Read njo YIHUSUA 10 Bible Online

YIHUSUA 10 - njo bible

YIHUSUA 10

¹Kodang Yirusalem[4] chuba Adonizedeki Yihusuai Yeriko aser iba chuba dang inyakba ama Ai aser iba chuba dak inyakba, Ai atsüngteta ibaji meshimeshia samatsüba, aser Gibeon nungeri Israel nüburtem den yimjung yanglua parnok anasa aliba angashi.

²Parnoki kanga tsübu, kechiaser Gibeonji chuba yimti tulutem rongnung ka liasü, aser ibai Ai dang tuluba aser idakji alir nisung ajakji temeranger liasü.

³Anungji Yirusalem chuba Adonizedeki Hebron chuba Hoham aser Yarmut chuba Piram, Lakis chuba Yafia, Eglon chuba Debir dangi osang yoka ashi,

⁴“Kü dangi atung, aser ni yariang, asenoki Gibeon samatsüdi kechiaser parnoki Yihusua aser Israel nüburtem den yimjung yangluogo.”

⁵Idangji Amor nunger chuba pungu: Yirusalem chuba, Hebron chuba, Yarmut chuba, Lakis chuba, aser Eglon chuba; parnok temeranger ajak külemi senden aser Gibeon anema rara.

⁶Idangji Gibeon nisungtem Yihusua tanendak Gilgali osang yoka ashi, “Ne kilirtem nungi ne ket sota teli; onok dangi yakta atua yariang, aser onok kümzükang; kechiaser tenem lima nung aliba Amor chubatem ajak onok anema adenshia lir.”

⁷Anungji Yihusuai pa aser raraba nisung ajak aser temeranger ajak pa den Gilgal nungi atu.

⁸Aser KIBUBAi Yihusua dang ashi, “Nai parnok tetsübu, kechiyong ni ne ket nung parnok bendanga agütsüogo; parnok rongnung ne tsüngdang noktaktettsüba nisung kata mali.”

⁹Anungji Yihusuai ajongbena parnok dangi aru, kechiyong aonung tepiyong pai Gilgal nungi ao.

¹⁰Aser KIBUBAi Israel nunger tsüngdang parnok makdok aser Gibeon nung pai parnok jenti tepset, aser Beth-horon lenmangi atuba tashi aria oa Azeka aser Makkeda tashi parnok tepset.

¹¹Aser ya adok, Israel nunger tsüngdang nungi parnok jena or parnok Beth-horoni aluya alidang Azeka nung parnok dak KIBUBAi rür lung tulu anüng nungi aludaktsü aser parnok asü; Israel chirtem nok agi parnok tepsetba dang nungi rür lung agi asüba timba liasü.

¹²KIBUBAi Israel nunger nem Amor nunger bendanga agütsüba anogo nung Yihusuai KIBUBA dang jembi aser pai Israel chirtemi ngua ashi, Anü, na Gibeon manung marakzüi noktakang, Aser ita, na Aijalon lenten nung marakzüi noktakang.

¹³ Aser anüi marakzüi noktak, aser itai ata, oda kin jagi pei tsükchir dak mang mayang tashi. Ya Yasher kaket nung zülua mali ama? Aser, anüji anüng tiyong nung ata, aser anogo tepiyongshi melui ata.

¹⁴Aser KIBUBAi nisung ka ola angaba ama akhidang mesüra iba sülen iba anogo ama mali asü; kechiyong KIBUBAi Israel atema rara.

¹⁵Iba sülen Yihusua aser Israel nübur ajak pa den Gilgal nung tanendaki shilang.

¹⁶Item chuba pungu jena ao aser Makkeda nung parnok sasa lungpok nung atsükok.

¹⁷Aser Yihusua dang yamai ashi, “Chuba pungu to Makkeda lungpok nung atsükoka lir.”

¹⁸Anungji Yihusuai ashi, “Lungpok kikümbang nung lung tulu ajunglokjang, aser parnok anüktsü aji anasa nisung tokjang.

¹⁹Saka nenoki idakji ata-a teli, nenok tsükchirtem aria oang, aser parnok rongnung tesübuba tashi tepsetang, aser parnok pei yimtitemi teidaktsü; kechiyong KIBUBA nenok Tsüngremi parnok nenok ket nung agütsüogo.”

²⁰Aser parnok mesamatsü tashi aser parnok rongnung jenteta oa alirtem kümzüka aliba yimti jagi mai tashi, kodang Yihusua aser Israel chirtemi parnok jenti tepsetba tatem küma aru,

²¹idangji Makkeda nung tanendak jagi Yihusua dangi yimjung nung meyipa aru; shingaia Israel chirtem kar danga anema temeli marakzü.

