Read njo YIHUSUA 22 Bible Online

YIHUSUA 22 - njo bible

YIHUSUA 22

¹Idangji Yihusuai Reuben, Gad aser Manase kidong tesadang jar,

² parnok dang ashi, “KIBUBA tenzüker Mosai nenok dang melaba ajak nenoki benshi, aser ni nenok dang melaba ajak nung nenoki kü ola anga;

³tanü tashi item anogo aika nungi KIBUBA nenok Tsüngrem ozüng inyaka nenoki nenok adianu metoktsü.

⁴Aser tang pai parnok den jembiba ama, KIBUBA nenok Tsüngremi nenok adianu nem anisüngzük agütsüogo; anungji Yordan ajanger KIBUBA tenzüker Mosai nenok nem agütsüba pei linüki nenok süki-i meyipang.

⁵“Ne mulung ajak agi, ne tanela ajak agi pa tenzüktsü, pa dak sotaka alitsü, pa ozüng benshitsü, pa lenmang ajak nung jajatsü, aser KIBUBA nenok Tsüngrem meimtsü; aser KIBUBA tenzüker Mosai nenok dang melaba ozüng dang temulung agüja benshiang.”

⁶Yamaji Yihusuai parnok moatsü aser parnok yok; aser parnoki pei kidangi meyipa ao.

⁷Tang Manase kin tesadang ka nem Mosai Bashan nung senmang agütsü, saka tanga tesadang ka nem Yihusuai parnok adianu rongnung Yordan ajanger anüolen tsütsü agütsü. Iba dak alema Yihusuai parnok kidangi yokdang pai parnok moatsü,

⁸aser parnok dang ashi, “Rongsen jenti, kiset shiruru jenti, hon, taribi, yongmenyin, merang, aser süoshi jenti den nenok pei kidangi meyipa arung; aser nenok tsükchir nungi anguba rongsen nenok adianu den lemsaang.”

⁹Aser Reuben chirtem aser Gad chirtem aser Manase kin tesadang meyipa arua, Mosa ajanga KIBUBA I melaba ama, Kanan lima nung aliba Shilo nungi adoka Israel chirtem nungi pila, aser parnoki agitsüba lima Gileadi ao.

¹⁰Kodang parnoki Kanan nung aliba Yordan temeket linüki aru, Reuben chirtem, Gad chirtem aser Manase kin tesadangi Yordan anasa tenladak tulu ka yanglu.

¹¹Saka kodang parnoki Israel chirtem litsü nung Yordan anasa Kanan arrtsü nung tenladak yangludaki ta Israel nüburtemi angashi,

¹²Israel telok ajak parnok anema rarai aotsü Shilo nung senten.

¹³Aser Israel chirtem Eleazar putir jabaso Finehas aser pa den kibur ter Israel kin shia asoshi tebu kidong nungi kibur ka;

¹⁴Reuben chirtem, aser Gad chirtem aser Manase kin tesadang dangi Gilead limai yok; aser parnokji nisung shia Israel nunger meyirijang rongnung tebu kidong madak tebudi liasü.

¹⁵Aser parnoki Reuben chirtem, Gad chirtem aser Manase kin tesadang dangi Gilead limai arua parnoki parnok dang ashi,

¹⁶ “KIBUBA telok ajongai yamai ashir; Kechiba nenoki Israel Tsüngrem anema iba temenen ya inyak? Nenoki iba tenladak yangluba ajanga KIBUBA sülen anitakba nungi meyipa pa anema apusoogo.

¹⁷ Peor nung inyakba temenen to asenok atema teperi masü no? KIBUBAr telok madaki tetsübutsü wara ka aruaka, tanü tashi asenok iba temenen nungi memerükteti lir.

¹⁸Tang nenoki pa sülen anitaktsü memulunger ama? Tanü nenoki pa anema noktakra, asüngbo pai Israel telok ajonga dang ain adoktsü.”

