Read njo YIHUSUA 1 Bible Online

YIHUSUA 1 - njo bible

YIHUSUA 1

¹KIBUBA tenzüker Mosa sür külen Mosa yarir Nun jabaso Yihusua dang KIBUBAi ashi,

²“Kü tenzüker Mosa süogo, anungji tang aramesoang, ni Israel nübur nem agütsüba lima jagi na aser iba nübur ajak Yordan ajanga oang.

³ Ni Mosa dang nangzükba ama ne tetsüng ajemoklen ajakji nenok nem agütsüogo.

⁴Lisem lima aser iba Lebanon nungi ayong tulu, Eufrata ayong tashi, Het nunger lima ajak aser anüolen tzüyim tulu tashi ne arrtsü alitsü.

⁵ Ne arishi tepiyong na anema noktaktsü akokba nisung kata malitsü; ni Mosa den atenba ama ne den atentsü, ni na tamakok maludaktsütsü mesüra na sentoka meyutsütsü.

⁶ “Tashi itang aser tasü itang, kechiaser ni par tsürabur nem agütsütsü asoshi koba nangzük, iba lima nai iba nübur nem senmang amangdaktsütsü.

⁷Kü tenzüker Mosai ne dang melaba ozüng ajak benshia inyaktsüsa tashi aser tasü dang kanga itang. Na kongisa odir oaka takok angutsüsa iba ozüng nungi tajichileni mesüra tabeleni temeyip,

⁸Iba ozüng kaket ya ne bang nungi mepilatsü, saka idakji zülua aliba ajak timi benshitettsüsa nai ammang sangwa aben aji shisadangtsü; aji agi nai ne taküm lenmang azükarutsü aser nai takok tajung angutsü.

⁹Ni ne dang memela ama? Tashi itang aser tasü itang; tsübua teli mesüra temulung ajema teküm, kechiyong na kongisa odir oaka KIBUBA ne Tsüngrem ne den lir.”

¹⁰Idangji Yihusuai nübur tanishirtem dang mela-a ashi,

¹¹“Tanendak sema oa nüburtem dang ozüng agüja shiang, ‘Nenok sasa apok-atsü renemang, kechiaser KIBUBA nenok Tsüngremi nenok nem agütsüba limaji agitsü asemnü tsüngda nung nenoki Yordan ajanga aotsüla.’ ”

¹²Aser Reuben Gad aser Manase kidong tesadang dang Yihusuai ashi,

¹³“KIBUBA tenzüker Mosai nenok dang melaba bilemtetang, KIBUBA ne Tsüngremi nenok nem anisüngzük agütsür, aser iba linük nenok nem agütsüogo.

¹⁴Yordan külenji Mosai nenok nem agütsüba lima nungji nenok kinungtsür, nenok tila tanurtem, aser nenok kiset shiruru alitsü;

¹⁵Saka KIBUBAi nenok nem agütsüba ama nenok adianu nem anisüngzük magütsü tashi, aser KIBUBA nenok Tsüngremi parnok nem agütsüba limaji parnoki magi tashi tasü tait temeranger ajak nenok adianu jakdang nok o nü bener aotsü, aser parnok yaritsü; idangjiang KIBUBA tenzüker Mosai Yordan ajanger anüdoklen aliba nenok nem agütsüba linük jagi meyiptsü aser aji agitsü.”

¹⁶Idangji parnoki Yihusua dang langzü, “Nai onok dang melaba ajak onoki inyaktsü aser nai onok kongisa yokdir onoki aotsü.

¹⁷Onoki Mosa dang ajak angaba ama ne dang onoki angatsü; Mosa den atenba ama ne den dang KIBUBA ne Tsüngrem dena liang.

¹⁸Aser shibaisa ne ozüng anema apusodir aser nai melaba ajak nung o mangalir pa südaktsütsü; tashi aser tasü dang ita liang.”