Read njo 2 KORINT 12 Bible Online

2 KORINT 12 - njo bible

2 KORINT 12

¹Ni ulutsü tenüngdaktsü kar, saka iba nung tajangzük maka. Aji saka Kibuba jungkai adokbatem aser mangdangtem indang ni shidi.

²Ni Khrista nung nisung ka metet. Küm terpezü süia ogo, ibala nisung tasembuba kotak tashi ayipa atu, koba temang nung atalok mesüra temang nungi pila-a asü ni memetet, Tsüngremi dang metet.

³Aser ni metet oda iba nisungji Paradise tashi ayipa atu, oda temang nung asü, mesüra temang nungi pila-a asü ni memetet.

⁴Koda pa Paradise-i ayipa bener atu, aser nisungi mejembitettsü o koba nisungi jembitsü makok, aji pai angashi.

⁵Ibala nisung atema ni uludi. Saka ni pei atema kü mokokmin dak alema moululi.

⁶Kechiyong ni ulunü nunga idakji ni tamashi makümtsü, kechiaser ni ochiji jembitsü. Saka nisung kati kü dak kechi angur mesüra ni nungi kechi angashir, idakji alia pai kü indang ulua mebilemdaktsütsü asoshi ni kü sasa sota ayur.

⁷Aser jungkai adokbatem onsara nung iba jagi ni kanga alia moulutsü atema ni kangshitsü aser asüküma uluba nungi niji sottsü asoshi Satan tenyar ka, oda kü shi nung ai ka agütsü

⁸Aser ibai kü dak pila-a aotsü asoshi ni Kibuba dang asemben mepishi.

⁹Aser pai kü dang ashi, “Kü taochi na asoshi teperi, kechiaser kü ain mokokmin nung abensadaktsür.” Anungji Khrista ain kü dak alitsü asoshi ni kanga pelashishia kü mokokmin nunga uludi.

¹⁰Aji asü nung Khrista atema mokokmin nung, sensamasatsüba nung, talira timtema inyakba nung, rishikangshi aser lendongtem nung ni temulung chia alir. Kechiaser kodang ni tashi maitar idangji ni tashi aiter.

¹¹Ni tamashi kümogo; nenoki ni yamai kümdaktsü. Kechiaser ni nenok agi tenüng asangtsü tim liasü. Kechiaser ni kecha mesüaka, ni item tematiba tenyartem dang nungi tekübokba masü.

¹²Taremzükba ajak nung, temaitsütem, tesüngmangtsütem aser ain mapatem agi chichiba tenyar ka temaitsütem nenok rongnung inyakogo.

¹³Ni nenok nem khu mebenloktsüba dak alema tanga tanüngba arogotem dang nungi ni nenok dang kechi nungsa ajema miima ali? Iba tim masüba atema kü dang aochia tai tokangma.

¹⁴Tan agi tasembenbuba ni nenok dangi arutsü renema lir, aser ni nenok dak khu mebenloktsütsü; kechiyong ni nenok rongsen masü, saka nenok aginür.

¹⁵Nenok yaritsü asoshi ni akaba ajak oda kü taküm dena endoktsü ni pelashishia alitsü.

¹⁶Ni kü sasa nenok dak khu mebenloktsü ta nenoki metet. Saka nisung kari ni kanga tekülak ta nenok tiyazü sang nung pudaktsü.

¹⁷Nenok dangi osangbenertem kar yokba ajanga nenok agi ni tajangzük agia lir ma?

¹⁸Tita aser ni kasa tanela nung aser kasa jenjang nung meinyak no?

¹⁹Nenok madang onoki pei temeten o tesa jembir ta nenoki bilema liasü asü? Ajak agi nenok yangluloktsü asoshi onoki Khrista nung Tsüngrem tsüngdang jembia aruogo.

²⁰Kechiyong kodang ni arudir, nenok ni ngunüba ama mesüi ni nenokji angutsü ta, aser nia nenoki ngunüba ama mesüi nenoki angutsü ta ni tsübur. Ano o bangsentepba, tenükmeremba, ain adokba, pei asoshi dang bilemba, nüngsen o jembiba, nemnemshinemba, aser rongrongshishiba ni angutsü südi ta tsübur.

²¹Kodang ni tanaben arudir nenok madang kü Tsüngremi ni maksüa ludaktsütsü ta ni tsübur; aser tesüiba mapang nung shirnoki temenen mena aser shirnoki memerükba nüktapangta aser shi jabujariba nungi temulung memeyip “parnok aika atema ni mang ayimtsü südi.”