Read njo 2 KORINT 1 Bible Online

2 KORINT 1 - njo bible

2 KORINT 1

¹Paul, Tsüngremi mulungba ajanga Khrista Yisu tenyar ka, aser adianu Timoti, Korint nung aliba Tsüngremer arogo aser nenok den aliba temeshipur ajak dangi;

²asen Tebu Tsüngrem aser Kibuba Khrista nungi nenok dangi taochi aser tesünep sang.

³Tsüngrem aser asen Kibuba Yisu Khristar Tebu, oda yimlibilem Tebu, aser Süneptsüba ajak Tsüngrem tenüng sangang.

⁴Koba tesünep agi Tsüngremi nenok süneptsür, iba tesünep jagi tangar timtem tekangshi nung alirtem onoki süneptsütettsüsa pai onok timtem tekangshi ajak nung süneptsür.

⁵Kechiyong Khrista timtem tekangshi nung onoki shilem jenti agiba ama, Khrista ajanga onok tesünepa jenti kar.

⁶Onok timtemra, aji nenok tesünep aser tekümtet asoshi lir; onoki tesünep ngura, onok timtemba kasaji nenokia aremzüka abendang, nenoki iba tesünepji nguteta akümtsü.

⁷Nenok asoshi onok teimla akang akanga lir, kechiaser onoki metet oda nenoki onok timtemba lemsatepdang nenoki ano onok tesünepa lemsateper.

⁸Kechiyong adianutem, Asia nung onok dak kechi timtem atalok, iba indang nenok nem memetetdaktsüibo melinür. Idakji onoki metizüktettsüsa onok onsara zürepdaktsüba agi onok taküm teimla makai liasü.

⁹Hau, “onoki pei dak tamang ka-a malitsü,” saka tasürtem shia arudaktsüba Tsüngrem dak amangtsü asoshi onok anema tasüba obendangbaji aruadokogo ta onoki meteta aru.

¹⁰Saka ibala tasüba lendong nungi pai onok kümzük, aser kümzüktsü aser ano pai onok manenisa kümzüktsü ta onoki pa dak imlar.

¹¹Nisung aikati sarasademba agi onok nem temoatsü agütsü nung, aikati onok atema Tsüngrem tenüng asangtsü asoshi nenokia mepishiba agi onok atema yaritepdagi.

¹²Kechiaser shi tsütsü nung masü, saka Tsüngrem taochi nung aser Tsüngrem temeshiba aser chichiba agi onoki alima nung benshi, aser yamaji nenok madang talia benshi. Ibaji onok uluba, aser onok mulungsentsü kuli lir.

¹³Kechiyong nenoki kechi azüngtsü aser angazüktettsü akok, idakji alema onoki tanga kecha mezülur. Nenoki rajema angatettsü ta ni imlar.

¹⁴Kechiaser kechi koda asen Kibuba Yisu anogo nung nenokji onok asoshi tejak tenteta uluba alitsü; aji oda onokjia nenok asoshi tejak tenteta uluba alitsü ta nenoki tesadang ka angateta lir.

¹⁵Kechiaser ni ibai jangja-a meteta, nenok anasübu tepela angutsü asoshi ni nenok dangi tamasa arunüa liasü.

¹⁶Kechiyong ni Makedoniai aodang nenok semdangtsü, aser ni Makedonia nungi nenok dangi meyipa arutsü aser ni Yihuda limai nenok dangi meinokjangma.

¹⁷Anungji kodang ni ibai mulungtet, ni shisa melenshiba ta sayur ama? Mesüra ni “hau” aser “nunga” ta ashitsü ni kechi mulungtet aji shi amato mulungtet ama?

¹⁸Tsüngrem kechi koda ochishia lir, aji oda onok o nenok dangi hau aser nunga ta masü.

¹⁹Kechiaser Tsüngrem Chir Yisu Khrista shiba onoki, oda Silvana, Timoti aser ni nenok rongnung sayutsüngi, paji hau, ta aser nunga ta masü, saka pa dakbo teti dang hau ta lir.

²⁰Kechiaser Tsüngrem tenangzükbatem kwisüsa lidir, ajak Khrista dak hau ta lir. Anungji dang Tsüngrem sentsüwangshi atema onoki Khrista ajanga ‘Amen’ ta ashir.

²¹Ano shibai onok nenok den Khrista nung akangdaktsür aser asenok dak totzü mezütsü, pa Tsüngrem lir.

²²Ano pai asenok dak temaitsü neploktsü, aser asen temulung nung kuli asütsü Tanela agütsü.

²³Ni nenok indang bilema Korint-i maotsü lemtet. Tsüngremji kü kuli ama ni pa dang ayimtener aser pai kü mulungjang metet.

²⁴Onok nenok tamang madak kibur masü, saka onok nenok tepela asoshi teyaritepertem lir. Kechiaser nenoki tamang ka agi akang akanga noktaker.