Read njo FILIPI 3 Bible Online

FILIPI 3 - njo bible

FILIPI 3

¹Tatemsa, kü adianutem, Kibuba nung pela-ang. Ni iba o kasa nenok dangi zülutsü ni atangji malaker, saka aji nenok asoshi tekümdangdaktsüba.

²Azütem asoshi kümdangang, tamajung inyakertem asoshi kümdangang, rangtokertem asoshi kümdangang.

³Kechiyong shiri Tsüngrem Tanela agi külemer, aser Khrista Yisu nung ulur aser shi nung meimlar, aji asenok temejeptokertem lir.

⁴Aji saka nibo shi nung imladi süra, tangar kari shi nung imlatsü koker ta bilemra, ni tali akoktsü;

⁵ ni Israel kin Benjamin kidong nungi, Ibri rongnung Ibri; tinü buba nung mejeptok; ozüng tsütsü nungi ni Farisi;

⁶ tejangraba tsütsü nungi arogo rishikangshiba nisung; aser ozüng nung aliba temeshiba tsütsü nungi tai meketi angu.

⁷Saka kechisa ni asoshi tajangzük liasü, itemji Khrista atema tesama ta ni züngshir.

⁸Itemji dang masü, kü Kibuba Khrista Yisu temetetba shisatsü, koba ajak dang sentiba lir, ya atema ajak endokogo;

⁹aser pa den lungjema akümtsü. Ozüng dang tashi angaba temeshibaji joko ni magizüker, saka Tsüngrem nungi aruba temeshiba, koba tamang dak amendaka lir, aser Khrista dak tamang akaba ajanga agütsüba temeshibaji ni kar.

¹⁰Ni metetnüba ajongaji Khrista aser pa shia aruba tashi-ain aser pa toushiba nung lungjemba,

¹¹aser anarongtena danga ni tasüba nungi shia arutsüji imlar.

¹²Ni tang aji nguogo ta masü, mesüra ni tabensa kümogo ta masü, saka kechi asoshi Khrista Yisui ni puadok aji tongtetdisü ta ni arishir.

¹³Adianutem, ni aji tongtetogo ta ni mashir, saka ni ya inyaker; taoba indangji amadoker, tejaklen alibaji ni tongtettsü meranger.

¹⁴Khrista Yisu nung temalen nungi Tsüngremer tajaba tajangzük alizüngji tongtettsü ni arishir.

¹⁵Anungji asenok kwika tabensa lir, iba mulungsentsüjisa lidi, aser nenoki langka nung temulungsentsü balaka lira, ajia Tsüngremi nenok dang jungkai adokdaktsütsü.

¹⁶Saka asenoki kechi tashi tongtetogo, iba ozüng jagisa asenok jajadi.

¹⁷ Adianutem, nenok külemi kü jilu ajizükertem liang; nenok tatishitsü asoshi onok lir aser shiri onok ama jajar parnok ajizükang.

¹⁸Kechiyong Khrista kangki tsükchirtem ama aikati jajar ta ni nenok dang aiben shiogo, aser tanga ni jeba ashir.

¹⁹Tatem nung parnok samatsü, parnok tsüngrem pei tepok lir, parnok uluba parnok maksü nung lir, aser parnoki alima oset indang bilemer.

²⁰Saka asen senso kotak nung lir, aser ano idak nungjagi Kümtetdakba ka oda Kibuba Yisu Khrista arutsü aji asoshi asenoki atar.

²¹Pai koba inyakba agi ajak pei kübok ayutsü akok, aji inyakba amato pai asen tajemzük temangji melenshia, pa sentsüwangshiba temang ama tasen kümdaktsütsü.