onok atema dang pai ya ashir asü? Hau, onok atema iba o zülu, kechiaser shibai alu tendir pai imla-a arutsü tim.

¹¹Onoki nenok rongnung tanela oset proker, nenok nungi temang tenüngdaktsü oset rura, aji onsara asü?

¹²Nenok nungi tangartemi ibai tim shilem ta kangra, onokiang tali yamaji benshitsü tim masü no? Aji saka onoki iba tim tashiji mebenshi, saka Khrista Osangtajung lenmang nung tenokdangtsü ka yuja lir ta sür onoki kechisarena ajak aremer.

¹³Tenla kidang mapa inyakertemi tenla ki nungi pei chiyungtsü angur aser tenla sabang nung tenzükeri tetepsetba tenlatem nungi shilem lemzüker ta nenoki memetet no?

¹⁴Iba amaji Osangtajung sayutsüngirtem Osangtajung agi alitsüla ta Kibubai melaogo.

¹⁵Saka item tim tashitemji ni kata mebenshir, aser yamala teyari kar danga ngutettsü atema ni ibai mezülur; kechiaser ni uluba kuli kari amajok kümdaktsü dang nungibo ni tasüang asütsü.

¹⁶Kechiyong ni Osangtajungji sayutsüngira, ni kecha asükümtsü mali. Ni ya inyaktsü tim; kechiyong ni Osangtajungji sayutsüngi mesüra, ni asoshi aiatai!

¹⁷Kechiyong ni ibai mulung mulunga inyakra ni tajangzük kar, saka ibaji ni memulungi inyakra kü nem teinyaktsü agütsüba mapa ka ama ni ibaji inyaker.

¹⁸Ajangla kü tajangzük kechi? Ni Osangtajung nung kü tim tashi mebenshitsü asoshi ni kodang Osangtajung sayutsüngi ni Osangtajungji angati dang agütsür.

¹⁹Kechiyong ni nisung ajak nungi nüji liaka, nisung tali ajangzüktsü asoshi ni kü sasa ajak lar aküm.

²⁰Yihuda nungertem ajangzüktsü asoshi ni Yihuda nungertem madang Yihuda nunger ama aküm; Ozüng kübok alirtem ajangzüktsü asoshi, ni ozüng kübok meliaka, ozüng kübok alirtem madang ni ozüng kübok alir ka ama aküm.

²¹Ozüng makaba purtem ajangzüktsü ni ozüng makaba purtem madang ozüng makar ka ama aküm. Saka Tsüngrem madang ni ozüng makai mali, saka Khrista madang ni ozüng kübok lir.

²²Tashi maitba purtem ajangzüktsü asoshi ni tashi maitba purtem madang tashi maiter ka ama aküm. Kar danga kümzüktsü asoshi ni kechisarena agi nisung ajak madang ni ajak aküm.

²³Aser Osangtajung nung ni tangar den iba temoatsü lemsateper ka akümtsü asoshi Osangtajung atema ni item ajak inyaker.

²⁴Asayadak tasemteper ajaki toktepa asemteper, saka kati dang sempetji angur ta nenoki memetet no? Anungji sempetji angutsü asoshi nenokia asemang.

²⁵Tetokteper shiai tesem ajak nung pei sasa azüokteta inyaker. Tesamatsüba korang ka asoshi parnoki aji inyaker. Saka asenokibo meraksatetba korang asoshi aji inyaker.

²⁶Anungji nükjidong ka makaibo ni masemer. Nisung kati mopung nung atsüngba ama ni teka agi matsünger.

²⁷Saka ni tangar dang sayutsüngir külen ni kü sasa magizüka lir ta sür, ni kü mang nung azüoker, aser iba lar kümdaktsür.