Read njo FILIPI 2 Bible Online

FILIPI 2 - njo bible

FILIPI 2

¹Anungji Khrista nung langka tajungshiba lira, temeim nungi langka tesüngzük lira Tanela nung langka telungjem lira, aria bilemba aser yimlibilem lira,

²kü pelaba süngdaktsütsü asoshi nenoki putepa liang, kasa temeim akatsüla, taküm telungjem liang, aser kati ka den putepang.

³Ambangyim aser amajok asüküm agi kecha teinyak; saka ajemalu shisatsü agi nisung shiai pei dang nungibo pi taoba ta züngshiangma.

⁴Nenok nisung shiai pei indang mebilemi pi indang bilemangma.

⁵Anungji Khrista Yisu dak koba mulungsentsü liasü, aji nenok daka liang:

⁶“Pa Tsüngrem mesükba nung liaka, Tsüngrem den saku alibaji sota ayutsü tim ta mezüngshi.

⁷Saka pei sasa tazüngla kümer, alar ama küma nisung ama aküm.

⁸Aser sorubangru nung nisung ama kümer, pei sasa ajemalu küma, tasütsü, oda kangki nung asütsüa, tashi anga-a aküm.

⁹Anungji Tsüngremi pa tematiba jenjangi ajungket, aser ajak dang taoba tenüng Pa nem agütsü;

¹⁰ Anungji Yisu tenüng nung kotak nung alirtem, alima aser ali telung[1] nung alirtem ajaki pa dang temokok agi apudaka külemtsü;

¹¹aser ‘Yisu Khristaji Kibuba ta Tebu Tsüngrem nem, sentsüwangshi agüja temeli ajaki ayimtentsü.”

¹²Anungji kü temeimbatem, ni nenok den alidang nenoki kü dang teti tashi anga-a aliba ama, tang ni nenok den dena malidanga kü dang tashi angatsübaji kanga agi tongtibangba lir. Nenoki atentena aser tsübua pei tekümtet inyakang.

¹³Kechiyong shibai pei temulung chia inyakdaktsütsü asoshi nenok dak temulungtettsü aser teinyaktsü anaprongla adokdaktsür, aji Tsüngrem.

¹⁴Aji asünung kangkokangji mesüra tashishiba kecha medeni inyakang.

¹⁵ Anungji iba mashikoshi aser tekirak putu nung nenok tindang Tsüngrem chirtem, ochi aser tai meketi tesangwa ama ayatsü,

¹⁶Aji asü nung nenoki taküm o dak amet. Anungji Khrista Anogo nungji ni amajok nung masem mesüra amajok nung meinyak ta ni nümadanga shitettsü.

¹⁷Aser ano nenok tamang tenla aser tenzükba manung ni tenla agütsüra, ni pelar, aser nenok ajak den pelateper.

¹⁸Aser yamaji nenoka pela-ang; aser kü den pelatepang.

¹⁹Saka nenok indang meteta nia pelatsü asoshi nenok dangi Timoti yakta yoktsü Kibuba nung ni imlar.

²⁰Kechiyong pa ama temulung teputep aser nenok indang shitak shia bilemba nisung shinga mali.

²¹Kechiyong ajaki Yisu Khrista masü pei ajungtsü indang bushir.

²²Saka nenoki ya meteter Timoti-i pei sasa metendaktsür. Tanur kati kechi koda tebu tenzüker, yamaji osangtajung renlokdaktsütsü asoshi pai kü den tenzük ta nenoki pa indang kuli metet.

²³Anungji kü indang kechi koda asütsü, aji meteta kümli-i nenok dangi idangyongjisa pa yoktsü imlar.

²⁴Saka nia kü sasa yakta arutsü ta ni Kibuba nung amanger.

²⁵Saka kü adianu, külem inyaker, aser külem tamang nung rarar, Epafrodita, kü nüngdak nung shiba tenyar aser teyariteper lir, nenok dangi pa yoktsü ta ni bilemer.

²⁶Pa shiranga liasü ta nenoki angashiogo ta meteta pai nenok ajak ajurutsü yongyaba agi tip medemi liasü.

²⁷Kechiyong pa tasütsü ama shiranga liasü, saka Tsüngremi pa dang yimlibilem sayu.

²⁸Anungji nenoki pa tanaben ngua pelatsü asoshi, aser kü tejashia ajema akümtsü asoshi ni pa mulungsoa yokogo.

²⁹Anungji Kibuba nung pelashishia pa agizükang, aser ibala nisung akhüm tsübuang.

³⁰Kechiaser nenoki meyaritetba mapa kar nung ni yaritsü asoshi pa taküm lendongia ia Khrista mapa atema tasür dang liasü.