Read njo YIHUSUA 14 Bible Online

YIHUSUA 14 - njo bible

YIHUSUA 14

¹Itemi Eleazar putir, Nun jabaso Yihusua aser Israel chirtem kin kidong shia tamburtemi Israel nübur nem Kanan lima senmangtsü agütsübaji lir.

² KIBUBAi Mosa dang melaba ama kin tuku ser tesadang parnok senmangji an toktangba[5] agi lemsa.

³ Kechiaser kin ana ser tesadang senmangbo Mosai Yordan ajanga or agütsüogo; saka parnok rongnung Levi kin nembo senmangtsü magütsü.

⁴Kechiaser Yosef chirtem kin ana liasü, Manase aser Efraim; aser parnok kiset shiruru chiyimdak aser parnok chiyungtsü li den parnok alitsü yimtitem dak alaka pai linük nungji Levi kin nem shilem kecha magütsü.

⁵KIBUBAi Mosa dang melaba ama, Israel chirtemi inyak; aser parnoki linükji lemsa.

⁶Idangji Gilgal nung Yihuda chirtem Yihusua anasai aru; aser Keniz nunger Yefune jabaso Kalebi pa dang ashi, “kadesh-barnea nung ne aser kü indang KIBUBAi Tsüngrem nisung Mosa dang jembiba nai meteta lir.

⁷KIBUBA tenzüker Mosai linük itdangtsü kadesh-barnea nungi ni yokdang ni küm lir tain liasü, aser kü mulung nung aliba ama pa nem osang meyipa bener arutsü.

⁸Aji saka, kü den aoba adianutemi nübur mulung yimsadaktsü, saka KIBUBA kü Tsüngrem sülen ni bendanga anitak.

⁹ Aser panüji Mosai azüngashia ashi, ‘Atangji ne tetsüng ajemokdak linük na aser ne chirtem asoshi teti senmang alitsü kechiaser KIBUBA kü Tsüngrem sülen bendanga nai anitak.’

¹⁰Aser tang ajiang, Israel arem nung jajadang, KIBUBAi Mosa dang iba o jembiba mapang nungi, pai jembiba ama, KIBUBAi item küm lir pungu ni taküm yutsü, aser ajiang tanü ni küm tirpungu tain lir.

¹¹Saka Mosai ni yokba anogo nung ama, tanü anogo tashi, raratsü aser oli aruli ta asütsü tanga kü tashi lir.

¹²Anungji KIBUBAi iba anogo nung ashiba ama, iba tenem linük ya kü nem agüjang; kechiaser idakji Anakim nunger aser yimti tulutem jara agi atsübanger koda liasü, aji nai iba anogo nungto angashiogo; KIBUBAi jembiba ama kü den atentsü aser ni parnok aridoktsü akok.”

¹³Aser Yihusuai pa moatsü aser pai Yefune jabaso Kaleb nem Hebron senmangtsü agütsü.

¹⁴Anungji tanü tashi, Hebron Keniz nunger Yefune jabaso Kaleb senmang aküm, kechiaser Israel Tsüngrem KIBUBA sülen bendanga pai anitak.

¹⁵Tang Arba Anakim nunger rongnung nisung tulutiba asüba yong akhidang Hebron tenüngji Kiriath-arba liasü. Aser linükji rara nungi anisüngzük angu.