Read njo YIHUSUA 18 Bible Online

YIHUSUA 18 - njo bible

YIHUSUA 18

¹Israel nüburtemi alinükji atsüngteter külen parnok ajak Shilo nung adenshia sentep süki idakji yanglu.

²Israel nübur rongnung ano kin tenet senmang melemzüki liasü.

³Anungji Yihusuai Israel nüburtem dang ashi, “KIBUBA, nenok tsürabur Tsüngremi nenok nem agütsüba linüki yia aji agitsü nenoki kopiga anüalema alitsü?

⁴Nenok kin shia nungi nisung asemsem shimtetang; ni parnok yoktsü, aser parnoki apusoa linük sema aotsü aser parnok senmang atema linük reprangoktsü; aser parnok kü dangi arutsü.

⁵Aser parnoki aji shilem tenet küma lemsatsü; Yihuda anüdoklentip pa arrtsü nung alitsü, aser Yosef kidong anüolentip parnok arrtsü nung alitsü.

⁶Nenoki alinükji shilem tenet küma lemsatsü aser iba tasazükji kü dangi yagi bener arutsü; aser KIBUBA asen Tsüngrem tsüngdang nenok asoshi ni yangi an toktangtsü.

⁷Kechiyong nenok rongnung Levi kidongbo shilem mali, kechiyong KIBUBA atema putir mapa parnok senmang lir; aser Gad, Reuben aser Manase kidong tesadang anüdoklen; Yordan ajanger KIBUBA tenzüker Mosai parnok nem agütsüba senmang parnoki agizükogo.”

⁸Aser nisungtemi apusoa ao, aser Yihusuai linük ladangi aor dang ya ozüng agüja ashi, “Sema senzüang aser aji ladangang aser kü dangi meyipa osang bener arung, aser Shilo nung KIBUBA tsüngdang ni nenok asoshi an toktangtsü.”

⁹Aser nisungtemi ao aser linük sema ao, aser aji kaket ka nung yimtitem apir shilem tenet küma lemsa, aser parnoki Shilo nung tanendaki Yihusua dangi aru.

¹⁰Shilo nung KIBUBA tsüngdang Yihusuai parnok asoshi an toktang; aser parnok telemsa apir, Yihusuai Israel chirtem nem linükji lemsatsü.

¹¹Benjamin chir kidong parnok kibong apir lemzük; aser parnok shilem arrtsü Yihuda chirtem o Yosef chirtem na tsüngda nung liasü.

¹²Anüolentip len parnok arrtsü Yordan nungi liasü, aser aji anüolentip Yeriko tsütsüi tua anüolen tsütsü tenem lima ajanga ao, aser idak nungjagi aoba Beth-aven arem nung tema liasü.

¹³Idak nungjagi arrtsüji anüdoklentip Luz lima Wabetsa (aji Bethel) tashi, aser yang nungjagi Beth Horon yimlang anüolentip aliba tenem anasa Atarot-Addar tashi arrtsüji lua liasü.

¹⁴Aser anüolen linük idak nungjagi metenloker anüdoklentip tsütsü nungjagi arua anüdoklentip tsütsü Beth-horon jakdang aliba tenem nungi Yihuda chirtem yimti ka Kiriath-baal (aji Kiriath-jearim) nung tema liasü; ya anüolen linük shilem liasü.

¹⁵Aser anüdoklentip linük shilem Kiriath-jearim tatembang nungi liasü, anüolen tsütsüi aoba Neftoa tzü tzüpokdak tashi arrtsü liasü;

¹⁶aser anüolentip tsütsü Refaim lenten nung aliba Hinnom jabaso lenten jakdang tenem tatem tonga arrtsü lua liasü, aser aji Hinnom lenteni alua anüdoklentip Yebus nunger tsütsü aser En-roel tashi alu;

¹⁷aser aji maneni anüolentip tsütsü En-shemesi ao Adummim tsüng aliba Gelilot tashi ao aser Reuben jabaso Bohan lung tashi alu;

¹⁸aser aji anüolentip len Araba tsütsü atena or Araba tashi alua liasü;

¹⁹aser anüolentip Beth-hogla tsütsü atena arrtsü ao; aser Yordan anüdoklentip tatembang nung anüolentip Metsü Tzüyim kümbang nung arrtsü tema liasü; anüdoklentip linük arrtsü ya lir.

²⁰Anüdoklen linük arrtsü Yordan liasü. Item temeket arrtsü ya parnok kibong apir anguba Benjamin chirtem senmang liasü.

²¹Parnok kibong apir agütsüba Benjamin chirtem yimti itemi: Yeriko, Beth-hogla, aser Emek-keziz,

²²Beth-araba, Zemarain, aser Bethel;

²³Avim, Para, aser Ofra;

²⁴Chefar Ammoni, Ofni, aser Geba; parnok yim tena yimti terana;

²⁵Gibeon, Rama, aser Beeroth;

²⁶Mizpa, Chefra, aser Moza;

²⁷Rekem, Irpeel, aser Taralah;

²⁸Zela, Elef, aser Yebus nunger (aji Yirusalem), Gibeah, aser Kiriat; parnok yim tena yimti terpezü. Ibai Benjamin chirtem parnok kibong apir anguba senmang lir.