Read njo 1 TESALONIKA 4 Bible Online

1 TESALONIKA 4 - njo bible

1 TESALONIKA 4

¹Tatembangsa, adianutem, nenoki koda jajatsü aser Tsüngrem peladaktsütsü tim, nenoki onok nungi angazükba ama aser yamaji nenoki inyaka aruba ama, ano nenoki maneni yamajisa inyaktsü asoshi Kibuba Yisu tashi nung onoki nenok dang mepishir aser ajungshir.

²Kechiyong Kibuba Yisu tashi ajanga nenok nem onoki kechi ozüngtemsa agütsüogo, itemji nenoki meteta kar.

³Kechiyong Tsüngremi mulungbaji ya lir: Nenok temeshi alitsüla aser jabujariba nungi nenok pila-a alitsüla.

⁴Oda temeshiba aser tetushi nung nenok nisung shiai pei temang koda ayutsü[2] meteta alitsüla.

⁵Tsüngrem memetetba limapuri azüabunga jabujariba mesüka mebenshitsüla.

⁶Iba nungi nisung shingaia pei adianu mekülakoktsütsüla. Aser tai mebenshitsüla, kechiaser akhidang onoki nenok kümdangdaktsüba aser kuli agütsüba ama, item ajak nung mangyangbaji Kibuba lir.

⁷Kechiaser Tsüngremi asenok memerükba asoshi masü, saka temeshiba nung aja.

⁸Anungji shibai ibai sentoker, pai nisung sentoker masü, saka Tsüngrem shibai nenok nem Tanela Temeshi agütsü, pa sentoker.

⁹Saka adianutem, Khristan temeimtep indang nenok dangi zülutsü tenüngdaktsü maka, kechiyong kati ka den koda meimteptsü aji Tsüngremi nenok dang sayuogo.

¹⁰Atangji Makedonia ajonga nung aliba adianu ajak dang nenoki aji oda inyak. Adianutem, ano maneni tali tali inyaktsü onoki nenok ajungshir.

¹¹Onoki tamasa ashiba ama, tesüngjem taküm, pei mapa indang bilemba, aser pei taküm asoshi mapa inyakba ya nenok nükjidong sangma.

¹²Anungji tezülen alirtem tsüngdang nenok junga angutsü aser nenok taküm asoshi shinga daka metaloka malitsü.

¹³Saka adianutem, teimla makaba tanüngba purtem ama nenoki mejashitsü asoshi, onoki nenok nem tasürtem indang memeteti melidaktsünür.

¹⁴Yisu asü aser shia aru ta asenoki amanger. Anungji yamaji Yisu dak amanga asürtema Tsüngremi Yisu den tanaben anir arutsü.

¹⁵ Kechiyong Kibuba O ajanga onoki ya nenok dang ashir, kechiaser Kibuba arudang asenok taküm alirtem, tasürtem dang nungi kodaka-ang tama makümtsü.

¹⁶Kechiyong washiba agi, tamarenba kotak tenyar ola agi, aser Tsüngrem jangzü ola agi Kibuba pei sasa kotak nungi alutsü; aser Khrista nung asürtem tamasa shia arutsü.

¹⁷Idangji asenok anünga taküm alirtem, anüng nung Kibuba den ajuruteptsü aser parnok den külemi mepet nung ayipa atutsü. Aser yamaji asenok teti Kibuba den alitsü.

¹⁸Anungji item o agi nenok kati ka den süngzüktepang.