Read njo FILIPI 4 Bible Online

FILIPI 4 - njo bible

FILIPI 4

¹Anungji ni meimba aser yongyaba adianutem, nenok kü tepela aser takokba lir; kü temeimbatem Kibuba nung akang akanga noktakang.

²Euodia aser Sintike, Kibuba nung adianutem ama putepa alitsü ni ajungshir.

³Hau, kü den atangji süngra ka nung apurtem nenoki item tetsürtem dang yariang ta ni nenok dang mepishir, kechiyong parnoki Klement den külemi inyaker tangartem, shir tenüng taküm kaket nung zülua lir, parnok den item tetsüri osangtajung nung inyak.

⁴Teti Kibuba nung pela-ang; tanabena ni shidi, pela-ang.

⁵Nenok tazüzükba nisung ajak nem metetdakjang. Kibuba anasa lir.

⁶Kecha nunga temulung tatem ma, saka ajak nung sarasademba aser mepishiba aser tenüngsang agi nenoki mepishiba Tsüngrem nem metetdakjang.

⁷Aser Tsüngrem tesünep kobai tangatetba ajak atentanger ajagi Khrista Yisu nung nenok temulung aser tebilemba nüka alitsü.

⁸Tatemsa, adianutem, kechisa ochi lir, kechisa akhüm tsübutsü tim, kechisa temeten lir, kechisa temerük lir, kechisa temeimtsü lir, kechi indangsa osangtajung lir aser langka nüngsang lira item indang bilemdangang.

⁹Kechisa nenoki kü dak angazük aser agizük, aser angashi aser angu, itemji inyakang; aser tesünep Tsüngremji nenok den alitsü.

¹⁰Saka tang tatem nung nenoki kü indang aria bilema asentenshiogo ta, ni Kibuba nung kanga pelar; aji saka nenokia teti bilema liasü, saka nenoki ni yaritsü mapang tajung mangu.

¹¹Maka-mait indang ni jembir masü kechiaser kechi tia nungsa ni lidir, iba nungji ni temulung süa alitsü ni angazükogo.

¹²Kechi koda ajemzüka alitsü aji ni metet, aser kechi koda jenti ka-a alitsü ajia ni metet, kechisarena nung aser ajak nung, sünga alitsüa aser ya-a alitsüa, jenti ka-a alitsüa aser anünga alitsü, iba miim oji ni angazükogo.

¹³Khrista shibai ni tashi itdaktsür pa dak ni ajak inyaktsü akok.

¹⁴Aji saka nenoki kü timtem toushi lemsatep nung, nenoki tajungba benshi.

¹⁵ Aser ano osangtajung tetenzük nung, kodang ni Makedonia nungi pila, nenok dak alema tangar arogo shingaia tenla agütsüba aser agizükba nung kü den melungjem ta, nenok Filipi nungeri metet.

¹⁶ Kechiyong ni Tesalonika nung alidanga khen anaben ka kü tenüngdaktsü nenoki bendaktsü.

¹⁷Ni sempet asoshi bushir masü, saka nenok tenüng nung arenba süngjang asoshi ni bushir.

¹⁸ Ni tangutsü ajak peria nguogo, aser taliang kar. Ano tang Epafrodita nungi nenoki bener yokba sempettem agizükogo. Item sempettemji teronem tajung menemba tenla ka, Tsüngrem peladaktsütsüsa agizüktetba tenla ka aküm.

¹⁹Aser kü Tsüngremi Khrista Yisu nung pa sentsüwangshi nung pa rongsen yari nenok tenüngdaktsü ajak agütsütsü.

²⁰Tang asen Tebu Tsüngrem dang teti tatem makaba sentsüwangshi sang. Amen.

²¹Khrista Yisu nung amangba temeshipurtem nem salem agüjang. Kü den aliba adianutemi nenok nem salem agütsür.

²²Temeshipur ajaki aser tongtibangsa Kaisar kibong nung alirtemi, nenok nem salem agütsür.

²³Kibuba Yisu Khrista taochi nenok tanela den liang.