Read njo 2 KORINT 7 Bible Online

2 KORINT 7 - njo bible

2 KORINT 7

¹Kü temeimbatem; item tenangzükbatem asenok aka nung, tanela aser temang menena kümdaktsüba kechisarena nungi asenoki pei sasa meshiteta lidi, aser asenoki Tsüngrem tsübuba nung temeshibaji tabensa kümdaktsüdi.

²Onok dangi nenok temulungjang lapokjang. Onoki shinga anema tai meinyak. Onoki shinga tamajung mekümdaktsü. Onoki shinga daka ambangyim mebenshi.

³Ni nenok aitsütsü ya ashir masü, kechiyong asenok külemi taküm alitsü aser külemi asütsüsa nenok onok temulung nung lir ta ni akhidang shiogo.

⁴Ni nenok dang temulung kanga ulua jembir, nenok atema ni kanga mezümeküma jembir. Onok timtem ajak nung ni tesünep agi sünga lir, ni tepela agi moshidaktsür.

⁵ Kechiyong kodang onoki Makedoniai aru, onok shi tesüngzük maka, saka onok ajaklen timatem; temalen raratepba aser telunglen tetsübu liasü.

⁶Aji saka ajemalurtem dang sünepdaktsüba Tsüngremi Tita arudaktsüba agi onok sünepdaktsü.

⁷Aser pa aruba agi dang masü, saka nenok yongyaba aser nenok jebtepba aser ni atema nenok jangraba pai onok dang ashiba agi aser nenok nungi koba tesünep pai angu aji agia Tsüngremi onok sünepdaktsü, anungji ni tali pelar.

⁸Kechiyong kü shiti agi nenok jashidaktsü nung, kü temulung ayanga liaka, aji saka tangbo mayanger. Kechiaser iba shiti yagi kenpiga dang nenok jashidaktsü ta ni angur.

⁹Tang ni pelar, nenok jashidaktsüba agi masü, saka tejashiba agi nenok temulung meyipdaktsüba asoshi ni pelar. Kechiyong nenoki onok agi kecha nunga tesama mangutsü asoshi Tsüngremi mulungba amato nenok jashidaktsü.

¹⁰Kechiyong Tsüngremi mulungba amato jashidaktsüba agi tanaben mesasatsüsa tekümtet asoshi temulung meyipdaktsür. Saka alima tejashibai tasüba adokdaktsür.

¹¹Kechiyong ibajisa ajiang, Tsüngremi mulungba amato nenok temulung nung koda saksalemdaktsü, koda tsübudaktsü, koda nenok sasa metendaktsü, koda jashidaktsü, koda tsübudaktsü, koda yongyadaktsü, koda merenshi! Iba o nung nenoki pei sasa ajak nung tai maka küma sayu.

¹²Anungji ni nenok dangi züluaka, shibai tai benshi pa asoshi masü, mesüra shibai tai mapa arem pa asoshi masü, saka onok asoshi nenoki jangraba Tsüngrem jakdang nenok jungkai adokdaktsütsü asoshi ni zülu.

¹³Aji asü nung onok sünepdaktsüogo aser onok tesünep akabaji dang masü, saka ano Tita pelaba yong onok tali pelar, kechiaser nenok ajaki pa sünepdaktsü.

¹⁴Kechiyong ni nenok indang pa dang langka ulua jembiba kara, ni makmesüdaktsü. Saka onoki kechi koda nenok dang o ajak atangji nung jembi, yamajisa onoki Tita danga ulua jembiba atangji ta angu.

¹⁵Aser nenok ajaki tashi angaba aser kechi koda nenoki tetsübu aser tatenten agi pa agizük, aji pai bilemtetdang, nenok dak pa temeim kanga tali lir.

¹⁶Ni nenok indang ajak nung kanga amang nung ni pelar.