Read njo EFESA 2 Bible Online

EFESA 2 - njo bible

EFESA 2

¹Ozüng raksabatem aser temenentem ajanga tasü lia, pai nenok taküm kümdaktsü.

²Nenoki iba lima putu amato jaja, nenoki anüng tom mopung aliba chuba tashi kübok nenoki tashi anga-a liasü, koba tanelai tashi mangaba chirtem madak yimsü asür.

³Khen mapang nenok ajaki asen shi jangrabatem nung parnok amaji liasü, aser asen temang shi o aser temulungjangi mulungba benshia liasü. Aser tangar tanüngbatem ama asenoka yimya agi ain adokba chirtem liasü.

⁴Saka Tsüngrem shiba yimlibilem nung takar pa temeim tulu ajanga, pai asenok dang meim nung,

⁵asen aibelenba temenentem ajanga asenok tasü liaka, pai asenok Khrista den taküm kümdaktsü; kechiyong Tsüngrem taochi agi asenok kümzükogo.

⁶Pai asenok Pa den shia arudaktsü aser Khrista den külemi kotaker lima nung pai asenok mendaktsü.

⁷Tarutsü nung pai pa taochi talubosa moshia aliba Khrista Yisu nung asenok dang kümli tajung agi sayutsü asoshi pai ya inyak.

⁸Kechiyong taochi agi tamang ajanga nenok kümzükogo; aser aji nenok pei sasai inyakba agi masü, saka aji Tsüngrem sempet.

⁹Shingaia asüküma moulutsü asoshi aji mapa agi masü.

¹⁰Kechiaser pa teyangluba mapaji asenok, aser koba mapa tajung nung asenoki jajatsü Tsüngremi alemli renem, iba mapa tajung asoshi Khrista Yisu nung asenok yangluogo.

¹¹Anungji teka agi shi nung adokdaktsütsüba temejeptokbapuri nenok dang memejeptokbapur shi nung Bendangertem ta akhidang ajabaji nenoki bilemtetangma.

¹²Iba mapang nungji nenok Khrista nungi pila-a liasü, nenok Israel nunger kin senso masü, tenangzükba tezüngzükbatem nungi pila-a aenertem, teimla maka, aser Tsüngrem medeni alima nung liasü ta bilemtetang.

¹³Nenok shir alemli talangka pila-a or liasü, saka tangbo Khrista zü nung kanga anasa anir arua lir.

¹⁴Kechiyong Khrista shibai Pa shi raksaba ajanga anemtepba jara raksaja asenok ka küma lungjemdaktsü, paji asen yimjung.

¹⁵ Pai pei dak anaji tasen nisung ka kümdaktsütsü asoshi; parnok tsükchitepa, oda yimsü nung aliba ozüng agi melaba, pai pei shi nung anendakja yimjung adokdaktsü.

¹⁶ Aser aji agi pai tsükchitepba tepseter, kangki ajanga temang ka nung anaji Tsüngrem den putepdaktsü.

¹⁷ Aser pai arua nenok talang nung alirtem anaprongla dang yimjung sayutsüngi.

¹⁸Kechiyong pa ajanga asenok anaprongla Tanela ka nung Tebu dangi arudaktsüba kar.

¹⁹Anungji joko nenok aener aser yimjeni aruba nisung masü, saka temeshipurtem den nenok yimsopur aser Tsüngremer kinunger.

²⁰Nenok tenyartem aser ainkartem tazüngdak manung yanglu aser Khrista pa sasa kinük lung tongtiba lir.

²¹Pa dak ki ajak shitak sütep sütepa yanglua, Kibuba nung temeshi tenla ki küma indaktsür;

²²aser Tanela nung Tsüngrem talidak ki alitsü asoshi pa dak nenoka sütep sütepa yangluloker.