Read njo 1 TESALONIKA 3 Bible Online

1 TESALONIKA 3 - njo bible

1 TESALONIKA 3

¹ Anungji kodang onoki ya maremtet, Athen yimti nung dang onok kija ataa alitsü onoki lemtet.

²Aser onok timtemba agi shinga manokshidaktsütsü asoshi nenok ajungshitsü aser nenok tamang nung tashi itdaktsütsü Khrista osangtajung sayutsüngiba nung Tsüngrem asoshi külem tenzüker onok tenu Timoti onoki nenok dangi yok.

³Oda yamala rishikangshi timtemji onok tata shilem ta nenokia meteta liasü.

⁴Kechiyong onok dangi rishikangshi arutsü ta onoki nenok den alidang jelia shiogo aser aji oda ataloker ta nenoki meteter.

⁵Iba kuli asoshi, kodang joko ni ibaji maremzükteti aküm, tatitanger jagi kodakirna sür nenok atitangtsü aser onoki belema inyakbaji amajok akümtsü ta tsübua nenok tamang ni metettsü asoshi ni Timoti yok.

⁶ Saka tang nenok nungi Timoti onok dangi meyipa aruogo aser pai nenok tamang aser temeim indang osang tajung bener aruogo. Onoki koda nenok nguyutsü yongyar, yamaji nenoki onok den ajurutepnüba aser kechi koda teimla agi nenoki onok teti bilemteta lir, iba osang indang pai shiogo.

⁷Anungji, adianutem, iba atemaji onok timtem tekangshi nung liaka, nenok tamang indang angashia, onok sünepdaktsüogo.

⁸Kechiyong tang nenoki Kibuba nung akang akanga noktakra onok taküm alibaji tajangzük kar.

⁹Aser Tsüngrem madang nenok atema onok pelaba ajakji meteta arudang, nenok asoshi Tsüngrem nem tenüngsang koda tulu agütsütsü.

¹⁰Kechiyong onoki nenok tejak ngutettsü aser nenok tamang nung matoksaba yaritettsü asoshi, onoki mangli-sangwali kanga sarasademer.

¹¹Aser Tebu Tsüngremi pei sasa aser asen Kibuba Yisui nenok dangi onok len aniangma.

¹²Onoki nenok meimba ama, nenok kati ka den aser nisung ajak den tali tali meimteptsü asoshi Kibubai nenok temeimtep züindakjang.

¹³Asen Kibuba Yisu pei temeshipurtem ajak den külemi pa tanaben aruba mapang nungji aser Tebu Tsüngrem madang nenok mulungjang temerük aser tai makai tashi ita lidakjangma.