Read njo FILIPI 1 Bible Online

FILIPI 1 - njo bible

FILIPI 1

¹ Paul aser Timoti, Yisu Khrista lartem Filipi nung aliba Khrista Yisu nung amangba purtem ajak aser tanükertem o dikontem dangi:

²asen Tebu Tsüngrem aser Kibuba Yisu Khrista nungi nenok dangi taochi aser tesünep sang.

³Nenok bilemtetba mapang shia nung ni kü Tsüngrem tenüng asanger;

⁴aser nenok asoshi kü sarasademba mapang shia nung, ni pela-a sarasademer,

⁵kechiaser mezüng anogo nungi tang tashi osangtajung sayutsüngiba nung nenoki telungjem sayu.

⁶Kechiyong shibai nenok dak mapa tajung tenzük, pai Yisu Khrista anogo tashi ajisa abensatsütsü ta ni amanger.

⁷Yamai nenok ajak atema bilemtsü tim, kechiaser ni kü temulung nung nenok ayur, kechiyong kü talenba nung aser osangtajung sotba aser akangdaktsüba mapa nung nenok ajak kü den taochi nung lemsatepertem lir.

⁸Nenok ajak asoshi kü mulung nung koda ni yongyar aji Khrista Yisu aria bilemba temeim nungi adokba ta Tsüngremji kü kuli lir.

⁹Ni ya sarasademer: nenok temeim tali tali rendakjang, temetetba aser teratetba nung tali moshia kümjang.

¹⁰Anungji kechi tajungtiba aji nenoki shimtsü akoktsü. Idangji Khristar Anogo nungji tai makai temeshi alitsü.

¹¹Aser Tsüngrem sentsüngwangshi aser tenüngsang atema temeshiba tejang, koba Yisu Khrista ajanga lir, aji agi nenok süngdaktsütsü.

¹²Adianutem, kü dak kechisa atalok aji agi osangtajungji taliang ayimsünga aküm ta nenok nem metetdaktsünür.

¹³ Obendangba ki ajak nung aser tangar tanüngba ajak dang kü talenba Khrista atema lir ta jungkai adok;

¹⁴aser Kibuba nung adianu ni alenba agi temulung ulua küma, Tsüngrem O metsübui jembitsü kanga tali tasü ita akümer.

¹⁵Kari atangji mokokajiba aser rarabangsen agi Khrista o sayutsüngir, saka kari temulung tajung agi sayutsüngir,

¹⁶Tesübuba jagi temeim nung inyaker, kechiaser osangtajung kümzüka ayutsü asoshi ni atadaktsü ta parnoki metet.

¹⁷Mezüngbuba jagi nentaka mesüi pei ulunüba tanela agi Khrista indang sayutsüngir, kü talenba nung parnoki ni timtemdaktsütsü bilemer.

¹⁸Ajangla kechi? Ibai dang, anemsüba nung süshia, atangji nung süshia ajaklen Khrista sangokja lir; aser iba nungji ni pelar, aser ano pelatsü.

¹⁹Kechiyong nenoki mepishiba ajanga, aser Yisu Khrista Tanelai agütsüba ajanga ni kümzüktsü asoshi ibai akümtsü ta ni metet.

²⁰Anungji ni tenok tenoka bilema imlaba amato, ni kecha maksü mangutsü, saka tasü aitba ajak agi, teti ama, taküm agi süshia, tasüba agi süshia, tanga kü mang nung Khrista uludaktsütsü.

²¹Kechiaser ni asoshi taküm alibaji Khrista, aser tasütsüji tajangzük lir.

²²Saka shi nung taküm lira, aser kü mapa nungji süngjang tangra, idangji ni koba shimtettsü aji ni memetet.

²³Saka ana tsüngda nungji ni terata nung lir, kechiyong ni asoshibo pila-a Khrista den linür; aji kanga agia tajungba.

²⁴Saka ni nenok asoshi shi nung alitsüji tenüngdaktsü tali lir.

²⁵Aser aji meteta, ni nenok dangi tanaben aruba agi Khrista Yisu nung kü dak nenok uluba tali akümtsü asoshi,

²⁶tamang nung nenok arentsü aser pelatsü asoshi, ni taküm alitsü ta ni metet.

²⁷Ni arua nenok ngur süshia, ni maden dang süshia, nenoki osangtajung tamang atema merangtepba, nenok tanela ka nung temulung ka sür akang akanga noktaker ta,

²⁸aser tsükchirtemi kecha nunga metsübudaktsür ta, nenok tia indang ni angashitsü asoshi nenok taküm yimya Khrista osang tajung temsüa lidakjang. Nenok tetsübu malibaji parnok asoshi tesamatsü kuli tejangja lir, saka ibaji nenok asoshi Tsüngrem nungi tekümtet indang kuli lir.

²⁹Khrista dak amangtsü asoshi dang masü, saka ano pa atema timatemtsü nenok nem agütsü.

³⁰ Kechiaser kü dak koda raraba nenoki angu, aser tanga kü dak lir ta angashir, iba raraba nenokia raradagi.