Read njo 2 KORINT 8 Bible Online

2 KORINT 8 - njo bible

2 KORINT 8

¹ Ano adianutem, Tsüngrem taochi kechi Makedonia arogotem nem agütsü aji onoki nenok nem metetdaktsünür.

²Kechiyong kanga timtema tendangba nung parnok dak moshia aliba tepela aser parnok kanga sensakba nungjagi parnoki talubosa angati moshia agütsüba nungji aren.

³Kechiyong ni iba kuli agütsütsü akok oda parnok mulungsoa tenlaba asoshi parnok tashi den sütepa aser parnok tashi dak alia,

⁴temeshipurtem yariba mapa tajung nungji parnoki shilem agitsü mela-ang ta onok dang kanga mepishia parnoki agütsü.

⁵Aser ibaji onoki bilemba ama dang masü, saka parnoki tamasa parnok sasa Kibuba nem aser onok nem Tsüngremi mulungba ajanga bendanga agütsü.

⁶Anungji onoki Tita pai kechi koda iba mapa tenzük, aji oda nenok rongnung iba taochi renemtettsü yutsü.

⁷Saka tamang nung, jembiba nung, temetetba nung, nendaka temulung agütsüba nung, aser onok dang nenok temeim nung[1] nenoki kechi koda ajak nung aren, aji oda iba taochi mapa nung renangma.

⁸Ibaji ni ozüng agütsüba ama mejembir, saka tangar temulung agüja nentakba agi nenok temeim atangjiba tendanger.

⁹Kechiyong asen Kibuba Yisu Khrista takar liaka, aji saka pa sensakba agi nenok takar kümdaktsütsü asoshi pai nenok atema sensaker aküm. Iba Kibuba Yisu Khrista taochi nenoki metet.

¹⁰Aser iba indang ni kü tajungshiba yamai agütsür; oda koba küm ka tejaklen nenoki inyaktsü dang masü, saka mulungtetogo, ibaji nenok asoshi tamang renloktsü tajungtiba lir.

¹¹Aser nenoki kechi koda renemtsü mulunga liasü, yamaji nenok tashi yari mapa renema alitsü asoshi, tang iba inyakbajia renemang.

¹²Kechiyong tamasa mulungsoa lira, iba nung makaba yari masü, saka akaba yari pa tenla Tsüngrem tsüngdang agizüker.

¹³Kechiyong tangartem süngzüktsü aser nenok timtemtsü asoshi ni ya mashir.

¹⁴Saka sakuku akümba indang, tang nenok jenti akaba nungjagi parnok nüngdakji atalokja agütsütsüla. Ano iba jagi parnok jenti akaba nungjagi nenok nüngdakjia atalokdakja agütsütsü. Yamaji asüba jagi telok anaprongla sakuku yariteper.

¹⁵ Zülua aliba ama, “Shibai aika benden tali mali, aser shibai ishika benden meperi-i mali.”

¹⁶Saka Tsüngrem shibai nenok asoshi tejangraba tebilemba kasa Tita temulung nung yutsür, pa tenüng sangang.

¹⁷Kechiaser onoki ajungshiba agi dang pai aji agizük masü, saka pai pei sasa kanga jangra-a alinung pai pei mulung agi nenok dangi aru.

¹⁸Aser onoki pa den külemi adianu ka shiba pei osangtajung sayutsüngiba asoshi arogotem ajak nung nüngtugu lir pa yokogo.

¹⁹Aser aji dang masü saka Kibuba sentsüwangshi asoshi, aser onok teyaritepnüba sayutsü asoshi onoki bener aoba iba taochi mapa nung onok den külemi jajatsü asoshi paji arogotemi shimtetogo.

²⁰Ano koba talubosa agütsüba sempettem nung onoki ketdang asür iba nung shingaia onok nem tai magütsütettsü asoshi onoki kümdanger.

²¹ Kechiyong Kibuba madang dang masü, saka nisung madanga kechi tajung tetushitsü lir aji asoshi onoki nükjidong ayur.

²²Aser onok adianu shiba onoki aiben tendangogo, aser mapa aika nung mulungso tenentakbaji ajitet aser nenok dak pai tamang tulu katetba ajanga pai tali tali jangradagi, parnok den paji yokdagi.

²³Tita indang pa kü medemer aser nenok tenzükba nung külem teyariteper aser onok adianutem osang abenertem aser Khrista dangi sentsüwangshi bener arutsürtem.

²⁴Anungji arogotem tsüngdang nenoki parnok dang meimba kuli aser onoki nenok atema uluba kuli sayuangma.