Read njo KOLOSI 3 Bible Online

KOLOSI 3 - njo bible

KOLOSI 3

¹ Nenok Khrista den meso süra, ajangla Tsüngrem tajichilen kong Khrista mena lir, temalen aliba osettem bushiang.

²Alima nung aliba osettem nung masü, temalen aliba osettem nung nenok temulung yuang.

³Kechiaser nenok asü, aser nenok taküm Khrista den Tsüngrem nung miima lir.

⁴Khrista shiba asen taküm lir, pa kodang jungkai adokdir, idangji nenoka pa sentsüwangshi nung jungkai adoktsü.

⁵Anungji alima nung aliba nenok tenük-telen itemi nenoki tepsetang: jabujariba, memerükba, tamajung azüabungba, tenükshiba, aser merumeru koba süngyanglu den saku lir.

⁶Item ajanga tashi mangaba chirtem madak Tsüngrem ain adokba arudagi.

⁷Khen mapang nung kodang nenok item nung taküm liasü, item nung nenoka jaja-a liasü.

⁸Saka tang item ajakji oda ain adokba, rasaba, sempaba, atalaba nüngsenba, nenok tebang nungi tamajung jembiba endokang.

⁹ Kati ka den tiyazü o tejembi kechiaser nenoki tejenba taküm pa inyaksangshi mapatem külemi semzüka endokogo,

¹⁰ aser tasenba taküm koba pei teyanglur mesükba noksa tabensa shisatsü dangi tasen yanglua lir aji sobuang.

¹¹Iba tasenba taküm nungbo Grik nunger aser Yihuda nunger, temejeptokba aser memejeptokba, Barbar nunger, Sitia nunger, alar, nüji ta telemsatep kecha mali, saka Khristaji ajak lir aser ajak nung lir.

¹² Anungji Tsüngrem meyong shimtetba ama aser temeimba, aria bilemba temulung yimlibilem, tila akümba, ajemaluba, talangka aremzükba item sobuang.

¹³ Nisung kari kar anema tai agütsüra, nenoki kati ka den talangka aremzüka tai toktepang. Kibubai kechi koda nenok tai atok, yamaji nenokia benshiang.

¹⁴Aser item ajak dak alema temeim kobai kechisarena tetemjen telungjem nung alentepa yutsür iba temeimji sobuang.

¹⁵Aser Khrista tesünep koba dangi nenoka tamang ka nung aja, aji nenok temulung nung chubakdakjang aser nenoki tenüngsanga liang.

¹⁶ Khrista oji talubosa nenok dak lidakjang. Shisatsü ajak nung medemer o medemer na tenüngsang ken aser temeshi ken aser tanela ken agi sayua ajungshitepang, aser nenok temulung nung taochi agi Tsüngrem dang tenang.

¹⁷Aser o nung süshia, mapa nung süshia, nenoki kechisa inyakdir, Kibuba Yisu tenüng nung ajak inyakang aser pa ajanga Tebu Tsüngrem dang tenüngsang agüjang.

¹⁸Kinungtsütem, Kibuba nung koda tetemsü, yamaji nenoki pei kinungpurtem kübok liang.

¹⁹ Kinungputem, nenoki pei kinungtsütem meimang aser parnok dang sashia tebenshi.

²⁰ Tanurtem, kechisarena nung nenoki pei tsüraburtem dang tashi angang, kechiyong aji agi Tsüngrem mulung chidaktsür.

²¹ Tebutem, nenoki pei chirtem tashi manga makümtsü asoshi nenoki parnok dang nemnemshinem tesü.

²² Kilirtem, nenoki kechisarena nung nenok kiburtem dang tashi angang, nisung peladaktsürtem ama, tenük agi angutsü atema dang masü, saka Kibuba tsübuba temulung ajonga agi inyakang.

²³Kibuba nungi senmang tajangzük angutsü ta meteta,

²⁴nenoki kechisa inyakdir aji nisung dang masü, saka Kibuba dang temulung ajak agi inyakang; kechiyong nenoki Kibuba Khristaji tenzüker,

²⁵ kechiyong shibaisa tai benshidir pai pei-i inyakba tai asoshi meyipa angutsü. Aser idakji nisung jak reprangba mali.