Read njo EFESA 3 Bible Online

EFESA 3 - njo bible

EFESA 3

¹Aji asünung, ni Paul, nenok Bendangertem asoshi Khrista Yisu meyong tepuokba,

²Tsüngrem taochi ketdangsüba mapa koba nenok asoshi kü nem agüja lir; iba indang nenoki atangji angashia lira;

³koba jungkai adokba o agi miim oji kü dang metetdaktsü, aji ni o ishika agi akhidang züluogo.

⁴ Aser kodang nenoki aji züngdir Khrista miim o ni angazükbaji nenoki angatettsü.

⁵Iba miim oji tang Tanela nung pai temeshi tenyartem aser ainkartem dang jungkai adokba ama tanga putu nung nisung chirtem dang memetetdaktsüi liasü.

⁶Aser iba miim oji ya, oda Osangtajung ajanga Khrista Yisu nung Bendangertem asenok den senmangertem, aser temang kasa nung adenertem aser tenangzükba kasa agizükertemji lir.

⁷Iba Osangtajung asoshi Tsüngrem aini inyakba amato kü nem agütsüba Tsüngrem taochi agi ni tenzüker aküm.

⁸Khrista meyong mangatetba rongsen Bendangertem dang sayutsüngitsü temeshipur ajak rongnung tilatiba dang nungia tilatiba ni, kü nem iba taochi agütsüogo.

⁹Aser Tsüngrem shibai oset ajak yanglu, Pa dak koba miim o putu aika miimbanga liasü, aji ketdangsüba o nisung ajak nem ngudaktsütsü asoshi,

¹⁰aser Tsüngrem teti tatem maka nükjidong amato, koba pai asen Kibuba Yisu Khrista nung mulungtet;

¹¹pa shisatsü tulu tang arogo ajanga kotak talidak nung yimsüsürtem aser bangdaktem dang metetdaktsütsü asoshi, kü nem iba taochi agütsü.

¹²Khrista nung pa dak asen tamang ajanga asenok kanga teimla agi tasü taitba aser Tsüngrem dangi arudaktsüba asenok kar.

¹³Anungji nenok atema kü timtem tekangshi, koba nenok sentsüwangshi lir, item indang nenok tashi maitba teküm ta ni mepishir.

¹⁴Aji asünung ni Tebu madang temokok agi apudaker.

¹⁵Shiba nungi par kibong ajak tenüng Kotak nung aser alima nung agüja lir,

¹⁶Pa sentsüwangshi rongsen amato, pa Tanela ajanga nenok taküm telunglen tanela nung pa ain agi nenok tashi itdaktsütsü asoshi,

¹⁷tamang ajanga nenok temulung nung Khrista litettsü asoshi nenok temeim nung tera yanga akang akanga noktaker.

¹⁸Nenoki temeshipur ajak den lenten aser metong, tema aser tarok kechisa lir, aji angazüktettsü asoshi,

¹⁹aser temetetba ajak dang Khrista temeim metettsü asoshi, Tsüngrem tabensaba ajak agi nenok asüngtsü asoshi, ni Tebu dang sarasademer.

²⁰Tang asenok dak inyakba ain amato, shibai asenoki asüngdangba aser bilemba ajak dang nungi kanga agi tali inyaktsü akoker.

²¹Pa dang arogo nung aser Khrista Yisu nung sentsüngwangshi putu ajak nung teti liang! Amen.