Read njo 1 TESALONIKA 5 Bible Online

1 TESALONIKA 5 - njo bible

1 TESALONIKA 5

¹Saka adianutem, mapang aser tsüngkhüm-mongpu indang nenok dangi zülutsü tenüngdaktsü maka.

² Kechiyong aonung auür aruba ama Kibuba anogoji arutsü ta nenoki nenok sasa jungjunga metet.

³Kodang yimjung aser kümzüka lir ta nisungtemi shidir, idangji tetsür nu amungdang kangshiba ama, ajongbena parnok dangi teraksaba lendong arur aser parnoki mejenbutettsü.

⁴Saka adianutem, auür ama iba Anogo jagi nenok aoksa-a meneptsüsa nenok ammang nung melika.

⁵Kechiyong nenok ajak tesangwa chirtem aser anüngdang chirtem lir; asenok aonung mesüra ammang meyong masü.

⁶Anungji tangartem amaji asenoki memejangli saka asenoki saksalema kümdanga lidi.

⁷Kechiyong shiri mejanger parnoki ammang nung mejanger. Aser shir yi agi meseper parnoki ammang nung meseper.

⁸ Saka asenok anüngdang meyong asünung asenoki temeim aser tamang merang semoktsü tuku nung semoker, tekümtet imlaba merang korang ka asoshi saksalema lidi.

⁹Kechiyong asen Kibuba Yisu Khrista ajanga tekümtet dangi Tsüngremi asenok shimtet.

¹⁰Aser asenok saaka aliyonga, mesüra amua oa aliyonga, asenok pa den külemi alitsü asoshi pa asenok atema asü.

¹¹Anungji nenoki inyakba ama, kati ka den ajungshitepang aser tashi itdakjang.

¹²Saka adianutem, nenok rongnung shiri inyaker, aser Kibuba nung shiri nenok yaria ajungshir aser nenok kümdangdaktsür, parnok dang nenoki akhüm tsübua benshiang.

¹³Aser nenok rongnung parnok mapa atema temeim nung kanga akhüm tsübua benshiang ta onoki nenok dang mepishir. Nenok rongnung putepa liang.

¹⁴Aser adianutem, mashileni jajartem kümdangdakjang. Temulung züklabatem tashi itdakjang, tashi maitertem yariang, nisung ajak tsütsü talangka aremzükang ta onoki nenok dang ajungshir.

¹⁵Shiangaia tamajung melen tamajung tagütsüma, saka kati ka den aser nisung ajak dang kechi tajung aji inyaktsü bushiang.

¹⁶Teti pela-ang.

¹⁷Maneni sarasademang.

¹⁸Tia ajak nung tenüngsang agüjang. Kechiyong nenok asoshi Khrista Yisu nung ya Tsüngremi mulungba lir.

¹⁹Tanelaji teremsep.

²⁰Shinba otem mezüngmeshi tesü.

²¹Ajak tendangang; tajungba kechi lir akanga ametang.

²²Tamajung kechisarena nungi pila-a liang.

²³Aser tesüneptsüba Tsüngremi pei sasa nenok ajonga meshitetjang aser asen Kibuba Yisu Khrista tanaben arudang, nenok tanela taküm aser temang tai meketi ajonga kümzüka yujang.

²⁴Shibai nenok aja pa temulung lemtetba lir aser pai aji inyaktsü.

²⁵Adianutem, onok asoshi sarasademjang.

²⁶Temeshi temeim agi adianu ajak nem salem agüjang.

²⁷Iba shiti adianu ajak madang züngang ta, Kibuba tashi nungi ni nenok dang züngzünga ashir.

²⁸Asen Kibuba Yisu Khrista taochi nenok den liang.