Read njo YIHUSUA 17 Bible Online

YIHUSUA 17 - njo bible

YIHUSUA 17

¹Item linük ya Manase kidong asoshi lemzük, kechiaser pa Yosef mezüng jabaso liasü. Manase mezüng jabaso Makir, Gilead tebu pa nokinketer ka liasü, anungji pa nem Gilead aser Bashan lemzüktsü.

²Aser Manase chir tanüngba kintem asoshi item linükji lemzüktsü: Abiezer, Helek, Asriel, Shekem, Hefer aser Shemida. Itemji Yosef jabaso Manase dak jakzükba teburtem lir.

³Saka Manase jabaso Makir chir Gileader chir Hafer jabaso Zelofehad jabaso mali, jala dang liasü. Parnok tenüng itemi: Mala, Noa, Hogla, Milka aser Tirza.

⁴ Parnoki Eleazar putir aser Nun jabaso Yihusua aser tanishirtem dangi arua ashi, “Onok adianu rongnung külemi onok nem senmangtsü agütsütsü KIBUBAi Mosa dang melaogo.” Anungji KIBUBAi melaba ama parnok tebu adianutem den külemi pai parnok nem senmang agütsü.

⁵Anungji Yordan ajanga or Bashan aser Gilead linük dak alaka shilem ter Manase lemzük;

⁶kechiaser Manase jabasotem den külemi pa jalatema senmang lemzük, aser Gilead limaji tanüngba Manase chirtem meyong aküm.

⁷Manase arrtsü Asher nungi Shekem anüdoklen Mikmeta tashi, yang nungjagi anüolentipleni oa Entapua nunger alidak tashi liasü.

⁸Tappua linükji Manase meyong liasü, saka Tapua yimti Manase arrtsü nung alibajibo Efraim chirtem meyong liasü.

⁹Yang nungjagi arrtsüji Kana ayongnu tashi lua liasü. Ibaji Manase linük saka ayongnu anüolen tsütsü aliba yimtitemji Efraim meyong liasü. Manase arrtsüji ayongnu anüdoklentipleni tur tzüyim nung tema liasü.

¹⁰Anüolentip linükji Efraim meyong aser anüdoklentip linükji Manase meyong tena arrtsüji tzüyimji liasü; anüdoklentip Asher tashi, aser anüdoklen Issakar tashi.

¹¹Issakar aser Asher arrtsü tsüngda Manase-i itemi agi: Bethshan aser Ibleam iba den parnok yimti temeket; Dor aser item yimtsüngtem, Endor, Tanak, Magiddo aser parnok temeket yimtitem, aser asembubaji Nagat liasü.

¹² Saka Manase chirtemi item yimti nung alirtemji maridoktet, anungji Kanan nungeri idakji maneni ali.

¹³Kodang Israel nüburtem tashi ita aküm parnoki Kanan nungerji tashiyim agi mapa inyakertem kümdaktsü, aser parnok meshi meshiabo maridok.

¹⁴Aser Yosef chirtemi Yihusua dang ashi, “KIBUBAi moatsüba ama onok nisung jenti sür nung senmangtsü asoshi kechiba nai telemzük ka aser shilem ka dang kü nem agütsü?”

¹⁵Aser Yihusuai parnok dang ashi, “Nenok nisung jenti süra arem jagi tuang aser idakji nenok asoshi Periz aser Refaim nunger linükji leptetang, kechiyong Efraim tenem limajibo nenok asoshi kanga mesütsü.”

¹⁶Aser Yosef chirtemi ashi, “Tenem limaji onok asoshi teperi masü, aser Bethshean aser iba yimtitem aser Yezreel lenten anaprongla linük nung aliba Kanan nunger merang talungtsütem kar.”

¹⁷Aser Yihusuai Yosef kidong Efraim aser Manase kidong dang ashi, “Nenok nisung jenti lir aser tashi tulu lir, nenok shilem ka dang malitsü;

¹⁸saka tenem linük nenok meyong alitsü, kechiyong aji arem liaka nenoki aji leptoktsü aser iba tatem tashi nenok meyong alitsü; kechiyong parnok tashi itaka aser merang talungtsütem liaka nenoki Kanan nunger aridoktsü.”