Read njo EFESA 4 Bible Online

EFESA 4 - njo bible

EFESA 4

¹Ni Kibuba nung tepuokbai koba tajaba agi nenok aja, iba tajaba temsüa nenoki alitsü mepishir,

² Ajemaluba aser tesüngjem agi, aremzükba agi, temeim nung kati ka den azüzüktepang,

³Tanela telungjem wazüka yutettsü asoshi tesünep ajanga alentepdaktsütsü.

⁴Temang ka aser Tanela ka lir. Oda nenoka nenok ajaba teimla ka nung aja;

⁵Kibuba ka, tamang ka, baptiba ka,

⁶asen ajak Tsüngrem aser Tebu ka, Pa ajak madak, aser ajak ajanga aser ajak nung lir.

⁷Saka Khrista sempet tatakzük yari asenok shia nem taochi agütsü.

⁸ Anungji pai ashi, “Kodang pa azükleni atu, pai tepuokbatem ania puok, Aser nisungtem nem sempet agütsü.”

⁹Tang pa alima teküboki malui lira, iba o, pai atu tetezü kechi?

¹⁰Pai ajak süngtsütsü asoshi talubaji aser kotak ajak temaleni atubaji kasa lir.

¹¹Pai pa sempet, oda kar tenyar asütsü, kar ainkar, kar sayutsüngir, kar pastor, aser kar tesayur asütsü agütsü.

¹²Aser tenzükba mapa asoshi temeshipurtem renemteta sobutsütsü asoshi, aser Khrista temangji yangluloktsü asoshi;

¹³asenok ajak tamang telungjem aser Tsüngrem Chir metetba shisatsü kasasa tongteta maküm tashi, aser nisung tain maküm, tashi, aser Khrista tabensaba temang tasazük tongteta maküm tashi,

¹⁴Asenok joko tanur ama malitsü, mesüra tesayuba mopung shia agi meinzütsü, mesüra nisung tekülak aser sangrasangji agi aser aibelena tiyazü sayuba agi ona oli aruli ta masütsü;

¹⁵saka temeim nung ochi jembia ajak nung pa dak asenok aintsü, paji tekolak, oda Khrista;

¹⁶ aser pa dak nungi temang ajak sütep-sütepa alenteper teloktep shiai agütsüba agi, tenüktelen shia pei mapa inyakba amato temangji pei sasa temeim nung ina tain kümdaktsür.

¹⁷Aji asünung Bendangertem pei temulung uluba nung jajaba ama asenoki joko mejajatsü asoshi ni ya ashir, aser Kibuba nung kuli agütsür.

¹⁸Parnok pei dak memetetba alinung, aser parnok pei temulung merang nung, parnok tangatetba tammang küma Tsüngrem taküm nungi parnok pila-a liasü.

¹⁹Parnok pezüpezüa küma, kanga jangraba agi memerükba ajak benshitsü asoshi pei sasa jabujariba nem agütsü.

²⁰Saka nenoki aji oda Khristaji magizük,

²¹oda nenoki atangji pa indang angazüka lira, aser Yisu dak aliba ochiba amato pa dak nenokji sayua lira;

²² nenok akhidang lia aruba taküm yimya tejenba nung, külakokja raksatsütsü tejangraba liasü, aji endokang.

²³Aser nenok temulung nung tasen küma,

²⁴ nisung tasen, shiba Tsüngrem mesükba nung ochiba, tajungba aser temeshiba nung yangluogo aji semokang.

²⁵ Anungji tiyazü jembiba endokang, nisung shia pei kiyonger den ochi jembiang. Kechiaser temang ka nung asenok tenük-telen ka ka lir.

²⁶Ain adoka temenen tebenshi. Ne ain adokba manung anü teludaktsü.

²⁷Mesüra mojing nem talidak tagütsü.

²⁸Shibai auya-a liasü, pai joko tauya, saka tenüngdaktsü akaba nisung nem agütsütsü alitsü asoshi, pai pei teka agi kechi mapa tajung, aji inyakang.

²⁹Nenok tebang nungi o tamajung ka danga tatokdaktsü. Saka tenüngdaktsü amato kechi yangluloktsü asoshi tajung lir, tangashirtem nem taochi agütsütsü aji jembiang.

³⁰Aser Tsüngrem Tanela Temeshi, shiba dak tekümzüktsüba anogo asoshi nenok temaitsü ajen, pa tejashidaktsü.

³¹Takuba ajak, ain adokba aser terasaba, rongrongba, sensatsüba aser sempaba ajak nenok temulung nungi piladakjang.

³² Aser kati ka den meimtepa jungtepa liang. Aser kechi koda Tsüngremi Khrista nung nenok tai atok, yamaji nenokia kati ka dang tai toktepang.