Read njo KOLOSI 4 Bible Online

KOLOSI 4 - njo bible

KOLOSI 4

¹ Kiburtem, kotak nung nenok Kibur ka lir ta nenoki meteta kilirtem dang timi ochishia benshiang.

²Sarasadem nung akang akanga maneni liang, aser idakji tenüngsang agütsüba den saksalema liang.

³Aser Tsüngremi pa o asoshi onok nem kishi ka lapoktsütettsü asoshi Khrista miim o, koba asoshi nia talenba nung lir, ibaji jembitsü aser kechi koda ni jembitsü tim,

⁴aji oda ibaji jungkai adoktettsü asoshi metitemi onok asoshi sarasademang.

⁵ Mapang tajung alangzüka, mamangertem tsütsü kanga shisa ka-a inyakang.

⁶Nisung shia dang nenoki koda langzütsü tim aji nenoki metettsü asoshi nenok o teti taochi den metsü agi nangdakja liang.

⁷ Kibuba nung temeimba adianu aser temulung lemtetba tenzüker aser külem tenzüker Tukikai nenok dang kü indang ajak metetdaktsütsü.

⁸ Nenoki onok tia metettsü aser pai nenok nem temulung süngjemdaktsütsü asoshi, ni pa nenok dangi yokogo.

⁹ Temulung lemtetba aser temeimba adianu Onesima, shiba nenok rongnung ka lir, pa Tukika den külemi yokogo. Idaki inyakba ajak parnoki nenok nem metetdaktsütsü.

¹⁰ Aristarka, shiba kü den tepoukdak lir aser Barnaba tanük Mark, shiba nenok dangi arura agizükang ta shiogo, parnok nungi salem bendaktsür.

¹¹Aser Yisu, shiba dang Yusta ta ajar, parnoki nenok nem salem agütsür. Temejeptokertem nungi Tsüngrem Yimli asoshi inyaker medemer aser kü temulung süngzükdak nisung itemi dang lir.

¹² Yisu Khrista tenzüker nenok rongnung ka Epafrai nenok nem salem agütsür. Tsüngremi mulungba ajak nung nenok tabensa aser chichiba küma noktaktettsü asoshi, pai pa sarasadem nung teti nenok asoshi merangdagi.

¹³Aser nenok aser Laodikia aser Hierapoli nung alirtem asoshi pai mapa kanga meranga inyaka belemer ta ni kuli agütsür.

¹⁴ Mozü metetba temeimba Luk, aser Demai nenok nem salem agütsür.

¹⁵Laodikia nung aliba adianutem nem Nimfa aser lar kidang sentepba arogo nunger nem salem agüjang.

¹⁶Iba shiti ya nenok rongnung zünger külen, Laodikia nunger arogo nung züngdakjang aser Laodikia nungi aruba shitiji nenok rongnung züngang.

¹⁷ Aser Arkipa dang shiang nai Kibuba nung kechi tenzükba mapa agizük aji abensatsütsü merangang.

¹⁸Kü salem, ni Paul pei ket agi zülur. Kü talenbatem bilemtetang! Nenok den taochi liang.