Read njo EFESA 5 Bible Online

EFESA 5 - njo bible

EFESA 5

¹Nenok temeimba chirtem amato nenoki Tsüngrem jilu ajizükang.

² Aser Khristai kechi koda nenok meim aser teronem tanang atema tenla ama Tsüngrem nem asenok asoshi pei sasa bendanga agütsü, yamaji nenoki temeim nung jajang.

³Saka temeshipur rongnung tetemsü ama, nenok rongnung nüktapangta aser memerükba ajak, mesüra tenükmeremba kecha tetetshidaktsü.

⁴Mesüra tamajung aser tamashi jembiba mesüra salepsari, koba tim masü, aji tetetshidaktsü; saka itemji melena tenüngsang agüjang.

⁵Kechiyong nüktapangtar mesüra memerükba nisung, mesüra tenükshiba nisung, shiba süngyanglu külemer lir, item rongnung shingaia Khrista aser Tsüngrem Yimli nung senmang mangur ta nenoki atangji metet.

⁶Shinga nema o amajok agi nenok tekülakokdaktsü, kechiyong item asoshi tashi mangaba chirtem dak Tsüngrem ain adokbaji arur.

⁷Anungji nenoki parnok den telemsateper teküm ma.

⁸Akhidang nenok khenyongi tammang nung liasü, saka tang nenok Kibuba nung tesangwa lir. Anungji tesangwa chirtem ama jaja-ang.

⁹Kechiyong tesangwa[1] süngjangji tajungba, temeshiba, aser ochiba item ajak nung angur.

¹⁰Aser Kibuba madang kechi tajung tagizüktettsü lir aji tendangang.

¹¹Aser tejang matangba ammang mapatem den temedem. Nenoki itemji odia nungtetja sayuang.

¹²Kechiyong parnoki kibok nung miimshia inyakba mapatem indang jembitsüjia koda taktsü lir.

¹³Saka kodang tesangwai kechisa jungkai adoktsür aji ngua akümer.

¹⁴Kechiaser kechisarena ngudakja jungkai adokdaktsübaji tesangwa lir. Anungji ya shia lir, “Oh mejanga alisang, na sakang, tasüba nungi shia arung, aser Khristai ne madak sangwatsü.”

¹⁵Anungji nenok koda jajar kümdanga reprangang, shisa makaba ama masü, saka shisa akaba ama jaja-ang.

¹⁶ Mapang tajung ajak alangzükang, kechiyong anogotem tamajung lir.

¹⁷Anungji tamashir tesü, saka Kibubai mulungba kechi lir aji angatetang.

¹⁸Aser yi koba nung teraratsü lir, aji agi temesep ma, saka Tanela agi sünga liang.

¹⁹ Tenüngsang ken, Osangtajung ken, aser tanela kentem agi kati ka den jembitepang aser kensü ola tajung nenok mulungjang nungi adoka Kibuba dang tenang.

²⁰Teti Tebu Tsüngrem dang asen Kibuba Yisu Khrista tenüng nung ajak asoshi tenüng sangang.

²¹Khrista tsübuba nung nenok pei sasa kati ka kübok liang.

²² Kinungtsütem, Kibuba dang ama pei kinungpurtem kübok liang.

²³Kechiyong kechi koda Khrista pa sasa temang kümtetdakba lia, arogo tekolak lir, aji oda kinungpuji kinungtsü tekolak lir.

²⁴Saka kechi koda arogoji Khrista kübok lir, aji oda kinungtsüji ajak nung pei kinungpu kübok liang.

²⁵ Kinungputem, Khristai arogo dang meim aser pei sasa iba asoshi bendanga agütsü, aji oda kinungpuri pei kinungtsür dang meimang.

²⁶Khristai arogoji Tsüngrem O nung tzü chiguba agi merükdakja meshitettsütsü asoshi,

²⁷arogoji pungmen süshia, kangtenba süshia ibala kecha makai temeshi aser tai makai litettsü, pai iba sentsüwangshi arogo pei nem agütsütsü asoshi,

²⁸Kinungpuri pei mang meim ama kinungtsür dang meimtsü tim. Shibai pei kinungtsür dang meimer, pai pei sasa dang meimer.

²⁹Kechiyong shingaia pei shi kodanga mesempar, saka pai aji mesür aser anebalur.

³⁰Aji oda Khristai arogoji mesür aser anebalur, kechiaser asenok pa mang tenük-telentem lir.

³¹ Iba kuli atema teburi pei tebu aser tetsü toktsütsü aser pei kinungtsü den temulung toka alitsü aser tenaprongla shi ka dang akümtsü.

³²Iba miim o kanga tulu saka ni Khrista aser arogo indang jembir.

³³Aji saka nenokia nisung shia pei ama pei kinungtsü dang meimang. Aser kinungtsüia pei kinungpu akhüm tsübuang.