Read njo KOLOSI 1 Bible Online

KOLOSI 1 - njo bible

KOLOSI 1

¹Paul, Tsüngremi mulungba ajanga Khrista Yisu tenyar ka aser asen adianu Timoti nungi,

²Kolosi nung aliba Khrista nung temeshipurtem aser temulung lemtetba adianutem dangi asen Tebu Tsüngrem nungi nenok dangi tesünep sang.

³Kodangsa onoki nenok asoshi sarasademdir, asen Kibuba Yisu Khrista, Tebu Tsüngrem nem onoki teti tenüngsang agütsür.

⁴Kechiaser nenoki Khrista Yisu dak nenok tamang ayuba indang aser temeshipur ajak asoshi nenok temeim indang angashi.

⁵Kechiaser nenok asoshi kotak nung rizüngba teimla koba nenok dangi aruba osangtajung ochi o indangji nenoki akhidang nungi angashiogo.

⁶Aser kechi koda osangtajung alima ajak nung tejang atanger aser arener, yamaji koba anogo nung nenoki Tsüngrem taochi indang atangji angashi aser metet, iba anogo nungi nenok rongnunga osangtajungji tejang atanger.

⁷ Kechiyong onok medemer tenzüker temeimba Epafra, shiba onok atema Khrista temulung lemtetba tenzüker lir, pa nungi nenoki osangtajungji angazük,

⁸aser ano pai Tanela nung nenok temeim onok dang metetdaktsü.

⁹Aji asünung iba o angashiba anogo nungi onoki nenok atema maneni sarasadema mepishir. Tanela shisatsü aser tangatetba ajak nung pa mulungba metetba agi süngtettsü asoshi,

¹⁰aser Tsüngrem metetba nung rena, mapa tajung nung tejang tanga aser ajak nung Kibuba temulung chidakja temsüa jajatsü asoshi onoki sarasademer.

¹¹Talangka aremzükba, ajemalu aser tepela ajak asoshi, pa sentsüngwangshi ain amato, nenok tashi ita lidakjang.

¹²Aser Tebu shibai tesangwa nung temeshipurtem den senmang lemsateper akümtsü, nenoki pa tenüng sangangma.

¹³Kechiyong pai ammang tashi ain yimli nungi asenok alangzük aser pa temeimba Chir yimli dangi anir aru.

¹⁴ Pa dak asen alangzükba oda temenen tatokbaji kar.

¹⁵Paji mungutetba Tsüngrem noksa, teyangluba ajak mezüng Chir.

¹⁶Kechiyong kotak nung aser alima nung oset ajak, ngutetba aser mungutetba kechisa lir, chuba menden süshia, aintem süshia, ajak pa asoshi yangluogo.

¹⁷Aser pa ajak dang tamasa nungi lir, aser pa dak ajak sota alir.

¹⁸ Aser temang, oda arogo madak tekolakji pa. Kechisarena nung pa tematiba asütsü asoshi, paji tetenzük aser tasür rongnungi mezüng Chir.

¹⁹Kechiyong pa dak Tsüngrem tabensaba ajak alitsü asoshi, aser pa kangki zü ajanga yimjung yanglua,

²⁰ alima nung aliba süshia, kotak nung aliba süshia, ajak pa ajanga Tebui pei sasa den putepdaktsütsü temulung chia liasü.

²¹Saka nenok akhidang mapang nung mapa tamajung inyaka temulung nung nenok Tsüngrem anemertem kümer pa nungi pila-a liasü.

²²Aji saka tang nenoki temeshi, tarak maket aser taitsüba meketi pa madang noktaktsü asoshi pa tasüba pa shi temang nung nenokji lungjema putepdaktsüogo.

²³Anüng kübok aliba teyangluba ajak madang sayutsüngiba koba osangtajung nenoki angashi, aser ni Paul, koba atema tenzüker ka aküm, iba osangtajung teimlaba nenoki marakzüi tamang nung maneni akang akanga noktakra, nenok pa madang tendaktsütsü.

²⁴Tang nenok atema kü timtem nung ni pelar, aser Khrista tekangshi koba anünga lir, iba nungji kü shilem kü shi nung pa mang, oda arogo atema ni abensatsür.

²⁵Tsüngrem o koda miim o putusa putu aika miima liasü, saka tang pa temeshipurtem dang jungkai adoktsüogo.

²⁶Iba o ataloktsütsü nenok asoshi Tsüngremi kü nem agütsüba tenzüker mapa amato, ni iba arogo tenzüker ka kümdaktsü.

²⁷Aser Bendangertem rongnung iba miim o sentsüwangshi rongsenji kechi koda lir, aji temeshipur nem metetdaktsütsü asoshi Tsüngremer sentongji liasü, aser iba miim oji nenok dak aliba Khristaji lir, paji nenok sentsüwangshi teimla.

²⁸Onoki nisung shia dang sayua aser nisung shia ajungshia onoki Khrista sangoktsür.

²⁹Aser iba asoshi shibai kü dak ain agi mapa inyaker pai inyakba amato nia rara-a mapa inyaker.