Read njo GALATIA 1 Bible Online

GALATIA 1 - njo bible

GALATIA 1

¹Paul, tenyar ka, nisungi mesüra nisung ajanga masü, saka Yisu Khrista aser Tebu Tsüngrem ajanga lir, shibai pa tasü nungi shia arudaktsü.

²Aser kü den aliba adianutem ajak nungi Galatia arogotem dangi;

³asen Tebu Tsüngrem aser Kibuba Yisu Khrista nungi nenok dangi taochi aser tesünep sang.

⁴Pai asen Tebu Tsüngremi mulungba amato, tang aliba iba lima tamajung nungi asenok kümzüktsü asoshi asen temenentem atema pei sasa agütsü.

⁵Pa dang teti tatem maka sentsüwangshi sang. Amen.

⁶Khrista shibai pa taochi nung nenok aja, pa dak nungi pila-a tanga osangtajung dangi nenoki kanga yakta aenshia aoba meteta ni süngmanger.

⁷Ibai tanga osangtajung ka masü, saka nisung kari nenok timtemdaktsütsü asoshi Khrista Osangtajungji melenshidaktsüsü meranger.

⁸Saka onoki nenok dang sayutsüngiba osangtajung dak alema onoki süshia kotak nungi tenyar kati süshia tanga osangtajung ka sayutsüngira paji atakatem sang.

⁹Onoki tejaklen mezüng ashiba amato ni ano tanaben ashir, nenoki mezüng agizükba osangtajung dak alema tanga osangtajung ka nisung kari sayutsüngira paji atakatem sang.

¹⁰Kechiyong tang nisung mulung chidaktsütsü ni bushir asü? Mesüra Tsüngrem? Mesüra ni nisung peladaktsütsü meranger ama? Ni nisung peladaktsüra, ni Khrista lar masü.

¹¹Saka adianutem, ni sayutsüngiba osangtajungji nisunger osangtajung masü ta ni nenok dang shinür.

¹²Kechiyong nisung shinga nungia ni ya magizük, mesüra shingaia ya kü dang mesayu; saka Yisu Khrista ajanga ya kü dangi jungkai adok.

¹³ Kechiyong ni akhidang Yihuda yimsü nung koma taküm liasü; aser ni koda Tsüngremer arogo raksatsütsü kanga meranga aji rishikangshia liasü, iba indangji nenoki angashiogo;

¹⁴ aser kü tetsü-teboutem alemli otsü asoshi ni kanga jangra-a Yihuda yimsü amangba nung kü medemsortem rongnung ni takangba liasü.

¹⁵ Saka ni masodang nungi Tsüngrem shibai ni balaka shimteta aser pa taochi agi ni aja,

¹⁶pai pei Chir kü dangi jungkai adoka sayutsü mulunga liasü, aser aji agi pa indang Osangtajungji Bendangertem rongnung sayutsüngitettsü asoshi nisung shinga dena ni masüngdangtep.

¹⁷Mesüra ano kü dang tamasa nungi aliba tenyartem dangi ni Yirusalemi matu, saka ni ilunga Arabiai ao, aser tesü Damaskai meyipa aru.

¹⁸ Küm asem lir külen-ang Kefa den metetteptsü ni Yirusalemi atu, aser pa den anogo terpungunü amung,

¹⁹saka Kibuba tenu Yakob dak alema tenyartem rongnung tangar ka danga ni mangu.

²⁰Tang ni nenok dangi kechi zülu, item indang ajiang, Tsüngrem tsüngdang ni meyazür.

²¹Idangji ni Siria aser Kilikia temeket limai aru.

²²Aser Yihuda linük nung aliba Khristar arogotem den ni metettepa maliasü.

²³Parnoki ya dang angashia liasü, “Shibai asenok khen rishikangshia liasü pa jagi pai khen samatsütsü merangba tamangji sayutsüngidagi;”

²⁴aser ni asoshi parnoki Tsüngrem tenüng asang.