Read njo 2 KORINT 11 Bible Online

2 KORINT 11 - njo bible

2 KORINT 11

¹Tamashi tila ka nung nenoki kü den aremzükdaktsünür.

²Kechiyong temeshi tenükshiba ka agi ni nenok nükshir, kechiaser nenok aiür tasüngtet kiyimla ka ama la kinungpu ka nem, oda Khrista nem agütsütsü asoshi ni nangzükogo.

³ Saka kechi koda peri pa tekülak tasa agi Eva külakoktsü, yamaji nenok Khrista nem tasüngtet aser chichiba bendanga agütsüba nungi nenok tebilembatem mashileni anir odaktsütsü ta ni tsübuseter.

⁴Kechiyong onoki sayutsüngiba Yisu dak alema kari arur tanga Yisu ka nenok dang sayutsüngira, mesüra nenoki agizükba tanela dang nungi tanela balaka agizükra, mesüra nenoki agizükadokba osangtajung dang nungi tanga Osang tajung balaka agizükra, nenoki mulungbena iba nemji bendanga agütsür akümer.

⁵Kechiyong item tematiba tenyartem dang nungi ni kecha nunga tekübokba masü ta ni bilemer.

⁶Aser ni tsüngro songa mejembitetaka, aji saka ni temetetba shisatsübo kar. Mapang ajak nung aser tia ajak nung onoki nenok nem aji jangja-a metetdaktsüogo.

⁷Nenok uludaktsütsü asoshi ni pei sasa tila küma, Tsüngrem Osangtajung angati nenok dang sayutsüngiba agi ni temenen mena asü?

⁸Nenok tenzüktsü asoshi ni tangar arogotem nungi teyari agizükba ajanga ni parnok nungi rakzükraktem asü?

⁹ Aser ni nenok den alidang anüngabonga liasü, saka shinga daka khu mebenloktsü, kechiyong kodang adianutem Makedonia nungi aru parnoki kü tenüngdaktsü agütsü. Aser ajak nung nenok dak khu benlokba nungi kü sasa sot aser yamaji sottsü.

¹⁰Khrista ochiba kü dak ali nung, Akaya lima temeket nung kü uluba shingaia manendaktsütsü.

¹¹Kechi asü nung ni ya ashir? Ni nenok dang memeimba agi asü? Tsüngremi meteter.

¹²Onoki inyakba ama kasaji parnokia inyakdagi ta shirnoki pei mapa nung asüküma ulur ibaji anendaktsütsü asoshi ni kechi inyaker aji ni maneni inyaktsü.

¹³Kechiyong ibala nisungtemji tiyazü tenyartem, shirnoki tekülak agi Khrista tenyartem chichiba amato melenshir sayur.

¹⁴Aser ibaji tesüngmangtsü mali, kechiyong Satani pei sasa tesangwa kotak tenyar ama melenteter.

¹⁵Anungji pa tenzükertemia pei sasa temeshiba tenzükertem ama melentetra, aji kecha tesüngmangtsü mali. Tatembang nung parnok mapa dak alang parnoki angutsü.

¹⁶Ni tanaben ashir, ni tamashi ta shingaia tebilem. Saka nenoki yamaji bilemaka, aji saka nia temulung tera ulutsüsa, ni tamashi ama agizükangma.

¹⁷Ni kechi ashir, aji Kibuba tashi nung ashir masü, saka iba asüküma temulung alemba nung tamashi pur kati ama ashir.

¹⁸Kechiyong aikati alima osettem indang asüküma ulu nungji nia uludi.

¹⁹Kechiyong nenok shisa akaba purtem asünung, nenoki pelashishia tamashi nisung dang aremzüker.

²⁰Kechiaser nisung kati nenok pa lar kümdaktsüra, mesüra nenok puokra, mesüra pai nenok mezüngmeshira, pai nenok tejak nung mara, pa dang nenoki aremzüker.

²¹Ni maksüaka shidi, iba asoshiji onok kanga tashi mait. Saka kari kechi atemasa asüküma ulunür, ni tamashi pur ka ama jembir, nia iba nungji asüküma uluteter.

²²Parnok Ibri nunger na? Nia to. Parnok Israel nunger na? Nia to. Parnok Abraham metsü na? Nia to.

²³Parnok Khrista tenzükertem na? Ni yiar ama jembir, parnok dang nungi tajungba tenzüker kaji ni lir! Ni tani-tebelem nung tali, tepuokba nung tali, aser mezüngdangteti tazükba nung, aiben dang tasür dang liasü.

²⁴ Yihuda nungeri punguben tashi, khen shia nung kü dak semer-tukubenben azük.

²⁵Asemben kü dak tazükba süng agi azük; khen lung agi aon, asemben ni rong raksaba nung liasü. Aonung ka anogo ka ni tzüyim nung liasü.

²⁶Aeni aoba nung aiben, ayong lendong nung, rakzükraktemer lendong nung, pei lima nisung lendong nung, tzüyim lendong nung, tiyazü adianutem lendong nung, Bendanger lendong nung, yimti lendong nung, arem lendong nung,

²⁷tebelem aser timtem nung, nükena aliba nung aiben, temokong aser mangsa nung.

²⁸Ni meshisemba timtem aika mezüngi arogotem asoshi anogo shia kü dak shisabuluba nungloka lir.

²⁹Shiba tashi mait, nia tashi mait masü no? Kodang kar temenen nung tsüker, idangji nia jashia akümer masü no?

³⁰Ni ulutsü tenüngdaktsü süra, ajangla ni kü mokokmin indang ulutsü.

³¹Ni tiyazü mejembir ta, teti temoatsüba Kibuba Yisu Tebu Tsüngremi meteter.

³² Damaska nung Areta chuba kübok aliba governori ni aputsü asoshi Damaska nunger yimti anük.

³³Saka kichiba ajanga ni molok nung atsüki atena ajungzüka ludaktsü aser pa ket nungi jentet.