Read njo YIHUSUA 23 Bible Online

YIHUSUA 23 - njo bible

YIHUSUA 23

¹Mapang talangka lir külen, kodang KIBUBAi Israel nem parnok meketa aliba tsükchirtem ajak nungi anisüngzük agütsü, Yihusua kanga tambur liasü,

²idangji Yihusuai Israel ajak, parnok tamburtem, tanishirtem, obendangertem aser ketdangpurtem ajak aja aser parnok dang ashi, “Tang ni kanga tambur kümogo.

³KIBUBA nenok Tsüngremi nenok atema item kintem dang inyakba ajak nenoki nguogo, kechiaser KIBUBA nenok Tsüngremi nenok asoshi raraogo.

⁴Ajiang, item anünga aliba kintem nenok kin asoshi senmangtsü, Yordan nungi ni atsüngtetba kin ajak dena anüolen tsütsü tzüyim tulu tashi, ni nenok nem lemsa-a agütsüogo.

⁵Aser KIBUBA nenok Tsüngremi parnok nenok jakdang nungi aridoktsü aser KIBUBA nenok Tsüngremi nenok dang jembiba ama nenoki parnok linük agitsü.

⁶“Anungji Mosa ozüng kaket nung zülua aliba ajak inyaka benshitsü, aser iba nungi tajichileni mesüra tabeleni memeyiptsü kümdangang,

⁷aser nenok rongnung anünga aliba item kin den nenoki memeyokteptsü, mesüra par tsüngrem tenüng metetshitsü mesüra parnok agi azüngashi masütsü; parnok metenzüktsü mesüra parnok madang nenoki mapudaktsü;

⁸saka tanü tashi nenoki inyakba ama KIBUBA nenok Tsüngrem dak azüita alitsü tasü ita liang.

⁹Kechiaser KIBUBAi tashi tait kin tulu ajak nenok jakdang nungi aridoktsü, aser tanü tashi shingaia nenok anema menoktaktettsü.

¹⁰ Nenok rongnung nisung katia parnok meyirijang ka aria aotsü kechiyong pai nenok dang jembiba ama KIBUBA nenok Tsüngremi nenok asoshi rarar.

¹¹Anungji KIBUBA nenok Tsüngrem teti meimtsü kanga kümdanga liang.

¹²Mesüra nenoki khenyongi meyipa oa item anünga aliba kin den meyoktepa nenok parnok dangi oa aser parnok nenok dangi arua parnok den kibakiyira,

¹³ya jungjunga metetang, nenok KIBUBAi item kin joko nenok nungi maridoktsü, saka KIBUBA nenok Tsüngremi nenok nem agütsüba iba tobur tajung lima nungi nenok mesama tashi, parnokji nenok asoshi sang ka aser lunglen ka, nenok tesa nung tareptsü aser nenok tenük nung ai alitsü.

¹⁴“Tang ni tasütsü mapang anasa lir. Nenok nisung shia mulung aser tanela nung ya meteta kar, oda KIBUBA nenok Tsüngremi nangzükba ama tajung ajak agütsüogo. Tenangzükba ajak ka danga tamakok maludaktsüi ataloka aruogo.

¹⁵Saka KIBUBA nenok Tsüngremi nangzükba tajung ajak atalokdaktsüba ama, KIBUBA nenok Tsüngremi ashiba nenoki mangara nenok nem agütsüba iba tobur tajung lima nungi nenok mesamatsü tashi pai nenok dangi temenen mapa ajak bener arutsütsü.

¹⁶KIBUBA nenok Tsüngremi nenok dang melaba tezüngzüktepba raksar nenoki tangar tsüngremtem madang apudaka külema itemji tenzükra, idangjibo nenok anema KIBUBA ain aittsü, aser pai nenok nem agütsüba iba tobur tajung lima nungi nenok yakta samatsütsü.”