Read njo GALATIA 4 Bible Online

GALATIA 4 - njo bible

GALATIA 4

¹Ni shinübaji ya, senmangerji rongsen ajonga madak kibur liaka, pa tanur asüdangbo pa alar dang nungi kecha balaka masü.

²Saka tebui süktettsüba anogoji matong tashi paji anebalurtem aser ketdangpurtem kübok alir.

³Aji oda asenok kodang tanur liasü asenoka alima amato tanelatem kübok alar küma liasü.

⁴Saka kodang tabensaba mapangji aru, tetsür ka agi asoba, aser ozüng kübok asoba oda Tsüngremi pei Chir yok.

⁵ Oda ozüng kübok alirtemji alangzüktsü asoshi aser Tsüngrem chirtem kümdaktsüba agizüktsü asoshi,

⁶aser nenok pa chirtem asünung, aji sayutsü asoshi Tsüngremi pa Chir Tanela asenok mulungjangi yok, aser iba Tanelai “Aba, Oba” ta ayimtener.

⁷Anungji na joko alar ama masü, saka techir lir aser techir ka süra Tsüngremi na pa senmanger kümdakja lir.

⁸Taoba mapang nung kodang nenoki Tsüngrem memeteti liasü, idangji shir yimya agi tsüngremtem masü, parnok kübok nenok alar ama liasü.

⁹Saka tang nenoki Tsüngrem meteta akümdang, mesüra oda Tsüngremi nenok meteta akümdang kodaser item tashi mait atamata tanelatem dangi meyipa or külen parnok kübok nenoki tanaben alar ama küma linür?

¹⁰Nenoki anogotem, ita tsüngkhüm mongpu aser küm, item kar nung anemponga amunger.

¹¹Nenok asoshi ni kechi mapa inyak aji amajok nung inyak asü ta, ni nenok asoshi shisa bulua bilemer.

¹²Adianutem, ni ama kümang ta ni mepishir, kechiaser nia nenok ama küma lir. Nenoki kü dak tai kecha meinyak.

¹³Ni temang nung mokokmin asünung, ni tamasa nenok dang osangtajung sayutsüngi ta nenoki metet.

¹⁴Aser kü tiaji nenok madang tetendangba ka saka, nenoki ni matala mesüra mesensatsü, saka niji Tsüngrem tenyar ka ama oda Khrista Yisu ama nenoki agizük.

¹⁵Tang nenok tepela to kechi aküm? Kechiyong akok asübo, nenoki nenok tenüktem arokteta itemji kü nem agütsütsü mulunga liasü ta ni kuli asür.

¹⁶Anungji ni nenok dang ochi ashi nung, ni nenok tsükchir aküm asü?

¹⁷Item tangar nisungtem jagi nenok dak temulung kanga agüja sayur. Saka parnok nükjidongji tajung masü; nenok dang parnoki inyakba amaji parnok tsütsü nenokia aria bilema aitdaktsütsü asoshi, parnoki aginübaji oda nenokji onok nungi piladaktsütsü asoshi dang lir.

¹⁸Aser ni nenok den alidang dang masü nükjidong tajung asoshi tangartem atema teti temulung agütsütsüji junger.

¹⁹Kü temeimba tila tanurtem, nenok dak Khristaji madoktet tashi tetsür nuso kangshiba ama ni nenok asoshi tanaben kangshir.

²⁰Nenok tsütsü kü yimyayimpong ni balaka melenshitsü asoshi ni tang mapang nunga nenok rongnung dena alia ta dang sünüali. Kechiaser nenok indang ni kanga shisa bulua ratar.

²¹Nenok ozüng kübok linürtem, kü dang shiangjo, nenoki ozüngji mangali ma?

²²Kechiyong ya zülua lir, Abraham techir ana liasü, alar-tsür agi asoba ka aser nüjitsür agi asoba ka.

²³Saka alartsüri asobaji shi amato aso aser nüjitsüri asobaji tenangzükba ajanga aso.

²⁴Item tetezü o kar, tetsür ana jagi tezüngzüktepba o ana sayur; ka Sinai tenem nungi arur aser alar tanur asor.

²⁵Ibaji Hagar, aser iba Hagarji Arabia nung aliba Sinai tenem lir, aser aji tang aliba Yirusalem yimti tatishitsü lir, kechiyong la pei chirtem den külemi alar tia nung lir.

²⁶Saka temalen aliba Yirusalemji nüji tatishitsü lir. Ibaji asen tetsü.

²⁷ Kechiyong ya zülua lir: “Na tapungla aser tanur masola pela-a liang, Na nuso ashitsü matula, ola agüjang aser ayimtenang. Kechiyong kinungpu aliba tsür dangbo, kija alir tsür tanur tali lir.”

²⁸Aser adianutem, Isak amato asenok tenangzükba chirtem lir.

²⁹Saka alemli kechi koda shi amato asoba tanuri Tanela agi asoba tanur rishikangshi yamaji tanga lir.

³⁰Saka Laishibai kechi ashir? “Alartsür aser la chirji endokang. Kechiyong alartsür chiri nüjitsür chir den senmang mamangtsü.”

³¹Anungji adianutem, asenok alar-tsür chirtem masü, saka nüji-tsür chirtem lir.