Read njo 2 KORINT 5 Bible Online

2 KORINT 5 - njo bible

2 KORINT 5

¹Kechiyong alima nung onok talidak iba süki raksara, teka agi meyangluba aser teti tatem maka ki ka Tsüngrem nungi onok asoshi kotak nung lir ta onoki metet.

²Idaki alidang kotaker sükiji onok dak sü ama abendaktsütsü asoshi onoki yongyar aser anünger.

³Anungji ibaji abena aliba agi onok mangsa mungudaktsü.

⁴Kechiyong onok ano iba süki nung alidang tekangshiba khuret meteta onoki anünger; onoki onok ali temang ya endoknür ta masü, saka kechi tasütsüba lir, aji taküm nem meyokdaktsütsü asoshi onoki onok madak kotaker süji abendaktsünür.

⁵Tsüngrem shibai onok nem tenangzükba aketba kuli ama Tanelaji agüja lir, pa jagisa iba asoshi onoka renemtsütsü.

⁶Anungji onok teti tasü ita dang alir, onok iba ali temang kidang ali tashi nung onok Kibuba nungi pila-a lir.

⁷Kechiyong tanguba agi masü, saka tamang ajanga onoki jajar.

⁸Onok tasü ita dang alir, onoki iba ali temang nungi pilar Kibuba den kidang alitsü-ang onoki aginür.

⁹Anungji onok kidang liaka, mesüra meliaka pa mulung chidaktsütsü onok nükjidong lir.

¹⁰ Kechiaser nisung shia iba temang nung inyakba mapa yari tajung saka, tamajung saka angutsü asoshi asenok ajak Khristar obendangba madang jungkai adoktsüla.

¹¹Anungji Kibuba tsübubaji kechiar onoki metet nung onoki nisungtem mesüzüker. Saka onokji kechiar Tsüngremi meteta lir, aser yamaji nenok mulungjang nung onokji shir nenokia meteta alitsü ta ni imlar.

¹²Onoki tanaben nenok madang onok ajungba kuli sayutsü meranger masü, saka nisung kar shirnoki pei jaklaliro indang mesüi nisunger tema tereprangtsü indang asükümer, parnok nem nenoki telangzüba agütsütettsü asoshi, onok agi nenok nema kuli tajung ka agütsütsü meranger.

¹³Kechiyong onok yiar lira, aji Tsüngrem asoshi lir, onok mulungsentsü shitak dang lira, aji nenok asoshi lir.

¹⁴Kechiyong Khrista temeimi onok madak yimsü asür. Onoki ya chichia meteta lir, oda ajak asoshi ka asü; anungji ajak asü.

¹⁵Anungji shirnoki taküm alir, parnoki pei asoshi taküm malitsü, saka shibai parnok atema asü aser tasü nungi shia aru, pa asoshi dang taküm alitsü asoshi pa ajak asoshi asü.

¹⁶Anungji tang nungibo nisunger shi tebilemba amato nisung kaji onoki mezüngshir. Khen mapangbo nisunger shi tebilemba amato onoki Khristaji züngshia liasü, saka tangbo yamaji onoki mezüngshir.

¹⁷Anungji nisung kar Khrista dak lira, paji tasen poktetba, tejenbaji süiogo, ajiang tasenbaji aruogo.

¹⁸Aser teputepdaktsüba tenzükba mapaji onok nem agütsü, oda Tsüngrem shibai Khrista ajanga asenok pa den putepdaktsü, item ajak Tsüngrem nungi lir.

¹⁹Oda meimchir nem parnok tai benshiba mezüngshi-i meimchir pei sasa den putepdakja Tsüngrem Khrista nung liasü, aser teputeptsüba oji sayutsüngitsü onok nem agütsü.

²⁰Anungji onok Khrista asoshi o tongtartem lir. Aser Tsüngremi onok ajanga mepishir, Tsüngrem den putepa liang ta onoki Khrista tenüng nung nenok dang mepishir.

²¹Kechiaser Khrista nung asenokji Tsüngremer temeshibaji kümdaktsütsü asoshi temenen memetetsangji asenok asoshi pai temenen kümdaktsü.