Read njo GALATIA 5 Bible Online

GALATIA 5 - njo bible

GALATIA 5

¹Nüjiba asoshi Khristai asenok nüji kümdaktsüogo. Anungji akang akanga noktakang aser joko tanaben alar tapuba süngra nung tapu.

²Kü otemji ajiang, nenok temejeptokertem kümra, Khrista agi nenok tajangzük maka ta ni Pauli nenok dang ashir.

³Aser temejeptokba shia dang, pai ozüng yimsü ajak benshitsü pa sentsüh tsüa lir ta ni tanaben kuli agütsür.

⁴Nenok ozüng agi metendaktsütsü merangertem Khrista nungi pila-a lir; taochi nungi nenok tsüka lir.

⁵Kechiyong tamang agi tanela ajanga asenoki temeshiba teimla asoshi ata-a alir.

⁶Kechiyong Khrista Yisu nung temejeptokba süshia aser memejeptokba süshia kecha jenjang balaka mali; saka temeim ajanga tamangi mapa inyakbaji dang tongtibang lir.

⁷Nenoki jungjunga asemya liasü, nenoki ochibaji tashi mangadaktsütsüsa shibai nenok songtem?

⁸Shibai nenok aja, pa nungi iba ama temesüzükba maru.

⁹ Piyazü tila ka agi am rangben pokraka atudaktsür.

¹⁰Nenoki kü tebilemba tashi angaba dang nungi tanga tebilemba indang kecha mebilemtsüla ta ni tamang kanga akar. Saka shibai nenok nem timtem agütsür paji shibasa südir sang pai obendangbaji angutsü.

¹¹Saka adianutem, temejeptoktsüba indang ni ano sayutsüngira, ni kechiba ano rishikangshitsü? Yamaji inyak asübo ni kangki indang sayutsüngiba nungi timtem melila.

¹²Shiri nenok ratadaktsür, ni parnok pei sasa meshimeshia rangtokdaktsünür.

¹³Adianutem, nüjiba asoshi nenok aja, saka iba nüjibaji nenok shi inyaknülen inyaktsü asoshi dang tamshima, saka temeim agi kati ka den tenzüktepang.

¹⁴ Kechiyong o ka nung ozüng ajak ataloker, iba oji ya: “Nai ne kiyonger dang pei ama meimang.”

¹⁵Saka nenoki shiruru ama kati ka den tepu agi nguteper aser chiteper süra kati ka mechimatsü kümdangang.

¹⁶Saka nenoki Tanela agi jaja-ang, aser shi tejangrabatemji tatalokdaktsüma.

¹⁷ Kechiaser shi tejangrabaji Tanela anema lir, kechiyong iba anaji kati ka anema lir. Anungji nenoki inyaknübaji nenoki meinyakteter.

¹⁸Saka nenok Tanela nem anitaktsüra, nenok ozüng kübok mali.

¹⁹Saka shi mapatem jungkai adoka lir, itemji ya: nüktapangta, memerükba, jabujariba.

²⁰Süngyanglu külemba, arasenba, tsükchitep, rarabangsen, nükmerem, mit adokba, pei ajung dang asaba, obang mapu, lemsatepba,

²¹tenükshiba tepsetba, yi mesepba, kimakba aser yamala. Shiri ibala benshidir parnoki Tsüngrem Yimli senmang mangutsü ta ni kechi koda nenok tejaklen kümdangdaktsü yamaji tanga ni nenok kümdangdaktsür.

²²Saka Tanela tejang itemi: temeim, tepela tesünep, taremzük, kümli tajung, tejungnü, temulung lemtetba,

²³ajemaluba, pei sasa azüokba. Item anema tanga ozüng kecha mali.

²⁴Aser shir Khrista Yisu nüburtem lir, parnoki shi-azü taginüba aser tejangrabatem kangki nung angenlokogo.

²⁵Tanela agi asenok taküm lira, asenoki Tanela agi ano jajadi.

²⁶Asenoki kati ka mejashidaktsüli mesüra mokokaji melidaktsüli, mesüra tiak mesangli.