Read njo KOLOSI 2 Bible Online

KOLOSI 2 - njo bible

KOLOSI 2

¹Ano nenok aser Laodikia nung alirtem aser kwikati kü tejak mangu,

²parnok temulung tesüngzük ngutettsü asoshi aser parnoki temeim nung lungjema, tabensa angatetba ajak nung aser takar küma, Tsüngrem kibok o, oda Khrista,

³shiba dak shisatsü aser temetetba rongsen ajak miimbanga lir, pa parnoki metettsü asoshi, nenok atema ni koda kanga rarar, aji ni nenok nem metetdaktsünür.

⁴O tanang agi shinga nema nenok mekülakokdaktsütsü asoshi ni ya ashir.

⁵Kechiyong ni shi nung medenaka tanela nung nenok den lir, aser pelashishia nenok timi aliba aser Khrista dak nenok tamang marakzüba ngudagi.

⁶Anungji nenoki kechi koda Khrista Yisuji Kibuba ama agizük, yamaji pa dak liang.

⁷Pa dak tera yanga aser metenloktepa aser nenok dang sayuba ama tamang nung akangdakja tenüngsang agi moshia liang.

⁸Kari alima shisatsü metetba amajok agi, aser ashikülak meimchir sangrasangji otsü amato, koba Khrista amato masü, saka alima tenzükba amato, item yagi nenok anisemer moudaktsütsü kümdangang.

⁹Kechiaser pa dak, Tsüngrem pei tabensaba temang ajongaji lir.

¹⁰Aser shiba ain ajak aser bangdak tashi ajak madak tekolak lir, oda pa dak nenok tabensaba takümji kar.

¹¹Nisunger teka agi inyaka mejeptokba ka agi masü, saka Khristai inyakba temejeptokba agi nenok shi temenen yimya endokadokba nungji nenoka pa dak mejeptok.

¹² Aser baptiba nung nenok pa den arem aser pa tasü nungi shia arudaktsüsang, Tsüngrem ain nung nenoki tamang ayuba ajanga pa den nenoka shia arudaktsü.

¹³ Aser nenok shir temenen nung aser nenok shi memejeptokba nung tasü liasü, pai asen tai temenentem ajak atok nung Tsüngremi pa den külemi asenok taküm kümdaktsü.

¹⁴ Aser asenok anema zülua aliba ozüng den iba talenbatem, koba asenok anema noktaka liasü, pai aji kangki nung angenloka bener ogo.

¹⁵Aser temenen yimsüsübatem aser ain tashitem pai sazüka amungdoktsüogo. Item madak takok ngua pai parnok yimjak madak jungkai adoka sayuogo.

¹⁶ Anungji chiyungba süshia, tajemba süshia, amungnü süshia, item indang shinga nema nenok o tebendangdaktsü.

¹⁷Ya ajakji tarutsü aliba akhüm dang saka temangji Khrista meyong.

¹⁸Tekolak shiba kübok nung temang rangben teloktep aser shi tetsü külemi lungjemer Tsüngrem nungi ainer, iba tekolak den lungjema alitsü melena,

¹⁹ amajok shi temulungsentsü agi mezümeküma kümer, lumiba aser kotak tenyar külemba yimsü atema shinga nema pei sünütsü süa nenok asoshi ozüng teyangludaktsü.

²⁰Iba alima tanela yimsüsüba nungi pila-a nenok Khrista den külemi asü süra, nenok ano iba lima nung alir ama nenoki kechiba yamala ozüng kübok tashi anga-a alir?

²¹“Ya tekongshi,” “Ya temenakdang,” “Ya tetangshi,”

²²item memelaba tenokdangba ajakji osettem den dang sentaktepa lir, koba osettem maneni amshiba agi sama-a aotsü.

²³Pei temang azüokba aser pei temang kangshidaktsüba aser ozüng agi sashia külemba, item nungji shisatsü mesüka angur, saka shi jabujariba sashia benshibaji azüoktsü asoshi itemji khenyongi tashi mait aser tagidak maka.