Read njo 2 KORINT 13 Bible Online

2 KORINT 13 - njo bible

2 KORINT 13

¹ Tan agi tasembenbuba ni nenok dangi arur. Kuli ana asem agi o ajak shitak renemtsü.

²Akhidang tai menabatem dang aser tangar ajak dang ni tamasa shiogo. Aser ni tanaben semdangdang ashiba ama, tang medenjungi ya ashir, ni ano arura, parnokji memerenshi-i malitsü.

³Kechiyong kü dak Khristai jembiba indang nenoki kuli aginür. Nenok dang benshiba nung pa tashi mait masü, saka pa nenok dak tashi tait lir.

⁴Kechiyong mokokmin nung pa kangki nung angenlok, aji saka Tsüngrem ain ajanga pa taküm lir. Kechiyong onoka pa dak tashi mait saka nenok dang benshiba nung Tsüngrem ain ajanga onok pa den taküm alitsü.

⁵Nenok tamang nung ali asü mali, nenok sasa tendangang. Mesüra Yisu Khrista nenok dak lir ta, nenoki nenok sasa memetet no? Aji mesüra nenok atangji memetetba pur lir.

⁶Onoki tamakok maludaktsü ta nenoki ajitettsü ta ni imlar.

⁷Onoki tamakok nguaka nenokibo tai kecha meinyaktsü aser tamakok mangutsü asoshi onoki Tsüngrem dang sarasademer.

⁸Kechiyong onoki ochiba anema kecha meinyakteter, saka ochiba asoshi dang inyakteter.

⁹Kechiyong kodang onok tashi maiter, saka nenok tashi aiter idangji onoki pelar. Aser nenok tabensaba asoshi onoki sarasademer.

¹⁰Aji asü nung tebensatsü asoshi masü, saka yangluloktsü asoshi koba bangdak tashi Kibubai kü nem agütsü iba tashiji ni nenok dangi arudang sashia mamshitsü asoshi nenok nungi pila-a alidang ni iba shiti zülur.

¹¹Tatem nung adianutem, salem no, nenok lenmangtem yanglushiang; kü temepishiba tenok tenoka angang. Kati ka den putepa liang, tesünep nung liang, aser temeim aser tesünep Tsüngrem nenok den alitsü,

¹²Temeshi temeim agi salem agütsütepang.

¹³Temeshipur ajaki nenok nem salem bendaktsür.

¹⁴Kibuba Yisu Khrista taochi, aser Tsüngrem temeim aser Tanela Temeshi tatenba nenok ajak den liang.