Read njo YIHUSUA 2 Bible Online

YIHUSUA 2 - njo bible

YIHUSUA 2

¹ Nun jabaso Yihusuai nisung ana itdangiter ama miima Shittim nungi yoka ashi, “Oang alinükji talisa Yeriko ajiokang.” Anungji tena oa nüktapangtatsür ka tenüng agi Rahab kidangi ia idakji anen.

²Aser Yeriko chubai par linük ladangtsü asoshi Israel chirtem kar paonungji arua lir ta angazük.

³Anungji Yeriko chubai Rahab dangi osang benertem yoka ashi, “Ne dangi arua ner kidangi aitba nisungtemji anir arung, kechiaser alinük ajakji ladangtsü asoshi parnok arua lir.”

⁴Saka tetsür jagi tenaji anioker miima ayu, aser lai langzü, “Hau nisungtemji kü dangi aru, saka parnok kong nungi aru ni memetet,

⁵aser aonung yimti süngkhüm shibangba mapang nisungtemji oadok; parnok koleni ao ni memetet, yakta parnok aria oang, kechiaser nenoki parnokji meneptsü.”

⁶Saka lai tenaji kilemi anir tua lai tatongi shia kilem nung ayuba kümbok tepong nung tenaji miim.

⁷Anungji nisungtemi tenaji Yordan ayong tzütendak tashi aria ao, aser aria aortemji oli dang süngkhümji shibangadok.

⁸Aser parnok ano memejangi alidang, lai parnok dangi kilem jagi atu;

⁹aser lai nisungtem dang ashi, “KIBUBAi nenok nem alinükji agütsü aser nenok tsübuba onok dak alu, aser iba lima nung alir ajak nenok madang yimsa-a aor ta ni metet.

¹⁰ Kechiyong nenok Ijip nungi adokdang KIBUBAi Temerem Tzüyim nenok tsüngdang koda konga yok; aser Yordan ajanga or aliba Amor nunger chuba ana Sihon aser Og, shirnok nenoki meshimeshia samatsü, item dang nenoki kechi inyak onoki angashi.

¹¹Aser onoki ya angashidang, nenok tsübuba agi onok mulungjang yimsa; joko onok shinga daka tasü aitba tanela anünga mali; kechiyong KIBUBA nenok Tsüngremji temalen anüng aser teküboklen alima aliba Tsüngrem lir.

¹²Anungji tang ni nenok dang meima benshiba amaji nenoki kübu kidong dang temeim agi benshitsü, aser kü nem ochi temaitsü ka agütsütsü KIBUBA agi kü dang azüngashiang ta ni nenok dang mepishir.

¹³Aser nenoki kübu, aser kütsü, aser kü adianu, aser kü aianu taküm, aser parnok akaba ajak, onok taküm tasü nungi kümzükangma.”

¹⁴Aser nisungtem jagi la dang ashi, “Onok taküm na asoshi sang; oda onoki inyakba mapa ya nai mejembira, kodang KIBUBAi onok nem alinükji agütsüdir, onoki ne dak temeim aser ochi agi benshitsü.”

¹⁵Idangji lai parnokji kichiba ajanga lisü agi ludaktsü, kechiyong lar kiji yimti jara tsüki temalen liasü aser la jara temalen ali.

¹⁶Aser lai parnok dang ashi, “Tenem jagi tuang, mesüra nenok arirtemi nenok arizüktsü aser nenok arirji meyipa mao tashi idakji asemnü atsüka liang; ajiser külen nenoki pei lenmangi aotsü akok.”

¹⁷Aser nisungtemi la dang ashi, “Onoki azüngashidaktsüba ne tenangzükba indang onok kecha tai malitsü.

¹⁸Ajiang, onoki linükji agitsü arudang iba lisü temerem, koba agi nai onok odaktsü ya kichiba nungji alentsüla, aser nebu, netsü, ne adianu aser nebu kinunger ajak ne kidangi jatenang.

¹⁹Aser ya ataloktsü, shirnoki ne ki kishi nungi adoka yimtong jagi odir, pa züji pa kolak manung alitsü, aser ya indang onok tai malitsü; aser shibai ne kidang alir kar dak teka sangdir, pa züji onok kolak manung alitsü.

²⁰Saka onok mapa indang nai tebang jushira, idangji nai onok dang azüngashia nangzükba indang onok tai malitsü.”

²¹Aser lai ashi, “Nenok o amaji lidakjang.” Aser lai parnok yok aser parnoki apusoa ao aser lai temerem lisüji kichiba nungji alenoka ayu.

²²Aser parnok apusoa tenemlen jagi aru, aser parnok arishirtemji meyipa mao tashi anogo asemnü yangji ali. Tang parnok arishirtem jagi lenmang ajak nung parnokji bushi saka parnokji mangu.

²³Idangji nisung anaji meyipa aru, aser tenem nungi alu, aser aji ajanga süia Nun jabaso Yihusua dangi aru; aser parnok dak kechi atalok ajak pa dang ashi.

²⁴Aser parnoki Yihusua dang ashi, “Shitakba KIBUBAi linük ajakji asenok ket nung bendanga agütsüogo; ano iba dak alaka linük nung alir ajak asenok madang yimsa-a aor.”