²²Idangji Yihusuai ashi, “Lungpok kikümbang lapokang aser lungpok nungi item chuba pungu kü dangi anir arung.”

²³Aser ashiba ama parnoki inyak, aser item chuba pungu, Yirusalem chuba Hebron chuba Yarmut chuba, Lakis chuba, aser Eglon chuba lungpok nungi aniteta pa dangi anir aru.

²⁴Aser kodang parnoki item chuba Yihusua dangi anir aru, Yihusuai Israel nisung ajak aja, aser pa den aoba temeranger madak tongtipurtem dang pai ashi, “Anasai arung, item chuba tekong manung nenok tetsüng yuang.” Aser parnoki anasai aru, aser parnok tetsüng parnok tekong manung ayu.

²⁵Aser Yihusuai parnok dang ashi, “Tsübua teli mesüra temulung ajema teküm, tashi aser tasü itang; kechiyong nenok tsükchirtem shir anema nenoki raradir, KIBUBAi ajak dang yamai inyaktsü.”

²⁶Aser kenpiga lir, Yihusuai parnok kangshi aser parnok südaktsü, aser parnok süngdong pungu nung meta; aser nikongdang tashi parnok süngdong nung meta-a ayu.

²⁷Aser anü talu mapang nung Yihusuai ozüng agütsü aser parnoki süngdong nungi parnok agizük aser kechi nung parnok sasa atsükok iba lungpok kikümbang nung enoka yutsü aser lungpok kikümbang nung lung enoka ayu aser aji tanü tashi lir.

²⁸Panüji Yihusuai Makkeda agi, aser iba yimti aser yangji aliba chuba nok agi lepset; pai itemji aser idakji aliba nisung shinga anünga metoktsüi meshimeshia samatsü; aser pai Yeriko chuba dang benshiba ama Makkeda chuba dang inyak.

²⁹Yihusua aser Israel nunger ajak pa den Makkeda nungi aenshia Libna atong, aser Libna anema rara;

³⁰aser KIBUBAi ibaia aser idakji aliba chuba Israel ket nung bendanga agütsü, aser pai yimti aser idakji alir nisung ajak nok agi lepset; pai yangji shinga anünga metoktsü; pai Yeriko chuba dang benshiba ama iba chuba dang inyak.

³¹Yihusua aser Israel nunger ajak pa den Libna nungi aenshia Lakis atong aser aji anema raratsü renem.

³²Aser KIBUBAi Israel nunger ket nung Lakis bendanga agütsü aser tananübuba nung pai aji agi: aser Libna dang inyakba ajak ama, pai yangji aliba nisung ajak nok agi samatsü.

³³Idangji Gezer chuba Harami Lakis yaritsü aru, aser nisung shinga anünga meyutsüi Yihusuai pa aser pa nisungtem samatsü.

³⁴Aser Yihusua aser Israel nunger ajak pa den Lakis nungi aenshia Eglon atong, aser parnoki ibaji anema raratsü renem;

³⁵aser panüji parnoki aji agi, aser nok agi aji raksatsü, aser idakji aliba nisung ajak pai samatsü; pai Lakis dang inyakba amato yangji alir nisung ajak meshimeshia samatsü.

³⁶Yihusua aser Israel nunger ajak pa den Eglon nungi Hebroni atu aser parnoki aji anema rara.

³⁷Aser parnoki aji agi, aser pai Eglon dang inyakba ajak mesüka idakji aliba chuba aser iba yimti ajak aser nisung ajak pai shinga anünga metoktsüi nok agi samatsü; ano pai iba aser yangji alir nisung ajak meshimeshia samatsü.

³⁸Yamaji Yihusua aser Israel ajak pa den Debiri meyipa aru aser aji anema rara,

³⁹aser idakji aliba chuba aser iba yimti ajak pai meshimeshia samatsü, pai Hebron aser Libna chubatem dak benshiba ama Debir aser iba chuba dang benshi.

⁴⁰Yamaji alinük ajak, tenem linük aser anüdoklentip, aser ali lenten aser atang linük, aser item chuba ajak Yihusuai atsüngtet. Israel Tsüngrem KIBUBAi melaba ama pai shinga anünga metoktsü, saka taküm aliba ajak meshimeshia samatsü.

⁴¹Aser Yihusuai kadesh-barnea nungi Gaza, Goshen lima ajak aser Gibeon tonga parnok samatsü.

⁴²Aser item chuba ajak aser par lima Yihusuai mapang ka nung dang agi, kechiaser Israel Tsüngrem KIBUBAi Israel asoshi rara.

⁴³Yihusua aser Israel nunger ajak pa den Gilgal tanendak jagi shilang.