Read njo YIHUSUA 11 Bible Online

YIHUSUA 11 - njo bible

YIHUSUA 11

¹Kodang Hazor chuba Yabini iba indang angashi, Madon chuba Yobab, Shimron chuba, Aksaf chuba,

²aser anüdoklentip aliba tenem linük nung alir chubatem aser Khinerot anüdoklentip Araba nung alir aser iba lenten nung alir aser anüolen Dor tenem kolak nung alir,

³aser anüdoklen aser anüolen alir Kanan nunger, Amor nunger, Het nunger, Periz nunger, tenem linük nung Yebus nunger, aser Mizpa linük nung Hermon kübok Hiv nunger dangi pai osang yok.

⁴Aser parnok den temeranger telok ajak nisung jenti oda tzüyimküm nung lisem ama, kor aser talungtsü jenti den ao.

⁵Item chuba ajak külemi ajurutep aser parnoki arua Israel nunger den raratsü Merom tzü nung anen.

⁶KIBUBAi Yihusua dang ashi, “Parnokji tetsübuma, kechiaser asüng iba mapang nung ni Israel asoshi parnok ajakji tepsettsü. Nai parnok kortem tetsüng jendangtsütsü aser par kor talungtsütem mi agi rongtoktsütsüla.”

⁷Anungji Yihusua aser pa den aliba raraba nisung ajak ajongbena Meron tzü anasa aru aser parnok amak.

⁸KIBUBAi parnok Israel nunger ket nung bendanga agütsü, aser parnok samatsü, aser Sidon yimtiba aser Misrefot Maim aser Mizpa anüdoklen lenten tonga parnok aria ao; parnoki shinga anünga metoktsü tashi parnok tepset.

⁹KIBUBAi ashiba ama Yihusuai parnok dang benshi; pai parnok kortem tetsüng jendangtsü, aser parnok talungtsütem mi agi rongtoktsü.

¹⁰Idangji Yihusuai oa Hazor agi aser iba chuba nok agi tepset; kechiaser iba mapang nungji item chuba yimli ajak madak Hazor tashi tuluba liasü.

¹¹Idakji aliba taküm ajak kata anünga meyutsüi parnoki tepset, aser parnoki Hazor mi agi rongtok.

¹²KIBUBA tenzüker Mosai melaba ama item chuba yimtitem ajak aser parnok chubatem Yihusuai nok agi tepset, aser idakji taküm kata metoktsüi mi agi rongtoktsü.

¹³Saka Yihusuai rongtoktsüba Hazor dak alaka, tenem nung aliba yimtitembo Israel nungeri merongtoktsü.

¹⁴Aser item yimti nung telaluba oset ajak aser kiset shiruru Israel chirtemi terakzükba oset ama parnok asoshi aben: saka parnok shinga taküm metoktsüi ajak nok agi tepset.

¹⁵KIBUBAi pa tenzüker Mosa dang melaba ama, Mosai Yihusua dang mela, aser Yihusuai yamaji inyak; KIBUBAi Mosa dang melaba ajak pai meinyaki metoktsü.

¹⁶Anungji Yihusuai alinük ajak, tenem linük aser Negeb, Goshen lenten, Araba lima, Israel tenem aser lenten linük ajak agi.

¹⁷Halak tenem nungi atuba Seir tashi, Hermon aser Hermon tenem kübok Lebanon lenten nung Baal-gad tashi. Item chuba ajak pai agi aser pai parnok dak azük aser parnokji südaktsü.

¹⁸Item chuba ajak den Yihusuai mapang talangka anem.

¹⁹Gibeon nung alir Hiv nunger dak alema yimti katia Israel chirtem den yimjung meyanglu; ajak tongbang nung akok.

²⁰ Kechiyong KIBUBAi Mosa dang melaba ama parnok dak yimlibilem mesayutsü saka pai parnok samatsütsü aser pai parnok meshimeshia samatsütsüsa tongbang nung Israel nunger anema arutsü KIBUBAi parnok mulung uludaktsü.

²¹Aser iba mapang nung Yihusua aru, aser tenem linük nungi, Hebron nungi, Debir nungi, Anab nungi, Yihuda tenem linük ajak nungi, aser Israel tenem linük ajak nungi, Yihusuai Anakim samatsü; parnok yimtitem den külemi parnok meshimeshia samatsü.

²²Israel chirtem linük nung Anakim nunger shinga anünga mali asü; oda Gaza, Gat aser Ashdod nung dang kar anünga liasü.

²³Yamaji KIBUBAi Mosa dang jembiba ajak amato, Yihusuai linük ajak agi, aser parnok kin telemsa atonger, Yihusuai Israel nunger nem linükji senmangtsü agütsü. Aser linük rara nungi anisüngzük angu.