¹⁹“Saka nenok shilem alinük memerüki lira, ajangla nenoki KIBUBA shilem linük, kong KIBUBA tekülemdak süki lir ajagi arung aser onok rongnung liang, saka KIBUBA asen Tsüngrem tenladak alema tanga tenladak ka yangluba agi nenoki KIBUBA anema, mesüra onok anema tapuso.

²⁰ Zera jabaso Akani bendanga agütsüba oset nung tai menaba ajanga Israel telok ajak madak temerenshi mali ama? Aser pa tai asoshi iba nisung kija dang mesama.”

²¹Idangji Reuben, Gad aser Manase kidong tesadangi Israel nübur kidong shia tanishirtem dang langzü,

²²“Tulusang, Tsüngrem, KIBUBA, pai metet, aser Israeli metettsü; ibai anema apusoba mapa süra, aser KIBUBA anema tai menara tanü onok tekümzük.

²³KIBUBA sülen anitakba nungi meyiptsü, mesüra yangji tarongba tenla tenlatsü, mesüra chiyungtsü tenla, mesüra iba manung yimjung tenla ka tenlatsü onoki tenladak yanglua lira aji KIBUBAi pei sasa mang yangang.

²⁴Saka Israel Tsüngremi KIBUBA den nenok kechi shilem aka? ta nenok chirtem tarutsü anogotem nung onok dang shia lir ta tsübuba agi onoki ibai inyakogo.

²⁵Kechiaser nenok Reuben aser Gad kidong, nenok aser onok tsüngda nung KIBUBAi Yordanji arrtsü kümdaktsüogo! KIBUBA nung nenok shilem kecha maka. Yamaji nenok chirtemi onok chirtem KIBUBA tsübuba nungi anendaktsütsü.

²⁶Anungji onoki ashi, arung asenoki tenladak ka renemdi, tarongba tenla mesüra tetepsetba tenla asoshi masü;

²⁷saka ibai nenok aser onok tsüngda nung kuli ka alitsü, aser asenok pa tsüngdang tarongba tenla agi, aser tetepsetba tenla agi, aser yimjung tenla agi KIBUBA tenzüktsü; aser tarutsü mapang nung, nenok chirtemi onok chirtem dang nenok KIBUBA nung shilem maka ta mashitsü.”

²⁸Anungji onoki ashi, “Kodang parnoki onok dang mesüra tarutsü mapang nung onok pututem dang shidir, ya oda asütsü, asen tsüraburtemi yangluba tenladak tatishitsü ajiang; ya tangbo tenla asoshi mesüra tetepsetba tenla asoshi masü, saka nenok o onok na tsüngda nung kuli ka lir.

²⁹Pa tekülemba süki jakdang KIBUBA asen Tsüngrem tenladak alaka, KIBUBA anema meraratsü mesüra tanü nungi KIBUBA sülen anitakba nungi memeyiptsü tarongba tenla asoshi, chiyungtsü tenla asoshi, mesüra tetepsetba tenla asoshi tenladak meyanglutsüba Tsüngremi nungtemang.”

³⁰Kodang putir Finehas aser Israel telok kidong shia madak tanishirtemi, Reuben, Gad aser Manase kidongi jembiba oji angashi, parnok pela-a liasü.

³¹Aser Eleazar putir jabaso Finehas-i Reuben, Gad aser Manase kidong dang ashi, “Tanü asenok rongnung KIBUBA lir ta asenoki metetogo, kechiaser nenoki KIBUBA anema iba tai memena. Tang nenoki KIBUBA ket nungi Israel nüburtem kümzükogo.”

³²Idangji Eleazer putir jabaso Finehas aser tanishirtemji Gilead lima nung Reuben aser Gad chirtem nungi adoka Kanan limai meyipa osang bener Israel nüburtem dangi shilang.

³³Iba osangji angashia Israel nüburtemi Tsüngrem tenüng asang, aser Reuben aser Gad chirtem aliba linük raksatsütsü aser parnok anema rarai aotsü joko parnoki mejembi.

³⁴Aser Reuben aser Gad chirtemi iba tenla sabang dang “Kuli” ta aja. Kechiaser parnoki ashi, “KIBUBAji Tsüngrem ta iba yagi asenok tsüngda kuli sayur.”