Read njo 1 TESALONIKA 2 Bible Online

1 TESALONIKA 2 - njo bible

1 TESALONIKA 2

¹Kechiyong adianutem, nenok dangi onok aruba amajok maküm ta nenok sasa metet.

² Saka nenoki metetba ama tamasa Filipi nung onok timtem aser mezüngmeshi ngur külen, onoki timtem tulu nung Tsüngrem osangtajungji nenok dang jembitsü asen Tsüngrem dak tasü ita aküm.

³Kechiyong onoki ajungshiba tai nung mesüra, ashioktsüba nung masü.

⁴Saka onoki teti Tsüngremi inyakdaktsünüba ama jembia aruogo; kechiaser Osangtajungji onok nem nungloktsütsü tetemsü ta pai angu. Onoki nisung peladaktsütsü asoshi masü, saka Tsüngrem, shibai onok mulungsentsü tendanger, pa peladaktsütsü jembir.

⁵Tsüngremia kuli agütsüba ama onoki tiyazü nung nenok tenüng sanga jembia maru ta nenoki metet, mesüra onok merumeru miimbanga mejembi.

⁶Nenok nungi süshia, mesüra tangar nungi süshia, onoki nisung shinga nungia tenüngsang mebushi. Khristar tenyartem ama onoki nenok nem khuret benloktsütsü liaka,

⁷saka tetsü kati pei chirtem ajemalua anebaluba[1] ama nenok rongnung onok ajemalua liasü.

⁸Yamaji nenok dang jangra-a meim nung onoki nenok nem Tsüngrem osang tajung dang masü, saka onok pei taküma agütsütsü temulung chia liasü, kechiaser onoki nenok dang kanga meima aküm.

⁹Kechiyong adianutem, onoki nenok shinga nema khu mebenloktsütsü asoshi mangli sangwali mapa inyaka, onoki nenok dang Tsüngrem osangtajung sayutsüngia liasü ta nenoki onok kanga meranga inyakba aser belemba bilemtetang.

¹⁰Aser pa Chir shiba pai tasü nungi shia arudaktsü, iba Yisu shibai tarutsü aliba ain adokba nungi asenok kümzüker, pa kotak nungi maru tashi atatsü onoki iba indang osang agütsür.

¹¹Tebui kechi koda pei chirtem dang benshi aji oda onoki nenok dang ajungshi, aser tasü itdaktsü ta nenoki meteta kar.

¹²Tsüngrem shibai nenok pa yimli aser sentsüwangshi dangi aja, pa tsüngdang temsüa jajatsü asoshi onoki nenok ajungshiogo, süngzükdaktsüogo aser maneni kanga mepishiogo, aji nenoki metet.

¹³Aser kodang onok nungi nenoki angashiba o, oda Tsüngrem O agizük, nenoki aji nisung o ama masü, saka Tsüngrem O ama agizük; aji asoshi ano onoki maneni Tsüngrem tenüng asanger. Atangji aji Tsüngrem O lir, aser aji agi ano nenok tamanger dak inyaker.

¹⁴ Kechiyong adianutem, Khrista Yisu nung Yihuda nung aliba Tsüngrem arogotem ajizüker nenok aküm. Kechiyong parnoki Yihuda nungertem nungi timtem anguba ama, nenokia pei lima nisung nungi iba timtem kasasa angu.

¹⁵ Item Yihuda nungeri Kibuba Yisu aser ainkartem anaprongla tepset, aser onok aridok, aser Tsüngrem temulung mechidaktsür, aser nisung ajak anemer akümer.

¹⁶Aser Bendangertemi tekümtet mungudaktsütsü asoshi parnok dang osangtajung sayutsüngitsü parnoki onok dang memela; yamaji item Yihuda nungeri parnok temenen tali bendenloker. Aser tang tesüsa Tsüngrem ain adokba parnok madaki aruogo.

¹⁷Saka adianutem, mapang tatsüka asoshi tebilemba nung masü, saka temang nung nenok nungi onok khenpiga asoshi pila nung onoki tejangraba tulu agi nenok jak tanaben nguyutsü yongyaseta liasü.

¹⁸Kechiaser onoki oda ni, Pauli khen anaben nenok dangi kanga arunüa liasü, saka Satani onok noktang.

¹⁹Kechiyong Khrista arudang onok teimla mesüra tepela mesüra sentsüwangshi korangji nenok lir.

²⁰Atangji nenokji onok sentsüwangshi aser tepela.