Read njo EFESA 6 Bible Online

EFESA 6 - njo bible

EFESA 6

¹ Tanurtem, Kibuba nung nenoki pei tsüraburtem dang tashi angang; kechiyong aji tim.

² Na junga alitsü aser alima nung na arishia alitsü asoshi,

³nebu aser netsü akhüm tsübuang. Ibai tenangzükba aketba mezüngbuba ozüngji lir.

⁴ Aser tebutem, nenok chirtem ain tadokdaktsü, saka Kibubai sayuba aser azüokba nung anitetang.

⁵ Kilirtem, Khrista dang ama tetsübu aser tatenten nung temulung shisa ka agi alima nung pei kiburtem dang tashi angang

⁶Nisung peladaktsürtem ama tenük mapa agi masü saka Khrista kilirtem ama, pei temulung ajak agi Tsüngremi mulungba inyakang.

⁷Nisungtem dang ama masü, saka Kibuba dang ama nenoki junga tenzükang.

⁸Kiliri süshia nüjipuri süshia, shibai kechisa tajung inyaker pai Kibuba nungi kasaji meyipa angutsü ta nenoki meteta lir.

⁹ Aser kiburtem, Kibubaji kotak nung lir aser pai nisung jak merepranger ta meteta nenok tsüngken tetsübudaktsü.

¹⁰Tatemsa, Kibuba nung aser pa ain tashi aitba nung tashi itang.

¹¹Nenoki mojing külakoktsüba anema noktaktettsü asoshi, Tsüngremer raraba sobutsü ajak sobuang.

¹²Kechiaser asenoki azü aser shi anema memelangteper, saka tongtibangtem anema, aintem anema iba ammang lima yimsüsürtem anema, anüng tema nung tanela tamajung alibatem anema asenoki melangteper.

¹³Anungji tamajungba anogo nung nenoki noktaktettsü asoshi aser ajak inyakmar külen, noktaktettsü asoshi, Tsüngremer raraba sobutsü ajak sobuang.

¹⁴ Anungji ochi agi nenok nangri kanger aser temeshiba merang semoktsü teku nung semoker,

¹⁵ aser tesünep Osangtajung terenemba tsüngsem tetsüng nung semer noktakang.

¹⁶Aser idakji chia ano tamang jong koba agi nenoki tamajungba meyong mi aketba lijakjang sepdaktsütettsü aji sobuang.

¹⁷ Aser tekümtet merang korang, aser tanela nok, koba Tsüngrem O lir itemji agiang.

¹⁸Sarasadem aser temepishiba ajak agi Tanela nung mapang ajak nung sarasademang. Aser iba nung maneni merangba aser temepishiba ajak nung temeshipur ajak asoshi aser ni asoshi saksalema sarasademang.

¹⁹Oda ni osangtajung miim o koba indang ni ibaji tasü ita jembitsü, kü bang lapokdang ola adokba kü nem agütsütettsü asoshi nenoki saksalema mepishiang.

²⁰Kechiyong Osangtajung koba ni sayutsüngitsü tim, jembitsü asoshi ni merangsen tenyar ka lir, nenoki sarasademjang.

²¹ Saka nenoki kü indang metettsü asoshi aser ni koda lir, adianu temeimba aser Kibuba nung temulung lemtetba külem tenzüker, Tukikai nenok nem ajak metetdaktsütsü.

²² Iba asoshisa nenoki onok tia metettsü asoshi, aser pai nenok temulung süngjemdaktsütsü asoshi, ni pa nenok dangi yoker.

²³Tebu Tsüngrem aser Kibuba Yisu Khrista nungi adianutem dangi tamang den tesünep aser temeim sang.

²⁴Shirnoki asen Kibuba Yisu Khrista tamasüba temeim agi meimer parnok ajak den taochi liang.