Read njo GALATIA 6 Bible Online

GALATIA 6 - njo bible

GALATIA 6

¹Adianutem, nisung ka langka tai nung pura, nenok shir Tanela taküm jenjang nung lir, nenoki iba nisungji ajemaluba tanela nung melenshidakjangma. Nenok matitang daktsütsüsa nenok pei sasa tendangang.

²Kati ka den khu bentepang, aser aji oda Khrista ozüng atalokdakjang.

³Kechiyong nisung kati kodang pa kecha masü sürnung paji langka ta bilemer, pai pei sasa külakoktsür.

⁴Saka nisung shiai pei mapa tendangang, idangji pi indang masü, pai pei indang dang tenüngsang angutsü.

⁵Kechiyong nisung shiai pei khu abentsüla.

⁶Saka shiba dang ochi sayua lir pai oset tajung ajak tesayur den lem satepang.

⁷Tekülakokdaktsü, Tsüngremji mezüngmeshi tesü. Kechiyong kechisa nisungi prokdir ajisa pai meyipa arutsü.

⁸Shibai pei shi nung prokdir, pai shi nungi tesamaba angutsü, saka shibai Tanela nung prokdir, Tanela nung teti taküm angutsü.

⁹Aser asenoki tajung inyakba nung melakli, kechiyong asenoki temulung makai mekümra, mapang shitak nung arutsü.

¹⁰Anungji asenoki mapang ajak nung inyaklen lira, nisung ajak asoshi aser tongtibangsa tamangertem asoshi tajung inyakdi.

¹¹Koda zülujang tulu agi kü ket agi ni nenok dangi zülur, aji reprangang.

¹²Kwikati shi nung ulunür, parnoki nenok mejeptokdaktsütsü meranger, saka Khrista kangki atema parnoki rishikangshi mangutsü asoshi dang aji inyaker.

¹³Ano shir temejeptokba akümer, parnoki pei sasa ozüng mebenshir. Saka nenok shi nung ulutsü asoshi parnoki nenokji mejeptokdaktsünür.

¹⁴Saka asen Kibuba Yisu Khrista kangki, koba ajanga kü tsütsü alima aser alima tsütsü ni kangki nung metaogo, iba kangki dak alema ni kecha nunga moulutsü Tsüngremi nungtemang.

¹⁵Kechiyong nisung tasen akümba dak alema temejeptokba süshia, memejeptokba süshia kecha mali.

¹⁶Aser kwikati iba ozüng agi jajadir, Tsüngremer tesünep aser yimlibilem parnok den aser Israel pur ajak madak liang.

¹⁷Tang nungi shingaia ni timtetemdaktsü kechiyong ni kü mang nung Yisu taraktem abener.

¹⁸Adianutem, asen Kibuba Yisu Khrista taochi nenok tanela den liang. Amen.