Read njo GALATIA 3 Bible Online

GALATIA 3 - njo bible

GALATIA 3

¹Oh nenok tamashi Galatia nungertem! Nenok kechi agi puadaktsü? Nenok shir jakdang Yisu Khrista kangki nung angenlokba shisang shisanga sayuogo;

²nenok nungi ni ya metetnür. Nenoki ozüng mapatem benshiba agi asü mesüra tamang ajanga angashiba agi nenoki Tanela agizük?

³Nenok yamai tamashi asü no? Nenoki Tanela nung tenzüker tang joko shi agi temdaktsür no?

⁴Nenoki amajok nung paikati kangshia aru no? Yamaji ataloka alinungbo itemji atangji amajok küma laluogo.

⁵Anungji shibai nenok nem Tanela agütsü aser nenok rongnung tesüngmangtsü sayatenyatem inyak, aji nenoki ozüng mapatem benshiba agi asü mesüra angashir amang nung pai aji inyak?

⁶ Oda, “Abrahami Tsüngrem dak amang aser aji pa asoshi temeshiba ta züngshi.”

⁷ Anungji shiri amanger parnok Abraham chirtem ta nenoki metetang.

⁸ Aser Tsüngremi Bendangertem tamang ajanga metendaktsütsü ta Laishibai akhidang ngua, Abraham dang tamasa Osangtajung sayutsüngia yamai ashi. “Na ajanga kin ajak moatsütsü.”

⁹Anungji shirnok dak tamang ali parnokji tamangtir Abraham den külemi moatsür.

¹⁰Kechiyong kwikati ozüng benshiba agi alir parnok ajak atakatem kübok alir. Kechiaser ya zülua lir, “Kwikati Ozüng kaket nung zülua aliba ajak tashi anga-a mebenshir parnok atakatem lir.”

¹¹Saka ozüng agi Tsüngrem tsüngdang shinga memetendaktsür ta meteta lir. Kechiyong tamang agi temeshipur taküm alitsü.

¹²Saka ozüngji tamang dak metaloka mali, saka Lai nung ashir, “Nisung shibai ozüng mapatem tashi anga-a inyaker item jagi pa taküm alitsü.”

¹³Khristai asenok ozüng atakatem nungi kümzüktsü meji pa atakatemba ka aküm, ya zülua lir; “Shirsa süngdong nung meta, parnok atakatem sang.”

¹⁴Pai asenok kümzük, kechiyong Abraham nem agütsüba temoatsüji Khrista Yisu ajanga Bendangertem dangi arutsü, anungji tanela tenangzükbaji asen tamang ajanga dang agizüktettsü.

¹⁵Adianutem, ni nisunger tatishitsü ka shinür. Kodang nisunger tsüngda nung tezüngzüktepba ka ayur, aji akangteper külenbo, shingaia aji amajok mekümdaktsür mesüra talia mebendenloker.

¹⁶Tang Tsüngremi Abraham aser pa metsü den tenangzükbatem yanglu. “Aser Laishibai pa metsütem dang” ta mashir koba tetezü nisung aika, saka iba jagi, “Ne metsü dang” ta ashir, koba tetezü nisung ka shiba Khrista lir.

¹⁷ Aser ni ya ashir; Tsüngremi tezüngzüktepba akhidang akangdaktsür külen küm noklang pezü ser semer renteter, aruba ozüng agi aji mesamadaktsür, mesüra tenangzükbaji ozüng agi amajok makümer.

¹⁸ Kechiyong ozüngji senmang agi süra, aji ano tenangzükba agi masü, saka aji Tsüngremi tenangzükba agi Abraham nem agütsüogo.

¹⁹Ajangla ozüngji kechiba aru? Koba metsü dang tenangzükbaji agüja jembi, pa maru tashi, tai benshi nung ozüngji agütsü; aser ibaji kotak tenyartem ajanga tetsüngdai aiba teka agi renemdaktsü.

²⁰Saka nisung ka dang alidakjibo tetsüngdai air ka tenüngdaktsü maka. Aser Tsüngremji ka dang lir.

²¹Ajangla ozüngji Tsüngremer tenangzükbatem anema ali asü? Yamaji kodanga masü. Kechiyong nisung nem taküm agütsütettsüsa ozüngji ali asübo, iba ozüng jagi temeshiba adokdaktsür lila

²²Saka Yisu Khrista dak tamang ayurtem nem kechi tenangzükba agüja ali, ibaji shirisa amanger parnok nem agütsütsü asoshi alima ajongaji temenen kübok puoka lir ta Laishibai metetdaktsür.

²³Tamang marudang, oda tamangji jungkai madokdaktsü tashi asenokji ozüng kübok puoka liasü.

²⁴Anungji tamang agi asenok metendaktsütsü asoshi Khrista dangi anitsü ozüngji asen leniba küma liasü.

²⁵Saka tang tamang aru nung, asenok joko ozüng leniba kübok mali.

²⁶Kechiyong Khrista dak tamang akaba ajanga nenok ajak Tsüngrem chirtem lir.

²⁷Kechiyong nenok shirsa Khrista nung baptiogo, nenok Khrista dak sübuogo.

²⁸Yihuda nungera masü Grik nungera masü, alara masü, nüjia masü, tebura masü, tetsüra masü, kechiyong nenok ajak Khrista Yisu nung ka dang lir.

²⁹ Aser nenok Khrista nübur süra, ajangla nenok Abraham semchirtem lir aser tenangzükba amato nenok senmangertem lir.