Read njo 2 KORINT 4 Bible Online

2 KORINT 4 - njo bible

2 KORINT 4

¹Atangji onoki Tsüngremer taochi anguba ama iba tenzükba aka nung, onoki temulung atema tezü tanga makümer.

²Miima akabatem aser maksütsü mapatem ajak onoki endokogo; tekülak agi onoki meinyaker mesüra Tsüngrem o aibelena onoki mamshir. Saka ochi tesangwa tabensaba agi onoki Tsüngrem madang pei taküm alir aser mulungsentsü tajung akabapur shia madang onoki pei ajungba indang kuli agütsütsü meranger.

³Kechiaser onoki sayutsüngiba Osangtajungji miimbanga ali nunga, shirnok samadagi parnok madang nungi aji miimbanga lir.

⁴Parnok atemajibo Tsüngrem mesükba Khrista shiba meyong sentsüwangshi Osangtajung tesangwaji parnok nem mungudaktsütsü atema mamangba purtem temulungjangji iba lima tsüngremi parnok tenük pokdaktsüogo.

⁵Kechiyong onoki pei indang sayutsüngir masü, saka Yisu Khristaji Kibuba lir ta sayutsüngir, aser Yisu atema onokji nenok tenzükertem lir ta sangoktsür.

⁶ “Ammang nungi tesangwa ayatsü” ta Tsüngrem shibai ashi, iba kasa Tsüngrem jagi Khrista tejak nung Tsüngremer sentsüwangshi temetetba shisatsü tesangwaji onok dangi bener arutsütsü asoshi onok temulungjang nung pei tesangwaji yaloktsüogo.

⁷Saka atendanga otetba ainji onok meyong masü, saka aji Tsüngrem meyong ta sayutsü asoshi iba senti rongsenji onok ali po nung rizünga kar.

⁸Ajaklen onok kangshi, saka mezükrep, ratamatadaktsü, saka teimla makai maküm,

⁹rishikangshidakjaka aji saka kodanga mesentok; zükaka saka kodanga mesamatsü.

¹⁰Yisu taküm onok temang nung jungkai adokdaktsütsü asoshi Yisu asüba teti onok temang nung bener jajar.

¹¹Kechiyong Yisu taküm onok tasütsüba shi nung jungkai adoktettsü asoshi onok shir taküm lir, Yisu atema tasüba nem teti bendanga agüja lir.

¹²Anungji tasübai onok dak inyakdagi, saka nenok dakbo takümi inyakdagi,

¹³ Pa akaba kasa tamangba tanelaji onok daka aka nung, zülua aliba ama, “Ni amang, anungji ni jembi; aji oda onokia amanger, anungji onoki jembir.”

¹⁴Aser shibai Kibuba Yisu shia arudaktsü, aser pa madang onok nenok den tendaktsütsü ta aji onoki metet.

¹⁵Kechiyong taochi tali tali aodang Tsüngrem sentsüwangshi tali arentsü, aser item ajakji nenok asoshi lir.

¹⁶Anungji onoki tezü matanger, onok temalen aliba nisung jenaka, onok telunglen aliba nisung kenüamati tasen kümshia lir.

¹⁷Kechiyong iba khen asoshi dang aliba timtem tekangshi tilaka onoki abenba jagi kecha dena medemdangtsü makokba tatem maka tuluba sentsüwangshi onok asoshi renemtsüdagi.

¹⁸Kechiyong onoki tanguba oset merepranger, saka manguba oset repranger. Kechiaser tanguba osetji kenpiga dang alir, saka manguba oset teti tatem maka alir.